¹ Nkulunkulu wase ubusisa Nowa nemadvodzana akhe, watsi kubo,''Tselani, nandze, nigcwalise umhlaba. ² Kwesatjwa kwenu neluvalo lweni akube setikwato tonkhe tilwane letiphilako emhlabeni, ngetulu kwato tonkhe tinyoni tesibhakabhaka, nangetulu kwako konkhe lokuhambaphansi emhlabeni, futsi nangetulu kwato tonkhe tinhlanti taselwandle. Kunikiwe esandleni sakho. ³ Konkhe lokuhambako nalokuphilako kutawuba kudla kwakho. Njengobe ngakunika tibhidvo letiluhlata, nyalo ngikunika konkhe. ⁴ Kepha ungayidli inyama lenengati ngoba kuphila kusengatini. ⁵ Kepha ngenca yengati yakho, imphilo lengekhatsi kwengati yakho, ngitawufuna imbhadalo. Esandleni saso sonkhe silwane ngitayidzinga . Esandleni sanoma ngabe ngumuphi umuntfu, loku kusho kutsi lesandla salomuntfu lobulele umnakabo, ngiyawudzinga inchazelo ngalomphefumulo walomuntfu . ⁶ Lotawucitsa ingati yemuntfu, neyakhe iyawucitfwa ngumuntfu. Ngobe Nkulunkulu wenta umuntfu ngemfanekiso wakhe. ⁷ Nine ke, tselani nandze nenabe emhlabeni wonkhe futsi niphindzaphindzane kuwo.'' ⁸ Nkulunkulu wakhuluma ku Nowa nemadvodzana akhe, watsi, ⁹ ''Ngekwami, lalela! Ngiyahamba ngiyoba nesiciniseko ngesivumelwano nawe, nangetitukulwane letisemvakwakho, ¹⁰ Nako konkhe lokudaliwe lokuphilako lokunawe, netinyoni, nemfuyo, nayo yonkhe indalo yemhlaba nawe, nako konkhe lokwaphuma ngaphandle emkhunjini. Nakuyo yonkhe indalo lephilako emhlabeni. ¹¹ Ngaloku ngicinisa lesivumelwano sami nani, kutsi angeke phindze kutsi inyama ibhubhiswe ngesikhukhula semanti. Angeke phindze kube nesikhukhula lesitawubhubhisa umhlaba.'' ¹² Nkulunkulu watsi,'' Lolu luphawu lwesivumelwano lengilwakhako emkhatsini wami nawe phindze nakuyo yonkhe indalo lephilako lekuwe, nasesitukulwaneni lesitako. ¹³ Ngibeke umushi wenkhosatana emafini, futsi atawuba luphawu lwesivumelwano emkhatsini wami nemhlaba. ¹⁴ Kutawufika lapho ngiyawuletsa emafu ngetulu kwemhlaba phindze nemushi wenkhosatana abonakale emafini, ¹⁵ ngitawubese ngicabanga ngesivumelwano lesisemkhatsini wami nawe nakuyo yonkhe indalo lephilako. Emanti angeke aphindze abe tikhukhula tekubhubhisa lokuphilako. ¹⁶ Lomushi wenkhosatana utawuba semafini futsi ngitawubona, khona ngitokhumbula lesivumelwano saphakadze emkhatsini waNkulunkulu nakuyo yonkhe indalo lephilako emhlabeni.'' ¹⁷ Nkulunkulu watsi ku Nowa,'' Lolu luphawu lwesivumelwano lengasenta emkhatsini wami nakuko konkhe lokuphilako emhlabeni.'' ¹⁸ Emadvodzana a Nowa laphuma emkhunjini kwakungu Shemi, Hhami kanye na Jafethi. Hhami kwakunguyise wa Khenani. ¹⁹ Laba labatsatfu kwakumadvodzana a Nowa, futsi ngalaba umhlaba wonkhe wagcwaliswa. ²⁰ Nowa wase uba ngumlimi, walima ingadze. ²¹ Wase unatsa liwayini wabese uyadzakwa. Abelele angakambatsi ethendeni. ²² Hami, uyise waKhenani, wabona bungcunu beyise wase utjela bomnakabo lababili ngaphandle. ²³ Ngako Shemi na Jafethi batsatsa ingubo bayibeka emahlombe abo bobabili, base bahamba sinyova bavala bungcunu beyise wabo. Buso babo bagucuka babuka kulenyo indzawo, ngako ke ababubonanga bungcunu beyise wabo. ²⁴ Watsi Nowa nakavuka ekudzakweni kwakhe, wase uyakuva lokwentiwa yindvodzana yakhe lencane kuye. ²⁵ Wase utsi, ''Makacalekiswe Khenani. Makabe sisebenti setisebenti tabomnakabo.'' ²⁶ Waphindze watsi,'' Shengatsi Simakadze, Nkulunkulu wa Shemi, angabusiswa, futsi Khenani abe sisebenti sakhe. ²⁷ Shengatsi Nkulunkulu angakhulisa indzawo ya Jafethi, amente akhe likhaya lakhe ethendeni la Shemi. Shengatsi Khenani angaba sisebenti sakhe.'' ²⁸ Emvakwesikhukhula, Nowa waphila iminyaka lengemakhulu lamatsatfu nemashumi lasihlanu emnyaka. ²⁹ Tonkhe tinsuku ta Nowa taba makhulu layimfica nemashumi lasihlanu emnyaka, wabese uyafa.