¹ Yoole nfenta ohimeeriya nootjuwelatja, massi hitthunaka ovaanhihiya khantjuwela etthu. ² Apwiya anonvaha n'nema ntthu omaana, massi anonttarussa ntthu nvara tjitthu tjootakhala. ³ Ntthu hiivahenreke ovara yootakhala, massi anassariya mitithaaritjaya tjihikhumeke. ⁴ Nthiyana oophwanela etthuvo yaawan'nhawe, massi anpanka tjohaaya ankhala phanka ekwerere enunttiha makhuva. ⁵ Miteko tjanassariya tjinkhala tjooreera, massi ekano tjaatakhali tjinkhala tjowootha. ⁶ Moolumo aatthu oohiloka ankhala oovariihana, yanriihaka opheela wiiva, massi moolumo aatthu oophwanela ankhala oolipa. ⁷ Atthu oohiloka anaamora ni khaananteko, massi ntthoko naanassariya ninkhala noweemela. ⁸ Ntthu n'wehiya nootjuwelatja orinaawe, massi nvara tjoohilika naatanhifwiya. ⁹ Yooreera otanhifwiya onarina yoolya, ohiya okhala ootjuwanyaa ohirina eyoolya. ¹⁰ Nassariya n'wehaweha enpheelaaya enamaawe, massi nfento wantthu oovavarya opanka yootakhala. ¹¹ Nreerihatja n'mattanimwawe naahala oruwerya eyoolya yintji, massi yoole nttharatthara tjitthu tjoohinteko khanavareetthu. ¹² Ootakhala nrima npheela wiira akhwaawe yin'yeriyeke, massi n'hokorokho waanassariya on'mwa waayena. ¹³ Ntthu ootakhala nrima niivariha nitjoovaratjwe, massi nassariya khaanonphwanha mahuviho. ¹⁴ N'hokorokho womoolumwaaya, ntthu tjinantjara tjitthu tjooreera, tjitjon'mo phanka nteko won'matataniwaya. ¹⁵ Nttala wantirikhi onanreerela n'meethoniwawe, massi ootjuwelatja nawiiwa ohimeeriya. ¹⁶ Ntirikhi naathoonhera orussiyawawe wowaakuvyaatja, massi nkhotta oruwaniya phootjuwelatja. ¹⁷ Yoole nuuluma ekhweeli n'himya yokhweeli, massi namoona oohikhala n'himya tjowootha. ¹⁸ Moolumo owuulumiya woohuupuwela anaarakaliha phanka ekatana, massi malaku aanassariya anaavoniha. ¹⁹ Malaku okhweeli ankhala womahuku ooteene, massi malaku owootha ankhala owakathi vakaani. ²⁰ Mirima tjaatthu owootha anuupuwela opanka yootakhala, massi otteeliya onkhala waanamalakalaka onrettele. ²¹ Khiivo yootakhala enonphwanha nassariya, massi atthu ootakhala nrima tjinowaatjara epokoho. ²² Apwiya waakassiri atthu owootha, massi ankhala wowaamini phanaatjivela. ²³ Nlolo naavitha otjuwelatjawawe, massi nrima wantirikhi onaakhuwela ohintthu. ²⁴ Ntekwaaya onaahala ohoolela, massi atthu owoolwaa an'hala ovahiya nteko muulupale. ²⁵ Otjukulatja wanrimani wantthu onanlemela, massi nuulumo nooreera naatteeliya. ²⁶ Nassariya mweettihero wanpwanaawe, massi nttala waatthu oohuupuwela onawaahapussa. ²⁷ Ntthu oonhoonhatjiya khan'hala woossa enama yoowayihiya, massi ntthu owuupuwela naahala okhalana n'hakhu wooreera. ²⁸ N'neetta nassariya phuri ekumi, ni munttalani n'neettaawe khuuvo okhwa.