¹ Kuzwa Jesu hazalwa mwa Betelehema ya Judea mwi nako za simwine Heroda, bakwame balitutite ba kubuzwe nibeza kusika mwa Jerusalema nibati, ² ''Winahi iye yabazalwa Simwine wa Majuda? Twabona inkani yakwe kubuzwe, imi twakeza kukumu fukamina". ³ Linu simwine Heroda hazuwa izi chakatazeha, mane ni Jerusalema yonse naye. ⁴ Heroda chakuganya mapurisita bakulwana bonse ni bañoli ba bantu imi chaba buza, "Kreste uyelele kuzalilwa kuhi?'' ⁵ Chibati kwali, ''Mwa Bethelehema wa Judea, mukuti íchi mwa bachiñoleli muporofita, ⁶ Linu iwe, Bethelehema, mwi inkanda ya Juda, kahena umunini kubayendisi ba Juda, chobulyo kwako kakuzwe muyendisi yete nalise bantu bangu Isilaele.''' ⁷ Linu Heroda cha sumpila ba litutite cha kuliungula nikuba buza kuti inakonzi luli inkani iyi baboneki. ⁸ Cha batuma kwa Bethelehema, chati, "Muyende mukasakisise chentokomelo muhwilezana. Chimwaka muwana, zemuniwambile, njokuti name ninize nika mufukamine." ⁹ Habamana kuzuwa kwa simwine, chibayenda mwi nzila yabo, imi inkani ibaba boni mubuzwe chiyaba yenda habusu konji haiza nikuzimana ni isanyanganyi haho habena muhwilezana. ¹⁰ Haba bona inkani, chibasanga chamusangilo mukando. ¹¹ Chibenjila munzubo chiba bona muhwilezana nibena ni Maria inyina. Chiba fukama ni kumu mushowelela. Chibeyalula zifumu zabo nikumuha impo ze gauda, insense, ni mira. ¹² Ireeza chaba kalimela muchiloto kuti sanzi baboli kwa Heroda, mi chibabola kwi inkanda yabo chenzila imwi. ¹³ Kumasule habayenda, iñiloi lya Simwine chilya libohaza kwa Josefa kwi iñonzi mi chilyati, "Zimane, uhinde muhwilezana ni nyina, mi mutilile kwa Egepita. Mukekale kwateni konji hete nini kuwambile, mukuti Heroda mwasake muhwilezana kuti amwihaye." ¹⁴ Ao masiku a swana Josefa chabuka ni kuhinda muhwilezana ni nyina nikuya mwa Egepita. ¹⁵ Aba kekali kwateni haisi lifu lya Heroda. Ichi chibe zuzilizi cha bawambi Simwine cha muporofita, "Kuzwa mwa Egepita niba sumpi mwanangu." ¹⁶ Linu Heroda, habona kuti bakwame balitutite ba bamusheununi, aba nyelwa ahulu. Chatuma ni ku kehaya banaswisu bonse mwa Bethelehema imi ni muchilalo chonse chi behaya bahwile ba zilimo zobele kuzwa hakuzalwa kuboza hansi, chakuya che inako yeyo ya bazezi kuzwa hababa mu wambilili ba kwame balitutite. ¹⁷ Mi chi kwezuzilizwa chiba wambwa cha muporofita Jeremia, ¹⁸ "Linzwi li bazuwahali mwa Rammah, chililo ni kubokolola kukando, Rahele ulilila bana bakwe, mi ukana mane ni kutontozwa kakuti kabasikwina." ¹⁹ Hafwa Heroda, mubone, iñiloi lya Simwine chilyeza kuboneka kwa Josefa muchiloto mwa Egepita ni lyati, ²⁰ Buke hinde mwana ni nyina mi uyende kwi inkanda ya Isilaele, kakuti babali kusaka kwihaya muhwile chi babafwi." ²¹ Josefa chabuka, kuhinda muhwile ni nyina, mi chibeza mwi inkanda ya Isilaele. ²² Linu hazuwa kuti Arkelausi abali kubusa mwa Judea ha chipula chesi Heroda, aba tiyi kuya kwateni. Kuzwa Ireeza ha mukalimela muchiloto, chayenda kuchilalo cha Galileya ²³ mi chayenda mi nikukahala mu munzi usumpwa Nazareta. Ichi chi bezuzilizi chibawambiwa chaba maporofita, kuti mwa supwe mu Nazarene.