¹ Mwaana ootjuwelatja naaviriyana en'himya athumwaane, massi namahanhuriha khanviriyana ovaanhihiya. ² N'hokorokho wonmwaanomwawe, ntthu nphwanha tjitthu tjooreera, massi enpheelessaawe ntakhali opanka yootakhala. ³ Yoole nssunka malakwaawe nkhikitjara ekumyaawe, massi nuulumatja ventji niikwanhulatja mwaneene. ⁴ Ntthu oonhoonhiya enpheelessaawe otankula ni khiivo enphwanhaawe, massi otthuna wantthu ooreera nrima onaahala onreerela. ⁵ Nassariya onkassiri tjowoothiya, massi ntthu oovavaryaa nkhalatho oorimeela, ni envaraawe yohaaya. ⁶ Essariya enawaakhavihera yaale ahintthuna ovaanhihiya munttalanimwaya, massi oitthuna yoohimiya onawapwetessa anamattheka. ⁷ Haavo niira kithajiri, massi khaneetthu; nkhwaawe nvaha tjooteene tjirinaawe, massi, weekhweeikhweeli, thatjiri. ⁸ Oweeliya weekumi wantthu thatjiri tjitthu tjirinaawe, massi ntthu massikhini khanoova woopopihiya. ⁹ Nthuko waanassariya onaamwaleela, massi nthuko waatthu oovavaryaa onaahala ottiphyaa. ¹⁰ Wiittottopa on'waana onhakulihana, massi otjuwela ori naale aniiwa ohimeeriya. ¹¹ Mihakhu tjinvukuliya watjaranaka woohivarela etthu, massi yaale anphwanha nssurukhu woovara nteko nimatataaya onaahala wintjenryaa. ¹² Wakhalaka wowunteelihiya wanriiha, nrima onaaweren'nha, massi yoovariya nootthunela nri weekumi. ¹³ Yoole ntanhifu yoohimeeriya naahala wiiwiihera okwanhuwatja, massi nttittimiha tjooruma naahala otthuveliya. ¹⁴ Tjoossomiha tjantthu ootjuwelatja ephiro yeekumi ni naahulussa wookhwani. ¹⁵ Otjuwelatja wooreera onaawaana n'nema, massi nttala waatthu oohiloka khunviryaa. ¹⁶ Atthu oophwanela anvara nootjuwelatjawaya tjinpheelaaya tjooteene, massi ntirikhi naathoonhera tjinvaraawe waatthuni. ¹⁷ Namitthaka oovavaryaa n'morela n'mikatjamihoni, massi nrumiya mwaamini nawaataaniha. ¹⁸ Hintthuna ohimeeriya naahala ossikhinyaa niihaaya, massi nttittiho on'hala owa wayoole ntthuna ovaanhihiya. ¹⁹ Ninrima phiyooreera yoopheela ovariya, massi atakhali khantthuna ohiya yootakhala. ²⁰ Mweette naatthu ootjuwelatja onaahala okhala ootjuwelatja, massi n'mweettana ntakhali naahala ohuva. ²¹ Yootakhala entthawenla waanamattheka, massi anassariya antthuveliya niitthu yooreera. ²² Ntthu ooreera nrima nawaahiyera assitjulawe n'hakhu, massi n'hakhu wanatanpi nssunkeriya ntthu nassariya. ²³ Ematta yoohirehenriya yaamassikhini, yaanaaruwerya eyoolya yintji, massi enkwanhulatjia woohissariya. ²⁴ Yoole hinon'himeerya mwaamwanawe khanontthuna, massi yoole nonfenta mwaamwanawe nan'himeerya. ²⁵ Nassariya naalya npaka onphiyera, massi napwiipwi aatthu omwiipiphini khunon'mala etala.