¹ Linu Yahwe chati kwa Mushe, " kwiya kwa Faro imi uka mu wambile, 'Yahwe chawamba ichi: Lukulule bantu bangu bayende kokuti baka ni fukamine. ² Haiba ukana kuba lukulula kuti ba yende, Kani nyandise inkanda yako yonse ka masesi. ³ Lwizi kalube ni masesi. Ka azubuke ni kuya munzubo yako, inzubo ya malalo ako,ni ha mumbeta wako. Kaenjile muma zubo aba hikana bako. ka aye ni kubantu bako, muma woveni enu, ni muzi lubilo ze fulawa. ⁴ Masesi ka amilwise niba hikana bako bonse.'''' ⁵ Yahwe cawamba kwa Mushe, " Wambe kwa Aaroni, ' Wolwele iyanza lyako ni nkoli hewulu lya menzi, milonga,ni ziziba, imi ulete masesi hewulu lye nkanda ya Egepita." ⁶ Aaroni cha wolwelw iyanza lyakwe heulu lya menzi, imi masesi chi eza ni kuwumba inkanda ya Egepita. ⁷ Kono ba mabibo chi ba tenda chiswana ni mabibo abo; chi ba leta hanze masesi hewulu lye nkanda ya Egepita. ⁸ Linu Faro cha sumpa Mushe ni Aaroni imi chati, "Mulapele kwa Yahwe kuti atwale kule masesi kuzwa kwangu ni bantu bangu.Linu kani siye bantu ba yende, ili kuti baka mupangile chitabelo." Mushe chati kwa Faro, ⁹ "U wola kuwana inswanelo ya ku niwambila. inako Iniswanela kuku lapelela, ba hikana bako, ni bantu bako, ili kuti masesi a zwiswe kwako ni ba mazubo ako ni kwi kala bulyo mu lwizi?" ¹⁰ Faro chati, "Izona." Mushe chati," Siye kube ubu motela, cho kuti wizibe kuti kakwina zumwi yo likana ni Yahwe, Ileza wetu. ¹¹ Masesi kayende kuzwa kwako, mu mazubo ako, ba hikana bako, ni bantu bako, Ka ekale bulyo mulwizi." ¹² Mushe ni Aaroni chi ba yenda kuzwa kwa Faro. Linu Mushe huweleza kwa Yahwe kaza masesi aba leteli Faro. ¹³ Yahwe cha tenda ubu mwa ba kmbilili Mushe: Masesi chi afwila mumazubo, malapa, ni mawa. ¹⁴ Bantu chi ba a kunganya hamwina mu malinda makulu, imi inkanda chi ya nunka. ¹⁵ Kono linu Faro habona kuti chi kwa hazwa, cha kukutuhaza inkulo yakwe imi kana aba teki kwa Mushe ni Aaroni, bo bulyo Yahwe mwa ba wambilile kuti mwete na tendele. ¹⁶ Yahwe chati kwa Mushe,"Wambile Aaroni, ' Wolole inkoli yako imi u kabe isuko lya hansi, ili kuti ibe injina ku hindilila inkanda yonse ya Egepita." ¹⁷ Chiba tenda bulyo. Imi Aaroni ha wolwelw iyanza lyakwe ni ku kaba isuko lya hansi, injina chizeza ha bantu nizi munantu. Isuko lyonse lya hansi chilya sanduka injina munkanda yonse ya Egepita. ¹⁸ Ba mabibo chi ba lika kupanga injina, kono chiba kangwa. Imi chi kwaba injina ha bantu ni zi munantu. ¹⁹ Linu ba mabibo chi bati kwa Faro, Uu munwe wa Ileza." Kono inkulo ya Faro iba kukutuhazwa, iba kani kuteka ku bali. iba bulyo ubu Yahwe mwa ba wambilile kuti mwete na tendele Faro. ²⁰ Yahwe chati kwa Mushe, " U buke kakusasana imi uzimane mubusu bwa Faro cha zwa ni kuya ku lwizi. U wambe kwali, Yahwe cha wamba ichi: "Lukulule bantu bangu bayende ili kuti baka ni fukamine. ²¹ Kono haiba kete u basiye bantu bangu kuyenda, Ka ni tumine zikwata ze nzii hako, ba hikana bako, ni bantu bako, imi ni mumazubo ako. Ma zubo ama Egepita kaezule zikwata ze nzii, imi ni haiba hebu aho ha ba zimene ka kwizule izii. ²² Kono mwelyo izuba ka ni tende inkanda ya Gosheni ka kusaswana, inkanda umo mubahala bantu bangu, ili kuti kete kube ni zikwata ze nzii kwa teni. Ichi ka chitendahale kuti wizibe kuti njime Yahwe wina hakati keinu inkanda. ²³ Ka nipange intaluhanyo mukati ka bantu bangu ni bako. Ichi cisupo cha mata angu izona ka chitendahale.'''' ²⁴ Yahwe cha tenda bulyo, imi zikwata zi sinkene ze nzii chizeza munzubo ya Faro ni muma zubo aba hikana bakwe. Ku hindilila inkanda ya Egepita yonse, inkanda chi ya sinywa ka libaka la zikwata ze nzii. ²⁶ Faro cha sumpa Mushe ni Aaroni imi chati, " Mukwiya mukapangile Ileza wenu chitabelo mu nkanda yenu." ²⁵ Mushe chati, Kwetu kakulukite kuti tutende bulyo, kakuti matabelo atu panga kwa Yahwe Ileza wetu maswabi ku ma Egepita. Haiba ni tupanga matabelo luli habusu bwa menso abo izo zi swabisa kuma Egepita, kete batu kabe mabwe? ²⁷ Nanta, musipili wa mazuba otatwe kuya mwi halaupa u tuswanela kupanga, kuti tuka pangile Yahwe Ileza wetu matabelo, ubu mwa tulaelela." ²⁸ Faro chati," Kani mizuminine kuyenda ni kuka pangila Yahwe Ileza wenu matabelo mwi halaupa. Kanji mui kule ahulu bulyo. Muni lapelele." ²⁹ Mushe chati,"Hahanu bulyo chi nayenda kuzwa kwako, Ka ni lapele kwa Yahwe kuti zikwata ze nzii zikusiye iwe, Faro, ni ba hikana bako ni bantu izona. Kono koswaneli kutenda ka buchengi hape kusa siya bantu bentu kuyenda kukapangila Yahwe chitabelo." ³⁰ Mushe cha yenda kuzwa kwa Faro ni kuka lapela kwa Yahwe. ³¹ Yahwe cha tenda ubu Mushe mwa ba kumbilile; imi cha zwisa zikwata ze nzii kwa Faro, ba hikana ba kwe, ni ku bantu bakwe. Ka kwina ni haiba chonke chiba shali. ³² Kono Faro cha kukutuhaza inkulo yakwe mweyo inako, imi kana aba lukulwili bantu kuyenda.