¹ Ka kusasani ha ku sika, bonse ba kulwana ba mapurisita ni ba kulwana ba bantu ba ba li kufumba muba wola kwi hayila Jesu. ² Ni ba musumina, ni kumu zwisa hateni, ni ku mu twala kwa Pilato mubusi. ³ Linu ku zwaaho Judasi, ya ba muuzi, na bona Jesu cho nyanswa, mi na baka ni ku booza mali e ikumi ni to tatwe ku maprisita ba kulwana ni ba kulwana , ⁴ mi nati, "Ni ba pangi chibi ku uza malaha a sena mulandu. "Mi ni ba cho, "Chinzi icho kwetu? U bone kwa teni umwine." ⁵ Ku zwaho na sohela hansi bu wayawaya bwa mali mu itempele, cho ku katuka, mi na yenda kunze cho ku kali sungilila. ⁶ Ba kulwana ba maprisita ne ba hinda buwayawaya vwa mali mi ni ba mucho, "Ka ku lukeli ku bika a a mali mu chibikilo ka kuti mali a malaha." ⁷ Ni ba wambola che yo indaba ha mwina mi chawo mali ni ba wuula iwaa lyo ku bumbila tu hambwe mwete ba ku zikwa ma buu kwenda. ⁸ Cheli ibaka lina iwa lisi sumpwa, "Iwaa lya malaha" ne linu izuba buti. ⁹ Nji kuti chiba wambiwa ni mupolofita Jelemaya chi izuzilizwa, cho kuti, "Ba ba hindi makumi otatwe o buwayawaya, mu wulo u ba tomwa haakwe ni bantu ba Isilaele, ¹⁰ Mi ni baiha ku mwiine we iwa lyo ku bumbila tu hambwe, sina Ireeza mwa bani heli chikuka." ¹¹ Linu Jesu na zima ha busu bo muyendisi, mi muyendisi na mu buza, "Kana njowe simwine wa ma Juda?" Jesu cho mwi taaba, "Mu wa cho." ¹² Kono ha baali kunyanswa ni ba kulwana ba mapurisita ni ba mwi ba kulwana, na bula kwi taaba chimwi. ¹³ Ku zwaaho Pilato na mucho, "Ko zuwile yonse iyi milandu yo kwete u bikwa?" ¹⁴ Kono na bula kwi taaba ne haiba li mwina inzwi, ku chita kuti mubusi na shala u komoketwa ahulu. ¹⁵ Linu ha mukiti chi bali chizo cho mubusi ku zwisa chifosi chi mwina chi salwa ikunga. ¹⁶ Cheyo inako ku bena ibantiti li ba fosahele wezina lya Barabasi. ¹⁷ Linu ha baba ku kungene ha mwina, Pilato nati kubali, " Njeni umu saka kuti ni mi lukulwile? Barabasi, nandi Jesu yo sumpwa Kreste?" ¹⁸ Kakuti a ba kwizi kuti ba ba muwondi bulyo cho muna. ¹⁹ Cho usi kele ha chipula cha inkatulo, mwihyabwe na tumina linzwi kwali nati, "Sanzi u pangi chimwi kozo muntu ya sena mulandu. Mukuti na sukuluka ahulu sunu mu chiloto chinaba nacho che ibaka lyakwe." ²⁰ Haho mapurisita bakulwana ni ba kulwana ni ba shonga ikunga kuti ba kumbile Barabasi, imi Jesu e hayiwe. ²¹ Mubusi na ba buza, "Njeni ku bobele umu saka kuti ni mi lukulwile?" Ni ba cho, "Barabasi." ²² Pilato na ba cho, "Linu ni pange inzi cha Jesu yo sumpwa Kreste?" Bonse ni be taba, "A bambulwe." ²³ Mi na cho, "Ibaka, mulandu nzi waa ba pangi?" Mi a bo ni ba huwa ahulu hulu, "Mu mu bambule." ²⁴ Mi linu Pilato chinga bona kuti ka kwina cha wola ku panga, mane ni kuti chi kuba tangite mu nyunga, na hinda menzi, cho ku samba ku maanza ha busu bwa bantu bangi, cho kucho kuti, "Ka nina mu laandu cha malaha o zu muntu ya sena mulandu. Mu kuzwe kwenu kuti mu chita bule." ²⁵ Bantu bonse ni bati, "Imi malaha akwe a be kwetu ni ku bana betu." ²⁶ Ku zwaho na ba lukulwila Barabasi, kono na mushupa Jesu ni ku mu baha kuti a bambulwe. ²⁷ Ku zwaaho masole bo mubusi neba leta Jesu ku chikota china mu meekalo a mubusi ni ku kunganya masole mangi. ²⁸ Ni ba mu zabula cho ku mu bwika chizabalo chi subila. ²⁹ Ku zwaaho ni ba panga i hwiisi yo miiya ne kuyi mu bika ha mutwi, choku mu bika inkoli mu iyanza lyakwe lya malyo. Ni ba fukama ha busu bwakwe neku musheunwina, niba cho, "Lumele, Simwine wa Majuda!" ³⁰ Mi neba muswila, mi niba hinda inkoli cho kuyi mu kabisa mu mutwi. ³¹ Haba mana ku musheunwina, cho kumu zabula chizwato ku zwaaho cho kumu zabika zizabalo zaakwe, ne ku mu twala kuku bambulwa. ³² Haba ba kuzwa hanze, ni ba wana mukwame yo zwa kwa Sirine yo sumpwa Simone, iye uba ba hambilizi kuti a yende nabo ili kuti amu nyemwine chifapano chakwe. ³³ Ni beza ku chibaka chi sumpwa