¹ Kubezi ku tendahala buti ha kuzwa izi zintu, muleti we nkomoki ya mubusi wa Egepita ni mwihikili wa mubusi chiba bengisa mukulwana wabo, mubusi wa Egepita. ² Faro aba bengeli mawofisa bakwe bobele muyendisi wa baleti be nkomoki ni muyendisi wa behiki. ³ Chaba bika muntolongo munzubo ya mukulwana wa muganteli, muntolongo iswana mwa bena Josefa. ⁴ Mukulwana wa muganteli chikubaha kwa Josefa, naba letela zi sakahala ku bali. Ba bekali muntolongo inako nde. ⁵ Bonse chiba lota ziloto- muleti we nkomoki ni mwihikili wa mubusi wa Egepita ba bena muntolongo- zumwi ni zumwi mukwame abena chakwe chiloto mu masiku onke, imi chiloto ni chiloto chibena intaluso ya cho. ⁶ Josefa chakeza ku bali kakusasani imi chaba bona. Mubone, ba bali ku wililwe. ⁷ Chabuza mawofisa ba Faro ba bali kwina naye muntolongo mwinzubo ya mukulwana wakwe, chati, ''Chinzi ha muboneka ku wilwa sunu?'' ⁸ Chibati kwali, ''Tubonse twalota ziloto imi kakwina yo toloka.'' Josefa chati ku bali, ''Kanji Ileeza yo wola ku wamba intoloko? Muni wambile, nikumbila.'' ⁹ Mukulwana wa bawondi be nkomoki cha wamba chiloto chakwe kwa Josefa. Chati kwali, ''Muchiloto changu, bone, i veine ibena habusu bwangu. ¹⁰ Mwi veine mubena mitabi yo tatwe. Ha ibika, zihantu chizazwa imi zikoto za muwomba chizabuzwa. ¹¹ Inkomoki ya Faro ibena mwi yanza lyangu. China hinda muwomba ku hamwila munkomoki ya Faro, imi china bika inkomoki mwi yanza lya Faro.'' ¹² Josefa chati kwali, ''Iyi nji ntoloko yacho. Mitabi yo tatwe mazuba o tatwe. ¹³ Mu mazuba otatwe Faro kaku nyemune imi mwa ku bozekeze ha chitulo chako. Mobike inkomoki ya Faro mwi yanza lyakwe, sina ubu hobali u muleti we nkomoki yakwe. ¹⁴ Kono uka nizeze chi kwaba hande kwako, imi nikumbila utondeze inse kwangu. Uka ni wambe kwa Faro imi ani zwise mweyi ntolongo. ¹⁵ Kakuti initi ni baka hindwa kuzwa mwi inkanda ya Mahebelu. Munu namo kakwina chini bapangi kuti bani bike mweyi ntolongo.'' ¹⁶ Cwale mukulwana wa behiki habona kuti intoloko ibali indotu, chati kwa Josefa, ''Name bulyo nina chiloto, imi, bone, zitanda zotatwe za zilyo zibena ha mutwi wangu. ¹⁷ Muchitanda chibena hewulu ku bena zilyo zinchina chinchana za Faro, kono zizuni chiza zilya kuzwa muchitanda ha mutwi wangu ¹⁸ Josefa chetaba imi chati, ''Iyi nji ntoloko. Zitanda zotatwe nji mazuba otatwe. ¹⁹ Mu mazuba otatwe Faro mwa kosole mutwi wako imi mwa ku suminine hesamu. Zizuni ka zilye inyama kuzwa kwako.'' ²⁰ Ku batendahali buti mwizuba lya buta ibali izuba lya kuzalwa kwa Faro. Chatenda mukiti wa bahikana bakwe bonse. Cha nyemuna mutwi wa mukulwana wa baleti be nkomoki ni mutwi wa bakulwana wa behiki, mukati ka bahikana bakwe. ²¹ Cha bozekeza mukulwana wa baleti be nkomoki ha chitulo chakwe, imi chabika inkomoki mwi yanza lya Faro hape. ²² Kono cha sumina mukulwana wa behiki, sina mwaba tolokeli Josefa ku bali. ²³ Naho mukulwana wa baleti be nkomoki kana aba zezi Josefa, kono chi ku muzibala.