¹ Mumwezi wa butatu mu masule a bantu ba Isilaele chi ba zwa mu nkand ya Egepita, mwi zuba liswana, ni chibeeza mwi halaupa lya Sinai. ² Kuzwa haba siya Refidimi mi ni chi beeza mwi halaupa lya Sinai, ciba zaka mafulo mwi halaupa mu busu bwe lundu. ³ Mushe na tanta kuya kwe Ileza. Simwine na sumpa ku zwila kwi lundu mi nati, " U wambile be nzubo ya Jakobo, bantu ba Isilaele: ⁴ Muba boni zinibz lundi ku Maigepita, muniba mi balile ha mabando e mbande ni kumi leta kwangu. ⁵ Hanu linu , haiba muteka che kute kwi nzwi lyangu ni kwi chilila buitamo, lyahanu mumube bangu mukati ka bantu bonse, kono inkanda yonse yangu. ⁶ Ka mube mumubuso wa ba prisita ni chisi changu chi jolola. Aa nji manzwi eti uka wambe ku bantu ba Isilaele. ⁷ Cho bulyo Mushe neza ni ku sumpa ba kulwana ba chisi. Na ba wambila manzwi onse abati Simwine a ba mulai. ⁸ Bantu bonse ni betaba ni kuti, " Mututende zonse Simwine za ba wambi." Lya hanu Mushe neza kubiha manzwi onse a bantu kwa Simwine. ⁹ Simwine nati kwa Mushe, " Munize kwako mwi kope kuti bantu bazuwe chi nawamba nawe ni kuti ba kuzumine tota. Lya hanu Mushe na wamba inzwi lya bantu kwa Ileza. ¹⁰ Simwine nati kwa Mushe," Yende ku bantu. Sunu ni izona ni kuka ba kauhanya kwangu, ni kuti ba shanze zi zwato zabo. ¹¹ Ba litukiseze izuba lya butatu,che zuba lya butatu Simwine keze hansi he lundu lya Sinai. ¹² U bike inyinza ku zimbuluka i lundu lyonse cha bantu. U wambe kubali mutokomele kuti kanji mui hewulu lye lundu kamba kugunka inyinza ya lyo. Yeti a wonde ilundu busakusima mwe haiwe. ¹³ Ka twina ya cha wonde muuntu wina bulyo. Kono, u lukela ku pwacholwa kamba ku zindwa. Kamba chinyolozi kamba muuntu, u lukela ku haiwa. Intolombita chi ya lila inako inde, beze hansi lye lundu." ¹⁴ Lya hanu Mushe na suka he lundu ni kwiza ku bantu. Na kauhanya bantu kwa Simwine imi ni ba sambisa zizwato za bo. ¹⁵ Nati ku bantu, muli bakanyize i zuba lya butatu; kanji mubi hafuhi ni ba mwihyenwanu." ¹⁶ Izuba lya butatu, inako ya kakusasani, ni chi kwaba ni milumo ni mumuni ni kope lisiha he lundu, ni mulumo mukando we intolombita. Bantu bonse mu mafulo ni ba njanja. ¹⁷ Mushe na zwisa bantu bantu mu mafulo kukopana ni Ileza, imi ni ba zimana hansi lye lundu. ¹⁸ I lundu lya Sinai liba wumbitwe busi cha kuti Simwine a sukila halili ni mulilo ni busi, Busi ni bwa katuka ubu busi bwe mbaula, imi i lundu lyonse ni lya nyanganya ahulu. ¹⁹ Lya hanu mulumo we intolombita chinga wa kula ni ku kula ahulu, Mushe na wumba, imi Ileza na mwitaba mwinzwi. ²⁰ Simwine na suka he lundu lya Sinai, kuya hewulu lye lundu cho bulyo Mushe na ya hewulu. ²¹ Simwine nati kwa Mushe," yende hansi imi u mamelise bantu; puhona chi ba zwa kwa Simwine, imi bungi bwabo puhona chi ba fwa. ²² Siye ba prisita ba keza hafuhi ne me ba likauhanye ha mwina- ba libakanye cha kuti ni kezite- cha kuti kanji ni kauhani nabo. ²³ Mushe nati kwa Simwine, Bantu kete beze kwi Lundu lya Sinai, che ntaelo ya ko; Bike iyanza kuzimbulusa ilundu ni ba kauhene kwa Simwine." ²⁴ Simwine nati kwali, " yende hansi u kalete Aaroni eze newe, kono kanji uleti ba prisita ni bantu kuti beze kwa Simwine, kapa iye mwa zwe kubali." ²⁵ Mushe na yenda hansi ku bantu ni kuwamaba ku bali.