¹ Otjuwelatja ohoteka ntthokonaa; eholipiha nimapotto saapa. ² Ahiiva enamatjaya wiira tjiliye, nootakaniha niphanaya niweessa wameetja. ³ Ahoveleeliha mattaava ni ahokhuwela n'mapooma tjuulupale: ⁴ Nhu n'hiniikhwitiri, n'mwe woono! Ayena anuuluma naale ahinoona wookelela: ⁵ Nkawaani! Nlye eyoolyaaka ni n'vurye nipha nipankalyaaka. ⁶ N'hiye elamalelo tjinpankeenhu ni nkhale; mweette munttalani mootjuwelatja. ⁷ Nonvaanhiha ntthu ootarawa nawaakhela oveehiya, ni nonvaanhiha ntthu oovara tjoonhala naakhela oruwaniya. ⁸ N'hinvaanhihe ntthu ootarawa, naahala woothanha; munvaanhihe ootjuwelatja, yena naahala woofentani. ⁹ Mun'himeerye ootjuwelatja, ni yena naahala otepa otjuwelatja; mun'himeerya nassariya, ni yena naahala wuunuwa nootjuwelatjawawe. ¹⁰ Owoova Apwiya wantjantja wootjuwelatja, ni otjuwelatja wattakattiifu oviriyana. ¹¹ Kontha mwaha wawaka, mahukweenhu anwintjenryaa, ni eyaakha tjeekumi tjinawintjenryaa. ¹² Wakhala ootjuwelatja, on'hala wiitjuwelatjera, massi wakhala oohanhuriha, on'hala ovilela omwaneene. ¹³ Oohilokaloka nthiyana oohanhuriha; yena khiivo entjuwelaaya. ¹⁴ Yena nookoma wankhora wonupaa, nookoma mapuro moolupale onpooma. ¹⁵ Yena niihana atthu anvira, yaale aneetta n'ttala wowookwaa. ¹⁶ Nkawaani, nhu n'hintjuwela etthu! Yena neerela yaale ahirina otjuwelatja: ¹⁷ Maatji owin'nhiya phantjiva, ni nkatthe wooliya nssirini phuntjiva. ¹⁸ Yaayo, khantjuwela wiira nookhwe rivaavaa, ananlattuliya ari naatthu ookhwa.