¹ Yinye kuletingelosi letisikhombisa lebetiphetse titja letisikhombisa yeta yatsi kimi, "Kota, ngitekukhombisa kulahlwa kwalengwadla lenkhulu lehleti emantini lamanyenti, ² lamakhosi emhlaba aphingana ngayo, nangeliwayini layo lebugwadla bantfu bemhlaba bagcina badzakiwe." ³ Ingilosi yangitsatsa ngikuMoya yangiyisa ehlane, ngase ngibona umfati ahleti tikwe silo lesibovu lebesigcwele emagama lahlambalatako. Lesilo besinetinhloko letisikhombisa netimphondvo letilishumi. ⁴ Lomfati bekagcoke ingubo lebukhwebeletane nalokubovu kuhlotjiswe ngeligolide, ngematje laligugu, nemapharele. Bekaphetse esandleni sakhe indzebe yeligolide legcwele tintfo letinyanyekako naletingcolile tebugwadla bakhe. ⁵ Ebunti lakhe kwakubhalwe ligama lelinenchazelo lefihlakele; "Bhabhuloni lenkhulu, unina wetingwadla netintfo letinyanyekako temhlaba." ⁶ Ngabona lomfati kutsi udzakwe kunatsa ingati yebantfu labangcwele baNkulunkulu nengati yalabo labafela kufakazela Jesu. Nangimbona lomfati, ngamangala kakhulu. ⁷ Kodvwa ingilosi yatsi kimi, ''Yini umangale? Ngitakuchazela kutsi kushoni ngalomfati nangalesilo lesimetfwele, lesilo lesinetinhloko letisikhombisa netimphondvo letilishumi. ⁸ Lesilo losibonile sake saphila, asisaphili nyalo, sesitawuchamuka senyuke emgodzini longenamkhawulo. Sitabese siya ekubhujisweni. Labo labahlala emhlabeni, labo emabito abo angabhalwanga eNcwadzini yeKuphila kusukela kwasekelwa umhlaba--bayawumangala nababona lesilo, ngoba sasiphila kodvwa asisaphili kepha sitawuta. ⁹ Loku kubita ingcondvo lenenhlakanipho. Letinhloko letisikhombisa titintsaba letisikhombisa lapho lomfati ahleti khona. ¹⁰ Tingemakhosi lasikhombisa futsi. Emakhosi lasihlanu afile, yinye isaphila, lelenye isengakafiki, kepha nayifika, iyawubusa sikhashana lesincane. ¹¹ Lesilo lesake saphila, asisaphili nyalo, siyinkhosi yesiphohlongo. Ibalelwa kulawa lasikhombisa nayo iya ekubhujisweni. ¹² Letimphondvo letilishumi lotibonile tingemakhosi lalishumi lasengakemukeli umbuso, kodvwa ayawumukeliswa emandla njengemakhosi li-awa linye kanye nesilo. ¹³ Lawa amcondvo munye, aniketa emandla nemagunya awo kulesilo. ¹⁴ Ayawususa imphi emelane neLiwundlu. Kodvwa Liwundlu liyawuwancoba ngoba liyiNkhosi yemakhosi neMbusi webabusi--kanye nalabo lababitiwe, labakhetsiwe, nalabatsembekile. ¹⁵ Lengilosi yatsi kimi, "Lamanti lowabonile, lapho kuhleti lengwadla, angebantfu, tindimbane, tive ngetive,tilimi ngetilimi. ¹⁶ Letimphondvo letilishumi lotibonile--leto kanye nesilo titawutondza lengwadla. titawuyishiya yodvwa ingenalutfo ingcunu, tiyawushwabudzela inyama yayo, tiphindze tiyishise iphele ngemlilo. ¹⁷ Nkulunkulu loko ukufake etinhlitiyweni tato kutsi kwenteke injongo yakhe nekuvumelana kunika emandla ekubusa kulesilo kuze emavi aNkulunkulu agcwaliseke. ¹⁸ Lomfati lombonile ngulelidolobhakati lelibusa ngetulu kwemakhosi emhlaba."