¹ Izwai soko ra Yahweh, imwi anhu eIziraeri. Yahweh une kumwe kupombhera mbhoswa kune agari epanyika, nekuti apana tchokwadhi kana kutendeka kune tchitenderano, apana ruziyo ra Mwari panyika. ² Pane kutukwa, manyepo, kuurayana, kubha ne upombwe. Iwona adyarika kundze kwe mugano, uye kudhururwa kwe ngazi kawanda. ³ Saka, nyika iri kunyunyuta, uye agari emo ese arikufa; zwinyama zwe mushango uye ne shiri dze mudyenga, pamwepo ne howe dze mubhahari dzitchaviswa. ⁴ Pazwese, apana unorwisana; musasie kana ani hake apombhere mbhoswa umweni. Nekuti ndimwi imwimwi, mapirisita, andiri kupombhera mbhoswa. ⁵ Imwimwi, mapirisita, mutchagwegweduka tchemasikati; zwimwezwimwezwo, maporofiti atchagwegweduka neusiku, uye Inini nditchaparadza mai enyu. ⁶ Anhu angu ari kuparadzwa nekushaiwa ruziyo. Nekuti imwimwi, mapirisita, makaramba ruziyo, Ininiwo nditchamurambai se mapirisita Angu. Nekuti makanganua mutemo Wangu, kunyangwe Inini ndiri Mwari wenyu, Ininiwo nditchakanganuawo ana enyu. ⁷ Nekuwanda kwaita mapirisita, iwona ainyanya kushaisha Kwandiri. Akatchindjanisa kukudzwa kwawo ne kusweruka. ⁸ Iwona arikuzwisapota ne zwishaishi zwe anhu Angu; iwona anodhisisa zwakanyanya ushaishi wawo. ⁹ Zwitchaitikawo kudharoko kune anhu ese: Inini nditchaphanisha ese iwina ngendaa ye zwiito zwawo; Inini nditchapetudzira pa zwiito zwawo. ¹⁰ Atchazorya, asi azoguti; atchaita upombwe, asi azowandi, nekuti akabhuda pamberi pa Yahweh. ¹¹ Anodhisisa upombwe, vinyu, vinyu inyowani, uye ndizwo zwavisa ruziyo. ¹² Anhu Angu anosovundza kune zwidori zwawo zwe muti yakatseswa, uye midhondoro yawo ndiyo inosoapasa zwiporofiti. Nekuti imwe ndhangariro yeudhoko yavisa mugwandza, uye aita se mahure, kundze kwe kuwa akatendeka kune Mwari wawo. ¹³ Iwona anoita zwipiriso pamusoro pemadhunhu uye anopisa zwipiriso mumabhako, pasi pe mipata, aaramo ne terebito, nekuti vute rawo rakanaka. Saka, anasikana awo anoita upombwe, uye arora awo anoita upombwe. ¹⁴ Andizophanitchi anasikana enyu akange asanangura kuita upombwe, kana arora enyu akange aita upombwe. Nekuti anarumewo arikuitawo upombwe, uye arikupasa zwipiriso kuitira kuti iwona aite zwiito zwakashata ne mahure akatcheneswa. Saka, anhu aya asina ruziyo atchaparadzwa. ¹⁵ Kunyangwe iwewe, Iziraeri, wakaita upombwe, Judaa ngaisawe ne mbhoswa. Musawiye ku Girgar, imwimwi anhu, musakwire kuwiya ku Bete-Aveni, uye musaite mbhiko, metchiti: "Unorarama Yahweh". ¹⁶ Nekuti Iziraeri yawe ne utizinini, se kanhombe kapanduki. Yahweh ungamutora sei kwenda nemwi pazwekurya, se zwe makwai pashango rakawanda. ¹⁷ Efraimo wabhatana ne zwidori; musiei ari ega. ¹⁸ Kunyangwe dhoro rawo rinoraradzisa rikapera, iwona anoramba itchiita upombwe; atungamiriri awo anodhisisa, kusweruka kwawo. ¹⁹ Mbhepo yawe mumabhaphiro mawo, uye atchaswerudzwa nekudha kwe zwipiriso zwawo.