Gologota, italusa ''Ha chibaka cha Kagoboli." ³⁴ Ni ba muha iwaine ikopenywe ni shantukwe kuti anywe. Mi chinga a yi sola, kana aba kuwola ku inywa. ³⁵ Haba mana kumu bambula, cho kuli kauhanyekeza zizabalo zakwe choku kaba indaula. ³⁶ Ni be kala choku muliisa. ³⁷ He iwulu lyo mutwi waakwe niba bika iñolo lyo mulandu, li baali ku balika kuti "Uzu nje Jesu, simwine wa Majuda." ³⁸ Basaa bobeele ni ba kokotelwa naye, zumwi ku malyo a kwe mi zumwi ku ma moonso. ³⁹ Ba baali ku hita ni ba mu tukoola, ni ba nyunga mitwi yabo ⁴⁰ ni bati, "Uwe yo bali kuti moo rutunune itempele choku izaka mu ma zuba o tatwe, lihaze umwine! Haiba u Mwana we Ireeza, suke ha chifapaano!" ⁴¹ Che nzila i swana bapurisita ba kulwana ba baali ku musheunwina, ha mwina ni ba ñoli ni ba kulwana, ni bati, ⁴² "A ba ku haza bamwi, kono ka woli ku li haza mwiine. Njeye Simwine wa Isilaele. A suuke ha chifapano, mi ku zwaaho linu njete tu zumine mwaali. ⁴³ U sepa mwe Ireeza, A Ireeza a mulamulele hahanu buti haiba u saka, ka kuti a baco kuti, 'Njeme mwanaswisu we Ireeza.'" ⁴⁴ Mi basaa ba bati ni ba bambwilwe na ye naabo niba wamba matuka kwali. ⁴⁵ Linu ku zwaho che inako imana iyanza ni ka mwina kerima nika wumba inkanda yonse mbwita inako imana iyanza ni toone. ⁴⁶ Che nako imana iyanza ni toone Jesu na huwa che liinzwi ikando nati, "Eli, Eli, Lama sabakatani?" yi landununwa kuti, "Ireeza wangu, Ireeza wangu, chinzi ho ni lekete?" ⁴⁷ Linu ba mwi ba ba zi mene hateni niba zuwa liinzwi, ni bati, "U kwete ku sumpa Elija." ⁴⁸ Hohwaho bulyo zumwi kwabo na tiya choku ka leta chiponchi, ku chi zuza iwayine i chanchumuka, ku bika haluhe, na muha kuti a nywe. ⁴⁹ Bungi bwabo ni bati, "Musiye yeyena. Tubone nandi Elija mweze a mu haze." ⁵⁰ Kuzwaho Jesu hape na huwa che linzwi ikando ni kutambika luhuho lwakwe. ⁵¹ Boone, i jira lyo mu itempele ni lya haluka ko beele ku zwila kwi uulu ku leta hansi. Mi inkanda ni ya nyanganya, ku zwaaho mabwe choku pwachuka hakati. ⁵² Ma kuumbu ni e wuka, mi mi bili ya bantu ba shiyeme ba ba lele ni ba buuka. ⁵³ Ni baazwa mu makuumbu chinga a buuka ku bafu, nibe njila mu muzi mukando u jolola, mane niba boneka ku bantu bangi. ⁵⁴ Mi musenchoriona na bo baba lolelele Jeeso ni ba boona kunyanganya kwe inkanda ni zintu zi bati niza pangahala, cho kuli kalililwa ahulu maswe ni bati, "Cho busakusima uzu ibali mwana we Ireeza." ⁵⁵ Bakulwakazi bangi baba ke ichilile Jeeso ku kazwa kwa Galalia cho kumu babalela ba ba zimene butabule ni ba lolelele. ⁵⁶ Mukati kaabo ku bena Maria Magadalena, Maria nyina wa Jakobo ni Josefa, ni nyina wa baanaswisu ba Zebedea. ⁵⁷ Chinga yaba chitengwana, ni kweza unkosi wo muhumi yo zwa kwa Arimatea, we izina lya Josefa, iye naye ya bali mulutwana wa Jesu. ⁵⁸ Na ya kwa Pilato mi na ka kumbila mubili wa Jesu. Pilato na laela kuti a wu hewe. ⁵⁹ Josefa na hinda mubili, na wu bungila mu ijila li jolola, ⁶⁰ mi choku kawu bika mu ikuumbu lyaakwe ihiyai lya ba hindi cho kuli beeza mu ibwe. Ku zwaaho na pindumwina ibwe ikando ha mulyango we ikuumbu mi nali yendela. ⁶¹ Maria Magadalena ni zumwi Maria ku ba bena, ni be keele he shilya lye kuumbu. ⁶² Izuba li chilila, i bali izuba lya lo mugivero, Ma purisita ba kulwana ni Bafarisai neba kunganela ha mwiina kwa Pilato. ⁶³ Cho kuti, "Unkosi, tu kumbulukwa kuti zuna shaamapa cho usii hala, a bati nati, 'Kani buuke mazuba otatwe haa hita.' ⁶⁴ Chingi linu u lukele ku laula kuti ikumbu lika liiswa ahulu maswe mbwita luzuba lo butatu. Ni kusabi bulyo balutwana bakwe mu beeze ba muyibe ku zwaaho cho kucho bantu, 'Cha ba buuki kubafu.' Ka kuti ku chenga kwa mamani mani mu ku zambe kwe ntanzi." ⁶⁵ Pilato na bacho kuti, "Mu hinde shangabila. Muyende muka liliise hakando mu mu wolela monse." ⁶⁶ Mi niba yenda cho kuka siinka che ibwe, choku viika shangavira.