¹ Jetero, mu pulisita wa Midiani, mukwenyani wa Mushe, Na zuwa zonse zaba tendi Ileza kwa Mushe ni bantu bakwe ba Isilaele. A ba zuwi kuti Yahwe aba zwisi Isilaele mwa Egepita. ² Jetero, mukwenyani wa Mushe, nahinda Zipora, muka Mushe kumu tuminiza ku munzi, ³ ni bana bakwe bo bele ba bana kwame; I zina lya mwana kwame umwina abali Gerishomi, Chobulyo Mushe nati, " Ni bali ni bukwenda mwi nkanda ya bantu." ⁴ I zina lyo zumwi abali Eliezere, Chobulyo Mushe nati," Ileza uba tayo abali nji mutusi wangu. A bani lamuleli kwi lumo la Faro." ⁵ Jetero, mukwenyani wa MUshe, nakeza ni bana ba Mushe ba bana kwame ni mukakwe Mushe mwi nkanda mwa batibelele he lundu la Ileza. ⁶ Abati kwa Mushe," Njime, Jetero mukwenyanako, nakeza kwako ni mukako ni bana bako bobele ba bana kwame." ⁷ Mushe nazwila kunze ku kuchingweza mukwenyanakwe, cha sungama, niku mu chunchuna. Nibalibuza mabuko muba halila imi niba yenda mwi tende. ⁸ Mushe na wambila mukwenyanakwe zonse zaba pangi Yahwe kwa Faro ni ma Egepita chebaka la Isilaele, ni bukabo bonse bubali kubezila munzila, ni mwa ba kuba kubazwisikiza mwa teni Yahwe. ⁹ Jetero aba sangiswa bulotu bonse bwa ba tendi Yahwe kwa Isilaele, Chakuti aba ba lamuleli mwi yanza lya ma Egepita. ¹⁰ Jetero nati," Kutembwe Yahwe, chakuti aba milamuleli mwi yanza lya ma Egepita ni mwi yanza lya Faro, ni kulukulula bantu kuzwa mwi yanza lya ma Egepita. ¹¹ Linu chineziba kuti Yahwe njimukando muba zimu bonse, kakuli ma Egepita hababali kuhaza ma Isilaele cha manyando, Ileza aba lamuleli bantu bakwe." ¹² Jetero mukwenyani wa Mushe, naleta chitabelo cha kuhisa kwa Ileza. Aaroni niba kulwana bonse ba Isilaele nibeza kulya zilyo ni mukwenyani wa Mushe habusu bwa Ileza. ¹³ Halizwa Mushe abe kali hansi ku atula bantu. Bantu babazimene niba muzimbulukite kuzwa kakusasani konji chitengu. ¹⁴ Mukwenyani wa Mushe habona zonse zibali kupangila bantu, na chati, " Chintunzi ichi chokwete kutenda ku bantu? Chintunzi hawikele wenke bantu bonse niba kuzimanine kuzwa kakusasani konji chitengu?" ¹⁵ Mushe aba wambili mukwenyanakwe," Bantu beza kwangu kwiza kubuza inzila ze Ileza. ¹⁶ Ha baba ni kusanzuminzana, beza kwangu. Niha inkelezo ku zumwi ni zumwi, imi niba luta chasaka Ileza ni milao yakwe." ¹⁷ Mukwenyani wa Mushe abati kwali, " Indaba yokwete kutenda kaina sinte. ¹⁸ Mohonehe tota, iwe ni bantu ba wina nabo. ¹⁹ Uu muziyo ulema ahulu kwako. Kete chowola kuutenda wewena. Uniteke. Munikuhe inkelezo, imi Ileza mwabe nawe, kakuti njiwe yo zimanina bantu kwa Ileza, imi mo lete kuwondisana kwabo kwali. U swanela kuba luta inkelezo ni milao. ²⁰ U swanela kuba tondeza inzila ya kuhinda ni musebezi waku tenda. ²¹ Kuzwa aho, uswanela kusala ba kwame ba boneka ku wola mubantu bonse, ba kwame ba kuteka Ileza, ba kwame bena kusakusima batoyete inkweta. Uswanela kuba bika heulu lya bantu, kuba beyendisi bena zikiti, myanda, makumi amana iyanza, ni ba makumi. ²² Mu babe kuatula indaba za bantu inako ni nako, kono indaba zikukutu mubazilete kwako. Linu indaba zonse zinini, muba kuzi atula abo bene. Cheyo inzila mukuku hubahalile kwako, imi kaba kuhindise kumuziyo. ²³ Haiba motende buti, imi haiba Ileza naku layela kutenda bulyo, chikuti mowizibe kukoma, imi bantu bonse mubayende ku mazubo abo niba likolwisise." ²⁴ Nji kuti Mushe aba zwiwi manzwi a mukwenyanakwe imi aba tendi zonse zaba muwambili. ²⁵ Mushe aba sali bakwame ba wola mwa Isilaele yonse imi nabaha buyendisi bwa bantu, ba yendisi balitabilila zikiti, myanda, makumi, amana iyanza ni makumi. ²⁶ Nji babali kuatula bantu mwi nako ye ndaba zibali kuboneka kuba zihuba. Indaba ziba kubonahala kuba zikukutu zibali kuletwa kwa Mushe, kono indaba zinini zonse zibali kuatulwa abo bene. ²⁷ Linu Mushe asiyi mukwenyanakwe kuyenda, imi Jetero aba boli mwi nkanda yakwe.