¹ Mafarisi ne masadusi akawiya akazvikanda kuna Djesu kuti amuone, eikumbira kuti apangidzirwe  tchimwe tchipangidziro tchokudenga. ² Asi Iyena wakaadhaira: "Kana madhekoni akawiya, imwimwi munoti: ´kutchawa nenguwa yakanaka, ngekuti denga rakatsuka". ³ Uye nomatchibhese munoti: 'Nguwa nhamasi yakachata, makuta akatswuka ne kuswipa'. Munoziya  kuthumbudzura magariro ekudhenga, asi amukwanisi kuthumbudzura zvipanguidziro zwe nguwa? ⁴ Dzindza rakashata uye nereupombwe rinokumbira tchimwe tchipanguidziro, asi natchimwe tchipangidziro tchaanopuwa kumdze kwe tcha Jona. "Uye Djesu, wakaasiya, akaemda. ⁵ Wafundi wakaguma kurimwe dhii, asi awona wakakanganua kutora mukate. ⁶ Djesu wakaabvunza: " Iwai makangwaririra uye metchiita mbhorembhore nembiriso dze wafarisi ne masadusi". ⁷ Wafundi aireketedzana ega ega etchiti: "ngekuti atizi kuundzisa mukate". ⁸ Uye Djesu paakazwa izwi wakati: "Wanhu wekutenda kudhoko, ngei munoreketedzana mwega mwega uye mutchibuiya nguekutama kuundzisa mukate? ⁹ Imwimwi amusati mazwa uye kana kurangarira pemikate mishanu kuitira zwuru zwishanu zweanhu uye mathengu mangana aakakowa? ¹⁰ Uye pamikate minomwe kuitira zwuru zwirongomuna zweanhu makakowa mathengo mangana? ¹¹ Amuzwisisi ngei kuti andirikubuapi ngue zvemukate? Iwai makagwarira uye metchiita mbhorembhore nembiriso dze wafarisi ne masadusi". ¹² Inopano iwona akanzwisisa kuti Iyena wangasingareketi kuita mbhorembhore nembiriso yomukati, asi kuita mbhorembhore ne dzidziso dze mafarisi ne masadusi. ¹³ Djesu paakawiya kumitandha dziri paduze ne Cesaria ye Firipe, akabvundzisa afundi ake: " Ndiani anhu wanoti ndiMwana wo Munhu?" ¹⁴ Awona wakati : " Amweni anoti:´ ndimwi Johani, Mubhabhatidzi`; amweni anoti: `Eria`, amweni anoti:` Jeremia kana umwe wewaprofita". ¹⁵ Uye Iyena wakabvundzisa: " Asi imwimwi munonditi Inini diri ani? ¹⁶ Wakadhaira Simoni Peduru, akati : "Iwewe uri Kirisitu ,Mwana wa Mwari mupenyu." ¹⁷ Uye Djesu wakamudhaira: "wakakomborerwa, Simoni Barjona, azwina kubva panhama kana mumutaka zwakuzwisa izwi, asi Bhabha Wangu wari kudhenga. ¹⁸ Uye Inini ndinokutiwo uri Peduru, uye pamusoro pebhuwe iri nditchawaka themberi Yangu uye misuo ye gehena aizorambi iripo yakanangana nae. ¹⁹  Inini nditchakupa makii eUmambo Wekudhenga. Tchautchasunga pasi pano nokudhenga tchakasugwawo uye tchautchasunungura pasi pano nokudhenga tchasunungurwawo". ²⁰ Nokudharo Djesu wakatsindikidza afundi kuti asabvundze kana ani hake kuti Iyena ndi Kirisitu. ²¹ Kubvira panguwa iyona, Djesu wakatanga kubvundza afundi Ake kuti zvaidhikanwa kuti aende ku Djerusarema kotambudzika zwiro zwakawanda mumawoko meatchenjebvu, nomaprista wakuru nowatari; kouraiwa uye nokumuka muwanyakufa pazuwa retchitatu. ²² Hino Peduro wakadhaindza Djesu pamutcheto akamuraira, etchiti: "Kure kwenyu, Ishe, izwi azwizombuitiki kwauri". ²³ Asi Djesu akamufuratira, akati: "Bhudha kwenda sure Kwangu, Sathani, iwewe Kwandiri uri buwe rinogwegwedhusa, ngekuti auzwisisi zwiro zwa Mwari, asi zwiro zveanhu". ²⁴ Nokudharo Djesu wakabvundza afundi Ake: " Kana munhu otchidha kunditeera, ngazwirambe patchake, atakure mutchintchikwa wake anditeere. ²⁵ Hinopano wiya unodha kuponesa upenhu wake utchauruza. Uiya unoruza upenhu wake ngekudha kwangu utchauwona. ²⁶ Kumunhu zvingamubhatsirei kuwina nhika yese etchirashikirwa noupenhu wake? Tchi tchigapa munhu pakutchindjanisa neupenhu wake? ²⁷ Ngekuti Mwana Womunhu atchauiya murikudzo raBhabha Wake ne Ngirosi Dzake. Nokudharo Iyena utchapa mubhairo kuna umwe ne umwe  maererano nozwiya zwakaita. ²⁸ Zwirokwazvo Inini ndinokubvundzai kuti imwimwi muripanoo pakati penhu azooni rufu dzamara Mwana wo Munhu etchiuiya mu Umambo Wake".