¹ Izwai soko iri rirkubuiwa na Ishe kwamuri, imwi ana eIziraeri, kune weukama ese andakaita kuti abhudye kunyika ye Gipita: ² Ndakawona imwimwi bhasi pakati pe anhu ese epanyika; saka nditchamupanitchai pa kusama kururama kwenyu kwese. ³ Zwinoitika here anhu airi kuhamba ese asina kupangana? Shumba ingakuwa mushango pasina kuwoneka tchinyama tchayo tchekurya here? ⁴ Kashumba kangakuwa here kuvira murindi kasina kumbobhata tchiro? ⁵ Shiri ingabhatwa pasi pasina kuwoneka murawu kwairi? Murawu ungadjavuka pasi pasina kubhatwa tchiro here? ⁶ Tromboni ingaridzwa paguta, uye anhu osama kushushikana1 here? Pangawoneka rimwe dhambudziko muguta risina kuizwa na Ishe here? ⁷ Zwezwirokwazwo Ishe Mwari hangaite tchiro asina kutchipangidza kune asendzi ake maporofiti. ⁸ Shumba ikakuwa, ndiani unosama kutya? Kana Ishe Mwari akabuya, ndiani asikazoporofiti? ⁹ Dhudzirai ku manyumba eumambo eku Asdode uye nekunyumba dzeumambo dzeku Gipita, uye buyai: Unganidzanai kumakomo eSamaria, uye wonai vongodzo guru pakati pawo, uye nekudwinyirirana pakati pawo. ¹⁰ Uye hakwanisi kuita zwakarurama, kubuya kwa Ishe; munyumba dzeumambo dzawo anounganidza midziyo dzakaawona neubinya uye nekuparadza. ¹¹ Saka Ishe Mwari unoti: Umwe muwengi! Iyena uri mumutcheto mwe nyika, uye utchaparadza kwauri guta rako, uye ne nyumba dzeumambo dzako mutchabhiwa. ¹² Ishe unoti kudhaizwi: semusemu se mufvudzi unopukunyura mumuromo we shumba mirendje miri kana kumagumo kwe ndjee, nekudharoko ana eIziraeri anogara ku Samaria atchaponeswa, nekutchikona kwe mubeda, uye ne kadhimbu kwe bhonde. ¹³ Izwai uye pupurai kune nyumba ya Djakobo, kubuya kwa Ishe Mwari we hondo; ¹⁴ kuti patsiku yanditchapanitcha kusaterera kwe Iziraeri pamberi pawo, nditchapanitchawo kune ma aritari eku Beteri; uye kumagumo kwe aritari kutchagurwa, uye kutchambwerera pasi. ¹⁵ Uye nditchakuwadza nyumba yepanguwa yekutondhora ne nyumba yepanguwa yekupisa, uye nyumba dze nyanga dze ndjoo dzitchapera; uye nyumba jindji dzitchawe nemagumo, kubuya kwa Ishe.