¹ Jetro, muphirisita woku Midia, mukwanbo wa Mosesi, akazwa zvese zvakayita Mwari kuna Mosesi uye nop nbunba yake Isiraeri. Ayena wakazwa kuti Ishe wakabvisa nbunba ku Egipita. ² Jetro, mukwanbo waMosesi, akatora Zipora, makadzi waMosesi, paakaedza kuti ayena wakutuma kunba kwake, ³ uye anake airi; zina romwanake umwe ranga riri Gerson, naizvo Mosesei akati:" ⁴ Zina ro siriva ranga riri Eliezer, naizvo Mosesi wakati:" Mwari wo anhu akukuru wokare wakaita rubhatsiro rangu. Ayena wakandibvisa pa bhanga ra Farao". ⁵ Jetro, mukwanbo wa Mosesi, wakayenda no ana a Mosesi uye no mukadzi wake ku thambe kaanga waigara mu dhunhu ra Mwari. ⁶ Ayena wakati kuna Mosesi," Inini mukwanbo wako Jetro, ndiri kwenda kosongana newe no mukadzi wako uye no ana ako. ⁷ Mosesi wakabhudha kuti ayenda kosongana no amukwanbo ake, akotama, uye akatswodha. Awona akabvindzisana umwe na umwe paanga ari uye, kubva apona akaenda mutchitunba. ⁸ Mosesi wakabuya kuno amukwanbo ake zvese zvekayita Ishe kuna farao uye no wa Egipicio , ngo rudho no Isiraeri, pamadhanbudziko ese aakasongana nawo mugwandza uye no muchobho waakasunungurhwa. ⁹ Jatro akadhakara no zviro zvese wokuti Ishe zvakayita no nbunba yo Isiraeri, uye Ayena wakaabvisa mu dzowa igipcios. ¹⁰ Jetro wakati:" Ngarunbidzw Ishe wakamusungurai ku egipcvios uye no mu nhara dza farao, uye Ayena wakamusungura pakuwonererhwa kwake. ¹¹ Zvino, ndino ziya kuti Mwari mukuru kupinda madzimwari ese, nokuti, waegipcio wakasendzesa wa Isiraeri, Mwari wakaabvisa. ¹² Jetro, mukwanbo wa Mosesi, wakapangidzira tchipiriso kuna mwari. Arao uye no atchendjebvu ese wo Isiraeri akauya kuzorhwiya no amukwanba wa Mosesi pa nberi pa Mwari. ¹³ Pa zuwa rotchipiri, Mosesi wakagara kuti atonge nbunba. Bunba yakagara mutcheto make tchomatchibhese dzamara usiku. ¹⁴ Amukwanbo wa Mosesi paakawona kuti zvakayita ku nbunba, ayena wakati," Zvinhi zva urikuyita no nbunba? Nokuti wakagara wega uye nbunba yakagara mutcheto mako tchomatchibhese dzamara usiku"?. ¹⁵ Mosesi wakati kuno amukwanba aye," Anhu anowuna kandiri kuti a bvundzi rusesedzo raMwari. ¹⁶ Kana awona anokureketerana anowuya kandiri. Inini ndini dinopasa mutemo kuno munhu umwe na umweni. ¹⁷ Mukwanbo wa Mosesi wakati kaari:" Zvaurikuyita azvkizi kunaka. ¹⁸ Zvirokwazvo, utchazo tamika iwewe uye no nbunba yako iri naiwewe, nokuti mutoro wakarema zvikuru kauri. Usazviyita wega. ¹⁹ Ndipurutane ndinodha kukupangira, uye Mwari wananga anewe, nokuti iwewe uri wa Mwari unowonerera nbuba, uye tora ku reketesana kuwo kaAri. ²⁰ Unodhikana kuwafundisa magariro Ake uye no mutemo. Unodhikana kuwapangidzira muchobho wanodhikana ku hanba uye bhasa ranoyita. ²¹ Kundza koizvi, unodhikana kusanagura anarume, wokuti anoremekedza Mwari, anarume wokuthenba wokuti anozonda wutongi. Unodhikana kuwakanda pamusoro anhu, kuti ayite atungamiriri wo zana numakumi machanu wo anarume, uye nomukurukuru wo gumi. ²² Awona atchangona anhu pamuchobho wese, asi nhaya dzinochubha awona atchaundza kauri. Uye nhaya dzese dzidhoko, awona kankutonga. ²³ Nomushobho uyu, zvinoreruka kauri, uye kana Mwari akakusesedza,ngokudharo, wananga wakagadzirira kuti ugare wabhanba, uye nbunba yananga yakagadzirira kuti iyende kumba yakadhakara. ²⁴ Ngokudharo, Mosesi wakazuwa masoko amukwanbo ake uye wakayita zvese zvakabvundzwa. ²⁵ Mosesi wakasanangura anarume anokwanisa woku Isiraeri yese uye wakaakanda hinga musoro pa nberi po nbunba, atungamiriri anoterera wo tchuru, zana, makumi machanu uye no atungamiriri wo gumi. ²⁶ Awona akatonga nbunba pa nhaya dzakareruka. Nhaya dzinochupha ayitora kuna Mosesi, asi awonakamar ayitonga nhaya dzidhoko. ²⁷ Ngokudharo, Mosesi akasiya mukwanbo wake uye Jetro akahwirara ku nhika yake kamare.