¹ Mwaamwanaka, ossunke tjoorumatjaka nimoolumwaaka. ² Wiiwenle tjoorumatjaka ni onaakhala; ossunke tjinoohimeeryaaka phanak mwanthiyana nimeethwaawe. ³ Okhalane nkokhonimwaa ni ossunke wanrimananiwaa. ⁴ Otjuwelatja wiirele: Omwanrokoraka, ni wiiwenla okhalihe omutji, ⁵ wiira tjoossunke mwaathiyana ooluva nimalakwaaya owiitha. ⁶ Watjanelani wonupaaka, ⁷ kaaweha atthu oohitjuwela etthu, kaahotjuwela, eriyari yaananttonpe, mwaavano n'motja oohissariya. ⁸ Yooyo nanttonpyooyo aahovira ninttala, ni aaheetta arwaaka owanuwawe. ⁹ Oniilale, ni onaripenle. ¹⁰ Vaavale aahophwanhiya ninthiyana, ooluva, ninrima wowotootha. ¹¹ Aari nthiyana oonhakula ni oophareetthu, khookoma owaani, ¹² n'maphironi, mapuro ootjariya, aanaawehaweha mittala tjooteene. ¹³ Vano, ayena yaahonvara ni yaahonvaha etjwaatjwa, ni yaahiira: ¹⁴ Kihovaha yoovahaaka olelo, kihoviriha yookhuluvelihaaka. ¹⁵ Kaahokhuma kitholatholaka ekhovyaa, ni kihoophwanha. ¹⁶ Kihaatalatja wakoriniwaka, mikhumi tjooreera tjoEgito. ¹⁷ Kihonukhelihatja. ¹⁸ Nttwee! Nithukeke npaka ossa; nipanke entthuneehu. ¹⁹ Kontha awan'nhaka khaavo; arwaale ottayi. ²⁰ Akussale nrupa wonssurukhu an'hala ohokolyaa mweeri onoonyaale. ²¹ Niwuulumatjawaya, woohipupha, yaahonkhwitiri. ²² Wowaakuvyaatja, yaahontthara, phanka emope enrwaa wiiviya, wala enama yoovarihiya, ²³ npaka nivaka ninon'homaaya napwiipwi, wala phanka mwaanuni ntthawenla olya, hitjuwelaka wiira nrikarikiha ekumyaawe. ²⁴ Vano, assaanaaka, nkiviriyane, nttekele maaru moolumwaaka. ²⁵ Nrimeenhu ohikhale woorimeela mwaattharaka ayena; n'hirimeele mwaattharattharaka. ²⁶ Ayena ahaahonona atthu entji; khaanakhala vakaani. ²⁷ Ntthokonaya niri munttalani mon'mahiye, ninkhuruwela mooripelani monookhwe.