¹ Miruku tja Salomao. Mwaana ootjuwelatja nawaatjiveliha athumwaane, massi mwaana oohiphwanela nawaakutakutheeha anumwaane. ² Mihakhu tjoossunkiya woohilokaloka katjinafayita, massi ovara yooreera onaahuluwa okhwa. ³ Apwiya khanvoliha etala nrima wanassariya, massi ankwanhula etthunelo tjaatthu oohiloka. ⁴ Ntata noonhoonhiya ninanssikhineeha ntthu, massi ntata nantthu aakhili naaphwanha mihakhu. ⁵ Mwaana ootjuwelatja naathukumaniha eyoolya elimwe, massi yoole nrupa owakathi wooteene olimiyaka nawoona ehaaya. ⁶ Etthuvo tjaNluku tjiri nmuru mwanassariya, massi malaku antthu oovavaryaa ankhuneela tjoonhala. ⁷ Nassariya naatjiveliha atthu an'muupuwela, massi ntjina naatthu oovavarya ninaahala wuntta. ⁸ Yaale owiiwenla anaatthuna ohimeeriya, massi ntthu owuuluma tjinene naahaa okwanhuwatja. ⁹ Yoole neetta nin'nema naweetta ninkhavihero, masso yoole ntjikulatja mittalatjawe, naahala otjuweleliya. ¹⁰ Yoole nonweha ntthu naamoonela othunku, ni yoole nuuluma ventji naahala omora. ¹¹ Malaku anassariya emuro yomaatji yeekumi, massi malaku antthu oohilika anuuluma tjoonhala. ¹² Othanha onaawaana enhakunhaku, massi nfento onaakhuneela tjooteene. ¹³ Otjuwelatja onphwanhiya nintthu rina muupuwelo womun'nepani, massi nkopo waatthu yaale ahinassariya. ¹⁴ Atjuwelatji an'nothukumaniha tjootjuwela, massi malaku antthu owuuluma ventji nssitja okwanhuwatja. ¹⁵ N'hakhu wathaatjiri epoomaawe yoolipiheriya; ossikhini waamassikhini okwanhuwatjawaya. ¹⁶ Etthuvo yanassariya en'mweettihera okumi; etjaaira yantthu owiuuluma ventji en'mweettihera otanpini. ¹⁷ Ari munttalani weekumi phaale aniiwa ohimeeriya, massi hintthuna ovaanhihiya naarimeela. ¹⁸ Yoole nvitha ohilokawawe rinimalaku owootha ni nmwressela moolumo oohikhala ntthu owuuluma ventji. ¹⁹ Yakhalaka moolumo mentji, ewaniwani khin'haleela, massi yoole nrattavenla enuulumaawe ntthu ootjuwelatja. ²⁰ Nlimi nanassariya phinooreera; ntthu owuuluma tjinene khanahissima. ²¹ Malaku anassariya anawaaliha atthu entji, massi atthu oohiloka ankhwa mwaha woohikhalanawaya n'nema. ²² Etthuvo tjooreera tjaApwiya tjinawaana n'hakhu, woohiweryaa. ²³ Atthu oohiloka onaatjivela ovara tjitthu tjoohikhala, massi otjuwelatja n'nema wantthu oopheela otjuwela. ²⁴ Woova wantthu oovavaryaa onaahala on'weela, massi tjootthuna tjaanassariya tjinaahala waareera. ²⁵ Phanka ephyoo yuulu envira, tjitjon'mo anaahala omalamala atthu oovavaryaa; massi nassariya ri phanka yowunpiya woohimala. ²⁶ Phanka etthu yoonhuunha waniinoni ni mwiissi n'meethoni, tjitjon'mo phintthu oonhoonhiya arumiyaka. ²⁷ Owoova Apwiya n'nintjenra ekumiinhu, massi eyaakha tjantthu oohiloka tjinaahala ovukuwa. ²⁸ Wanriiha waanassariya ohakalalawaya, massi etthunelo tjaatthu oovavaryaa onaahala orimeela. ²⁹ Nttala waApwiya onawaakhavihera yaale ankhalana n'nema, massi okwanhuwatja onkhala waatthu oovavaryaa. ³⁰ Nassariya khantthemiyatho, massi atthu oovavarya khan'hala okhala elapo yovathi. ³¹ Mwaano mwanassariya onkhuma n'hokorokho wootjuwelatja, massi nlimi nantthu oovavarya ninaahala othikileliya ota. ³² Moolumatjero anassariya anaatjuwela yoophwanela, massi malaku antthu oovavarya anuuluma moolumo ootakhala paassi.