¹ Yahweh wakatsa kuna Mozesi etchiti: ² "Tongera kune anhu ese eIziraeri wetchiti: 'Ipai zwipiriso Kwandiri panguwa yakatemerwa; zwekurya zwe zwipo Zwangu zwekupiswa zwinomunuhiro unodyakadza Kwandir'. ³ Iwewezwe woavundza: 'Itchi nditchipo tchekupiswa tchamutchazopasa kuna Yahweh: mabhira mairi ekono ane gore rimwe, asina kukuwara, matsiku ese, se tchipiriso tchekwenda ne kwenda. ⁴ Mozopa bhira rimwe tchematchibhesi, uye rimweni tchemadyekoni. ⁵ Mozopasa tchagumi tche ufu wakanakisisa, se tchipo tche magwere, tchakavengerwa ne bhanamba retchirongomuna re mafuta akakanyua. ⁶ Itchi nditchipiriso tchekwenda ne kwenda tchakabuiwa ku dhunhu re Sinai tchemunuhiro unodhakadza, tchimwe tchipo tchekupiswa kuna Yahweh. ⁷ Tchipo tche zwekumwa tchitchawe tche bhanamba rimwe kune gwayana rimwe. Dhururai, pambuto iswene, tchipo tche zwekumwa kuna Yahweh. ⁸ Mozopasa bhira rimweni tchemadyekoni, ne tchipo tche magwere, semu semu ne tchematchibhesi. Mozopasawo tchipo tchimweni tche zwekumwa nazwo, tchimwe tchipo tchekupiswa, tchinomunuhiro unodhakadza kuna Yahweh. ⁹ Patsiku ye sabhatya, munofanira kuzopasa mabhira mairi ekono, ane gore rimwe, asina kukuwara, uye ne mabhanamba mairi eufu wakanakisisa, se tchipo tche magwere, zwakavengerwa ne mafuta, pamwepo ne tchipo tche zwekumwa. ¹⁰ Itchi tchitchawe tchipiriso tche masabhatya ese, kundze kwe tchipiriso tchekwenda ne kwenda uye ne tchipo tche zwekumwa. ¹¹ Pakutanga kwe mwedzi dzese, munofanira kuzopasa tchipiriso kuna Yahweh. Mozopasa zwimakwai zwiri, bhira rimwe, uye ne mabhira manomwe ekono ane gore rimwe, asina kukuwara. ¹² Mozopasawo mabhanamba matatu eufu wakanakisisa, se tchipo tche magwere, zwakavengerwa ne mafuta kugwayana rimwe na rimwe, uye ne mabhanamba mairi eufu wakanakisisa, se tchipo tche magwere, zwakavengerwa ne mafuta ku bhira rimwe na rimwe. ¹³ Mozopasazwe bhanamba rimwe re ufu wakanakisisa, wakavengerwa ne mafuta, se tchipo tche magwere ku bhira rimwe na rimwe. Nditchipiriso tchemunuhiro unodyakadza; tchipo tchekupiswa kuna Yahweh. ¹⁴ Tchipo tche zwekumwa tche anhu tchitchazowe tche hafu re bhanamba re vinyu ku bhira rimwe na rimwe, hafu yetchitatu ye bhanamba kune bhira rimwe na rimwe, uye ne hafu yetchirongomuna kune bhira rimwe. Itchi tchitchawe tchipo tchekupiswa, ku mwedzi wese pamwedzi dzese dze gore. ¹⁵ Se tchipo tchekushaisha, mozopa bhira rimwe rekono kuna Yahweh. Itchi tchitchawe tchitutsirwa kune tchipiriso tchekwenda ne kwenda uye ne tchipo tche zwekumwa. ¹⁶ Pamwedzi wekutanga, patsiku yetchigumi na marongomuna emwedzi, panowoneka mutambo we Pyasika ya Yahweh. ¹⁷ Patsiku yetchigumi na shanu ye mwedziwo patchawoneka kumwe kurya. Pamatsiku manomwe, munofanira kurya mkikati isina mbiriso. ¹⁸ Patsiku yekutanga, patchazowoneka umwe musangano muswene kuti mukudze Yahweh. Amufaniri kuita kana bhasa rimwe haro patsikuyo. ¹⁹ Asi, pasai tchimwe tchipo tchekupiswa patchipiriso kuna Yahweh. Mozopasa zimakwai zwiri, bhira rimwe uye ne makwai manomwe ekono ane gore rimwe, asina kukuwara. ²⁰ Mozopasa, pamwepo ne kabhira, tchipo tche magwere tche mabhanamba matatu eufu wakanakisisa, akavengerwa ne mafuta ne mabhanamba mairi pamwepo ne bhira. ²¹ Kune mabhira manomwe, mozopasa bhanamba rimwe reufu wakanakisisa, wakavengerwa ne mafuta, ²² uye ne bhira rimwe rekono se tchipo tchekushaisha kuitira kuita tchipiriso kwamuri. ²³ Zwiro izwi mozopasa kundze kwe tchipiriso tchematchibhesi, itcho tcipiriso tchekwenda ne kwenda. ²⁴ Zwadharoko, pasai zwipiriso izwi matsiku ese, pakati pe matsi,ku manomwe e Pyasika, zwekurya zswe tchipo tchekupiswa tchemunuhiro unodyakadza kuna Yahweh. Izswi zwinofanira kuzopiwa pakututsira kune tchipiriso tchekwenda ne kwenda pamwepo ne tchipo tche zwekumwa. ²⁵ Patsiku yetchinomwe, imwimwi munofanira kuzowa ne mjusangano muswene kuti mukudze Yahweh, uye imwimwi amufaniri kusendza patsikuyo. ²⁶ Kundze kweizwi, patsiku yezwirimwa zwekutanga, kana imwimwi mukapasa tchipo tchinyowani tche magwere kuna Yahweh pamabhiko enyu emasondo, imwimwi munofanira kuzowa ne umwe musangano muswene kuti mukudze Yahweh, uye amufaniri kuita kana bhasa rimwe haro patsikuyo. ²⁷ Mozopasa tchimwe tchipo tchekupiswa tchemunuhiro unodyakadza kuna Yahweh. Mozopasa zwimakwai zwiri, bhira rimwe, ne mabhira manomwe ekono ane gore rimwe. ²⁸ Mozopasazwe tchipo tche magwere kuitira kuperekedza: ufu wakanakisisa wakavengerwa ne mafuta, mabhanamba matatu eufu wakanakisisa wakavengerwa ne mafuta ku bhira rimwe na rimwe ne mabhanamba mairi ku gwayana rimwe. ²⁹ Mozopasa bhanamba rimwe reufu wakanakisisa wakavengerwa ne mafuta kune mabhira manomwe, ³⁰ uye ne bhira rimwe rekono kuitira tchipiriso kwamuri. ³¹ Kana imwimwi mukapasa zwinyama izwi zwisina kukuwara, pamwepo ne zwipo zwe zwekumwa, izwo zwinofanira kuzowa zwimwe zwitutsirwa kune tchipiriso tchekwenda ne kwenda ne tchipo tche magwere"'.