¹ Linu Mushe ni bantu ba Isilaele baba zimbi ulu luzimbo kwa Ileza. Baba zimbi," Kani zimbile Yahweh, kakuti aba zundi; nenza imbelesa ni bayendisi bazo baba sohelwa mwi wate. ² Yahweh nji ziho ni luzimbo, imi njaba ni hazi. Uzu nji Ileza wangu, imi kani mutembe, Ileza uba tayo, imi kani mutembe. ³ Yahweh mulwi mukando; Yahweh nji zina lyakwe. ⁴ Aba soheli makochikala a Faro ni masole mwi wate. Bayendisi ba Faro baba salitwe baba mini mwi wate lye mpe. ⁵ Mandinda ababa wumbi; baba yendi hetako ubu ibwe. ⁶ I yanza lyako lya chilyo, Yahweh, lina ziho zilotu; i yanza lyako lya bulyo, Yahweh, liba hasanyi zila. ⁷ Mubukando bwako uba zundi baba kusaka ku kangana nawe. Uba tumini bukali bwako ; chi bwaba hisa ubu indazila. ⁸ Cho luhuho luzwa mumazulu ako menzi aba kungani hantu honke; menzi abuba aba zimani mwiwulu kuli bumba ilinda; mandinda abali makukutu mwi wate. ⁹ Zila nizati, ' Mu nihindikise, Nibakwate, Muni yabe iluwo, chini lakamine munichiwane kubali; Muni zwise muso wangu; i yanza lyangu muliba shinye.' ¹⁰ Kono uba ulusi cha luhuho, imi iwate nilya ba wumba; baba mini sina mahe ina mumenzi makando. Njeni yo swana nawe, Yahweh, ku milimu yonse? ¹¹ Njeni yo swana nawe, wizibahele kuba yo jolwele, yo tiza kwi 'nuwa, kutenda zikomokisa? ¹² Uba otololi i nyanza lyako lya chilyo, imi inkanda niya bamina. ¹³ Che chilikani chikolete uba yendisi bantu bo baka lamuleli. Che ziho zako niwaka benjiza mucibaka chako chi jolola mohala. ¹⁴ Bantu bangi muba zuwe, imi muba tiye, kulikalililwa mukube kuzintu zonse zina mwa Filisita. ¹⁵ Linu malena ba Edomo mubabe nilyowa, masole ba Moabi muba njanje; Zonse zina mwa kanana muzi wanjumuke. ¹⁶ Kuli kalililwa niku tiya mukuba wile. Chebaka lya ziho ze yanza lyako, muba kutumane ubu mabwe konji bantu bako chiba hita, Yahweh- konji bantu boba kalamuleli chiba hita. ¹⁷ Moba lete niku ba byala he lundu lya chifumu, Chibaka, Yahweh, chobali tendeli kuti uhale mo, itempele, Simwine wetu, izo ziba zakwa cha manza ako. ¹⁸ Yahweh mwa buse kuya kwile." ¹⁹ Haneli imbelesa za Faro ziba yendi ni makochikala akwe ni ba kwame baba yendisi bazo mwi wate. Yahweh cha boza menzi e wate habali. Kono bantu ba maIsilaele baba hiti mwibu lizumite hakati ke wate. ²⁰ Miriame mupolofita, nchizye wa Aaroni, cha hinda inchinza, ni banakazi bonse kuyenda ni nchinza, kwa buzana naye. ²¹ Mirame chaba zimbila, "Muzimbile Yahweh, kakuti aba zundi nenza. I mbelesa niba yendisi bazo baba sohelwa mwi wate." ²² Linu Mushe cha twala Isilale kuyenda kuzwa he wate lye mpe. Baba yendi mukati ke halaupa lya Shuri. Baba yendi mazuba otatwe mwi halaupa imi kakwina menzi ababa wani. ²³ Linu nibakeza kwa Marahi, kono kana baba nywi menzi kwateni kakuti aba ku baba. Chingi baba uliki icho chibaka izina lya Marah. ²⁴ Cwale bantu niba lilokela Mushe ni bati, " Mu tunywe nzi?" ²⁵ Mushe cha huweleza kwa Yahweh, imi Yahweh cha mutondeza chisamu?" Mushe chachi sohela mumenzi, imi menzi chiaba ni munati ku anywa. I bali njihona habali kubahela Yahweh milao yakutokomela, imi ibali nji hona haba baliki. ²⁶ Chati, "Haiba kamutokomele kuteka kulinzwi lya Yahweh Ileza wenu, ni kutenda zilotu mumenso akwe, imi niku teka intayelo niku kuteka milawo- Kete nimibike butuku buhi no buhi kuaniba bikite kuma Egepita, kakuli njime Yahweh yo mihoza." ²⁷ Linu bantu chibeza kwa Elimi, uko kubena mabwe akwana ikumi ni wobele a zwa menzi ni masamu enzalu ena 17. Baba tibeleli aho kumbali ni menzi.