¹ Leti bekuticheme tabomahlalesangweni: KubakaKhora, ² Meshelemiya umsa wa Khore, wesitukulwane sa Asaf {ngulolobitwa nga Abiyasafa ku 1 Zikhronike 9:19). Meshelemiya (solo ngulelekabitwa nga Shelemiya ku 1 Zikhronike 26:14) bekanemadvodzana: Zekhariya litibuko lakhe, Jediyayeli waba weyesibili, Zebadiya waba wesitsatfu, Jatniyeli waba wesine, ³ Elamu waba wesihlanu, Jehohanani waba wesitfupha, Eliyoyenayi waba wesikhombisa. ⁴ Obedi Edomu bekanemadvodzana: Shemaya waba litubulo, Jehozabadi waba wesibili, Jowa waba wesitsatfu, bese Sakhari uba wesine, Nethaneli waba wesihlanu, ⁵ Amiyeli waba wesitfupha, Isakhari waba wesikhombisa, Pewulethayi waba wesiphohlongo, ngoba Nkulunkulu bekambusisile Obedi Edomu. ⁶ Shemaya indvodzana yakhe watala emadvodzana labusa etikwemindeni yawo, bekungemadvodza lanemakhono lamanyenti. ⁷ Emadvodzana aShemaya bekubo Othni, Refayeli, Obedi, kanye na Elzabadi. Tihlobo takhe boElihu naSemakhiya bekungemadvoza lanemakhono lamanyenti. ⁸ Tonkhe leti bekutitukulwane taObed Edomu. Bona nemadvodzana abo kanye netihlobo tabo bekungemadvodza lakhonako kwenta imisebenti yabo yenkonzo ethendeni lekuhlangana. Bebangemashumi lasitfupha nakubili lebebahlobene naObedi Edomu. ⁹ Meshelemiya abenemadvodzana netihlobo, emadvodza lebekanelikhono, bebalishumi nesiphohlongo sebabonkhe. ¹⁰ Hosa, situkulwane saMerari, abenemadvodzana: Shimri lebekangumholi (noma bekangasilo litubulo, uyise wakhe wamenta umholi), ¹¹ Hilkhiya waba wesibili, Thabaliyahi waba wesitsatfu, zekhariya waba wesine. Onkhe emadvodzana aHosa kanye netihlobo bebalishumi nakutsatfu ngenombolo. ¹² Leticheme tabomahlalesangweni, nebaholi bato, njengetihlobo tabo tabelwa imisebenti yekukhonta endlini yaSimakadze. ¹³ Benta tinkatho, labancane nalabadzala kuye ngekwemindeni yabo, kwentiwa kulelo nalelo sango. ¹⁴ Ngesikhatsi lenkatho yentelwa lisango lasemphumalanga, yehlela kuShelemiya. Base bentela Zekhariya umsa wakhe inkatho, lebekangumeluleki lohlakaniphile, inkatho yadla yena kutsi agadze lisango lasenyakatfo. ¹⁵ Obedi Edomu waniketwa lisango laseningizimu, ase emadvodzana akhe aniketwa kugadza tingungumakamelo. ¹⁶ Shuphimi naHosa baniketwa lisango lasenshonalanga kanye nelisango laseShalekethi, lelingasemgwacweni longenhla. Umndeni ngamunye ngamunye wawunemlindvo wawo. ¹⁷ Ngasemphumalanga bekunemaLevi lasitfupha, ngasenyakatfo amane ngelilanga, ngaseningizimu amane ngelilanga bese kutsi kuletingungumakamelo abe mabili. ¹⁸ Ensikeni lesenshonalanga bekunalamane emgwacweni bese aba babili ensikeni. ¹⁹ Leti bekuticheme tabomahlalesangweni lebebatitukulwane taKhora na Merari. ²⁰ KulamaLevi, Ahija bekagadza ingcebo yendlu yaNkulunkulu, kanye nengcebo yetintfo letinikelwe kuSimakadze. ²¹ Titukulwane taLadani, lebebatitukulwane temaGeshoni ngaLadani, lebebatinhloko temindeni yaLadani umGeshoni, bekubo Jehiyeli ²² kanye nemadvodzana akhe Jehiyeli: Zethamu na Joweli umnakabo. Bona bebaciza ingcebo yendlu yaSimakadze. ²³ Kusukela etitukulwaneni ta Amramu, titukulwane ta Izhari, titukulwane ta Hebroni, kanye netitukulwane ta Uziyeli: ²⁴ Shubayeli, intalelwane yaGeshoni umsa waMosi, bekaphetse tindlu tengcebo. ²⁵ Tihlobo takhe esitukulwaneni sa Eliyezeli bekungumsa wakhe Rehabiya, umsa waRehabiya lebengu Jeshaya, umsa wa Jeshaya lebengu Joramu, umsa wa Joramu longu Zichri, kanye nemsa waZichri lebekungu Shelomithi. ²⁶ Shelomithi kanye netihlobo takhe bebacize yonkhe ingcebo yetintfo taSimakadze, le Davide inkhosi, baholi bemndeni, netindvuna tetinkhulungwane netemakhulu, netindvuna temphi, bebatihlukanisile. ²⁷ Babeka eceleni imphango lebebayitfole emphini bentela kulungisa ngayo indlu yaSimakadze. ²⁸ Bebaphindze bacize tonkhe tintfo letatihlukaniselwe Simakadze ngu Samuweli umphrofethi, Sawula umsa waKhishi, Abneri umsa waNeri, kanye naJowabe umsa wa Zeruya. Konkhe lebekuhlukaniselwe Simakadze bekucizwe ngu Shelomithi kanye netihlobo takhe. ²⁹ Etitukulwaneni sa Izhari, Khenaniya nemadvodzana bebabuke tindzaba tembuso waka Israyeli. Bebatisebenti tangekhatsi embusweni kanye nebahluleli. ³⁰ Etitukulwaneni taHebroni, Hashabiyahi nabomnakabo, emadvodza langu 1,700 lanelikhono, bebenta umsebenti waSimakadze kanye nemsebenti wenkhosi. Bebangaseshonalanga ye Jodan. ³¹ Etitukulwaneni taHebroni, Jeriya bekangumholi wetitukulwane takhe, abalwa kuloluhla lwemindeni yabo. Emnyakeni wemashumi lamane wekubusa kwaDavide baphenya tincwadzi batfola kubo emadvodza lebekanelikhono eJazeri lakaGiliyadi. ³² Jeriyahi abenetihlobo letingu 2,700, lebetinelikhono futsi tibaholi bemindeni. Davide wababeka kutsi babe baholi etikwetinsendvo taka Rubeni nakaGadi, kanye nencenye yelusendvo lwaka Manase, kuyo yonkhe indzaba lephatselene naNkulunkulu kanye nenkhosi.