¹ Lyahanu Jakobo abe zibi kuti mwa Egepita kwina zilyo. Na wamba ku bana bakwe, ''Chitunzi ha mu lilola ku menso?'' ² Abati, ''Mubone kunu, nazuwa kuti kwina zilyo mwa Egepita. Muyende ko imi mu ka tu wulile ko naswe kuti tuhale imi kanji tufwi.'' ³ Ba mukulwe wa Josefa ba banakwame bene ikumi ba bayendi kukawula zilyo mwa Egepita. ⁴ Kono Jakobo kana batumini Benjamine, mwanche wa Josefa, niba zalwa nabo, mukuti abati, ''Nitiya bukabo buwola kwiza kwali.'' ⁵ Bana ba ma Isilaele ba banakwame ba bayendi mukati kabamwi ba ba kukawula, mukuti kubena inzala mwi nkanda ya Kanana. ⁶ Lyahanu Josefa abali muyendisi webu. A bali njiye ya ba ku wuzikiza bantu bonse be nkanda zilyo. Ba mukulwe Josefa niba keza imi ni baka bu mufukamina niba sungamine bulubi bwabo hansi. ⁷ Josefa na bona ba mukulwe imi na beziba, kono na lilyanganisa kubali imi aba wambi nabo cha kukaliha. Na wamba kubali, ''Mukazwa kuhi?'' Ni bawamba, Mwi nkanda ya Kanana kwiza kuwula zilyo. ⁸ Josefa abe zibi ba mukulwe, kono abo kana ba ba mwizibi ⁹ Linu Josefa na zeza ziloto zaba ku lotanga chabo, imi na wamba kubali, '' Mu matwela! Mweza kubona zibaka zenkanda zisa silelezwe.'' ¹⁰ Ba bati kwali, ''Nanta, nfumwangu. Bahikana bako bakeza ku kuwula zilyo. ¹¹ Twense tubana ba muntu yenke. Tubakwame ba sepahala. Bahikana bako kahena matwela.'' ¹² Aba wambi kubali, Nanta, mwakezila kubona zibaka zisa silelezwe mwi nkanda.'' ¹³ Ba bati,'' Iswe tu bahikana bako twina ikumi ni bobele, tu bana ba muntu yenke mwi nkanda ya Kanana. Bone, muhwile sunu hanu njo shele ni beshetu, imi zumwi mwanchetu abafwi.'' ¹⁴ Josefa aba wambi kubali, ''Njizona zina mi wambila, mu matwela. ¹⁵ Chobulyo ka mutatubiwe. Cha buhalo bwa Faro, kete muzwe aha, haisi mwanchenu munini cheza aha. ¹⁶ Mutume umwi mukati kenu a yende a kahinde mwanchenu. Mu mushale muntolongo, kuti ziwambo zenu ziwole ku tatubiwa na za kusakusima, nandi kwina buniti kwenu. Kusibulyo, ka Faro yo hala, tota mu matwela.'' ¹⁷ Naba bika muntolongo bonse mazuba otatwe. ¹⁸ Mwi zuba lya butatu Josefa na wamba kubali, ''Mutende ichi imi muhale, kakuti ni tiya Ileza. ¹⁹ Heiba mu bakwame mu wamba initi, zumwi kwenu ashale mweyi ntolongo, kono inwe muyende, mutwalile bafwa inzala mu mazubo enu zilyo. ²⁰ Mulete mwanchenu munini kwangu kuti ni likolwisise ka ziambo zenu imi kete mufwe.'' Niba tenda bulyo. ²¹ Ba ba wambisani, ''Tota tufoseze ku mwanchetu ka kubona masukuluko a buhalo bwakwe hatu kumbila imi kana tubateki. Chobulyo masukuluko aba boli hewulu lyetu.'' ²² Rubeni nabe taba, ''Kana ni bami wambili, ''Kanji mupangi muswisu chibi; kono kana mubateki? Lyahanu, mubone, chi tulitabilila ha malaha akwe.'' ²³ Kena babezi kuti Josefa aba bazuwile, sina hakubena yotoloka mukati kabo. Naba futatila ni kuka lila. ²⁴ Naka bola ni ku wamba kubali. Aba hindi Simone mukati kabo imi na musumina mumenso abo. ²⁵ Kuzwaho Josefa na layela bahikana bakwe kwi zuza zilyo mu masaka aba mukulwe, niku boza masheleni a umwi ni umwi mwi saka lyakwe, ni kubaha mufaho. Niba tendelwa bulyo. ²⁶ Ba mukulwe ni balonga zilyo he mbongolo zabo ni ba funduka. ²⁷ Umwina kubali heyalula isaka lyakwe kuha imbongolo yakwe zilyo muchibaka chi ba batibele, ni chabona masheleni akwe. Mubone, haba kwi yalula isaka lyakwe. ²⁸ Nati ku bamukulwe, ''Masheleni angu a bozwa. Muabone; ena mwi saka lyangu. Ni bashila inkulo ni kulolinsana chakuli kalilwa, chibati, ''Chinzi ichi chatenda Ileza kwetu?'' ²⁹ Nibaya kwa Jakobo, ishabo mwibu lya Kanana imi ni baka muwambila zonse ziba tendahali ku bali. Nibati, ³⁰ Mukwame, simwine webu, nawamba chabukali kwetu imi na zeza kuti tubali tu matwela mwibu. ³¹ Tuba wambi kwali, ''Tubakwame ba sepahala. Kahena tu matwela. ³² Twina ikumi ni bobele, bana ba beshetu ba banakwame. Umwi abafwi, imi munini sunu hanu wina ni batayo mwibu lya Kanana.' ³³ Mukwame, simwine webu, nati kwetu, ''Kechi munizibe kuti mu bakwame ba sepahala. Musiye zumwi kwenu name, mutwale zilyo kuba fwainzala kuma zubo enu, imi muliyendeze. ³⁴ Mulete mwanchenu munini kwangu. Kuzwaho mu ni zibe kahena mu matwela, kono mu bakwame ba sepahala. Linu muni mi lukulule mwanchenu, imi kamu zumininwe kuwuza ni kuwula mweyo inkanda.'' ³⁵ Kuba tendahali bulyo habeza kuzwisa mu masaka abo, kuti, mubone, mukotana wa silivera wa mukwame ni mukwame ubena mwi saka lyakwe. Abo ni beshabo haba bona mikotana yabo ya silivera, ni balikalilwa. ³⁶ Jakobo ishabo na wamba kubali, ''Mwaninyanga bana bangu. Josefa abafwi, Simone aba yendi, imi muninyange Benjamine. Izi zintu zonse kani zuminzani nazo.'' ³⁷ Rubeni aba wambi ku besi, abati, ''Muwola kwi haya bana bangu bobele ba banaswisu heiba kani kabozi Benjamine kwenu. Mu mubike mumayanza angu, imi munika muboze kwenu hape.'' ³⁸ Jakobo nati, ''Mwanaswisu wangu keti cho yenda nanwe. Sina mukulwe ha bafwi imi aba shali yenke. Heiba bukabo ni bwiza kwali munzila mu mu kabuyenda, linu ka mushetumwine invwi zangu mu maswabi kuya ku bafwile.''