¹ Simwine na wambila Nuwe, "Wize, iwe ni bonse be nzubo yako, mwa aleka, ni ba boni kuti iwe njewe yo siyeme habusu bwangu molu luzubo. ² Mu zinyolozi zonse chena utete zina 7 za chikwame ni 7 chanakazi. Ku zinyolozi zisa cheni kuzili ulete zobele, cha mukwame ni mulikan acho. ³ Hape ni ku zizuni za mwiyulu, ulete zina 7 za chikwame ni 7 za chanakazi, kuhaza lutanga lwa chinsi ch hansi honse. ⁴ Mu mazuba ena 7 kani sokise invula inkanda yonse ka mazuba ena 40 ni masiku ena 40. Kani manise zonse zihala zina hansi zini babumbi." ⁵ Nuwe na tenda zonse zaba muwambili Ileza. ⁶ Nuwe abena miaka ina 600 muunda hawiza mukanda yonse. ⁷ Nuwe, bana bakwe baba kwame, ni ba muhyabwe, ni ba mwihyabwabo ba bana bakwe ba bakwame ni benjila mwa aleka bonse chbaka la menzi amuunda. ⁸ Zinyolozi zichena ni zinyolozi zisacheni, zizuni, ni zonse ziyendisa mabumo hansi, ⁹ zobele ka zobele kuza chikwame ni za chanakazi, ni za keza kwa Nuwe ni kwinjila mwi aleka, sina Ileza mwaba muwambilili Nuwe. ¹⁰ Chikwaba bulyo hakuhita mazuba ena 7, mezi amuunda ne eza mukanda yonse. ¹¹ Mu mwaka wa bu 600 wa kuhala kwa Nuwe, mu mwezi wa bubeli, le zuba la bu 17 la mwezi, mwizuba liswana, menzi a mwibu onse atungite cheyaluka kubwazukila ka kuyaluka, mi ni mahalo ewulu cheyaluka. ¹² Invula chiyatanga ku soka mukanda yonse mazuba ena 40 ni masiku ena 40. ¹³ Mwizuba liswana Nuwe ni bana bakwe babakwame, Sema, Kama ni Jafeta ni mwihyabwe Nuwe, ni ba mwihyabwe nabo chibe njila mwi aleka. ¹⁴ Ni benjililila hamwina ni chinyolozi ka chinyolozi cha muzuka kakuya chakulikoza chimunantu kuya kakuli koza, ni ziyenda kamabomu hansi kuya ka kulikoza kwazo, ni zizo kuya kakulikoza kwazo, kakulikoza zibumbantu zina mabando. ¹⁵ Zobele kuzonse zihala ni zihuza ni zeza kwa Nuwe ni kwinjila mwi aleka. ¹⁶ Zinyolozi zonse zi ba yendi zibali za chikwame niza chanakazi, zibenjili kuya ke Ileza mwaba muwambilili. Linu Ileza cheyala mulyango. ¹⁷ Muunda chiweza mukanda muzuba amakumi wone, mi menzi chaekezeha ni ku katula aleka ni ku inyamwina hewulu ye inkanda. ¹⁸ Menzi cha wumbiliza inkanda yonse mi aleka chiya chimboka hewulu lya menzi. ¹⁹ Menzi naekeza chabungi mwinkanda mane chakuta kuti ni malundu abali maale aba chompokete chamina. ²⁰ Menzi ni anyamuka chakukolwa kena 15 ni ku minisa impela za malundu. ²¹ Zonse zibumbantu zihala ziba kwenda, hansi ni zanfwa, zizuni, zimunantu, zinyolozi zamuzuka, ni zonse zihala zibumbwite zibahali chabungi hansi ni bantu bonse. ²² Zonse zibakuhala hansi, zibakuhala muhuza wabuhalo mu mazulu azo, zibafwi. ²³ Njikuti zonse zintu zibakuhala hansi nizamaniswa, bantu ni zinyolozi ni zi yendisa mabumo ni zizuni za mwiyulu. Zonse ni zanfwa kumana mwikanda. Kwande a Nuwe nabo babena nabo mwa aleka njibabashali. ²⁴ Menzi chaba mwinkanda ka mazuba ena 150.