¹ Va veeza kuyimwi imbalyi ye iwate, ku chisi cha Gerasenesi. ² Ivaati Jeeso mwa suuka vulyo mu vwaato, ku vaeeza unkosi yaa valyi ku ka zwa ku makumbu yaa veena inhuho imbilala. ³ Uuzu unkosi a vaalyi ku ikala ku makumbu. Ka heena ku va siina a va lyi ku woola ku mu woonda, nandi ku mu sumina che itewu. ⁴ Chaa a vaa sumiinwa kangi-kangi che zihaka ne itewu. Mmi a va pusulyi itewu ne ku chola zihaka. Ka kwiina yaa veena ziho zo ku mu woonda. ⁵ Masiku ne musihalyi wonse ku makumbu ne ku maruundu, a vaalyi ku lyira che lyiinzwi lyiina ku iwulu, mane naa lyi fuunda cha mavwe a cheka. ⁶ Chiinga a vona Jeeso neena chivakazana a vaa tiyiriri kwaalyi, naa ka fukama havusu vwaakwe. ⁷ Naa lyira che lyiinzwi lyina ku iwulu naati, ''Ni pange nzii chaako, Jeeso, Mwaanaswiisu we Ireeza Mu Kaando ku Vonse? Ni ku kumbira cha iiye mwiine Ireeza, siye ku ni sukulula.'' ⁸ Ka kuti a vaalyi ku mu cho kuti, ''Zwee mwaalyi, uuwe luhuho lu vilaala.'' ⁹ Naa mu vuuza kuti, ''Njo uwe ini?'' Naa mu itava kuti, ''Izina lyaanngu nje Vunngi-vunngi, ka kuti tu vanngi.'' ¹⁰ Naa mu kuumbiira kanngi-kanngi kuti kanzi a itumini kunze lye chisi. ¹¹ Lyinu ku veena muraka we ziguluve u vaalyi ku lya he iruundu, ¹² mmi ni ya mu kuumbira, kuti, ''Tu tumine ku ziguluve; mane tu injire mu zilyi''. ¹³ Naa i zuminina; inhuho imbilala ku zwa mwaalyi chi ku injira mu ziguluve, ni zaa ngombola chi ku suuka iruundu che kuu ke injira mwi iwate, ziguluve zoonse zi va ka mini mwii iwate zi vaalyi ku lyikana miyaanda i lyikana makuumi oo uvere. ¹⁴ Va vaa lyiisiiza ziguluve va va ngombolyi chi ku ka wamba ku muzi mukaando ne chisi chonse. Lyinu vantu vonse ni vaa zwa cho ku yenda kuti va ka vone chi vaa chitahalyi. ¹⁵ Ni veeza kwa Jeeso chi ku vona unkosi yaa va injiirwa vunngi vunngi vwe inhuho imbilalala, na ikeere haansi, naa zweete, mane naa kwanine mu ingana, vantu ne vaa tiya. ¹⁶ Va vaa voni chi va pangahalyiri unkosi yaa a va injiirwa inhuho imbilala va va lwiiri vamwi chi va mu pangahalyiri konse ne che ziguluve. ¹⁷ Ni vaa tannga ku mu kuumbira kuti a zwee mu chisi chaavo. ¹⁸ Ivaati cho wii injiira mu vwaato, unkosi yaa va iinjirwa inhuho imbilala naa mu kumbira kuti a yende naaye. ¹⁹ Mmi ka hena a va zuminini ichi, naa mu cho kuti, '' Kwiya ku inzuvo yaako ne ku vantu vaako, u ka va lwiire chaa ava ku chitiri Simwiine ne inse yaa ava ku fwiiri. ²⁰ Ava yeendi na ka waamba zikulu cha Jeeso zaa ava mu pangiri kwa Dikapolisi, mmi zumwi no zumwii naa komokwa. ²¹ Ivaati Jeeso chiinga a lutira ku imwi mbalyi, mu vwaato, ku veeza ikuunga ni lya mu zimbuluka, cho wiina ha imbalyi ye iwate. ²² Ku veena mukulwaana we Isinagoge, yo u suumpwa Jairasi, a veeza, chinga voona Jeeso, chi ku fuukama ha mateende akwe. ²³ Naa mu kumbiira kanngi-kanngi, kuti, ''mwaana-kazana wangu cho u fwa. Ni ku kumbiira kuti wiize njo u muviike maanza kuti a holye mane a halye.'' ²⁴ Naa yenda naye, ne ikuunga ni lya mu shaala mu masuulye ne lyi chuutiire ahulu mwaalyi ku mu zimbuluka. ²⁵ Ku veena mukulwakazi ya vaalyi kwii itiika malaha zirimo zi woonda ikuumi ne toovere. ²⁶ A vaa nyaandi ahuulu mane kulyi mu maanza e inganga ziingi naa teendesa chimwii ne chimwii cha veena nacho kuti a holye, kunze lyo kuti a ve ne mazimo malotu chizimo cho ku vihalyira ku vusu. ²⁷ Cha va zuwiire cha Jeeso. A va keeza ku masuulye akwe choo ka vu yenda hakati ke ikuunga, na gunka chizavalo chaakwe. ²⁸ Ka kulyi a va cho kuti, '' chi na gunka zizavalo zaakwe, mu ni hoolye.'' ²⁹ Chiinga mu gunka malaha a va ziimi ku itiika, naa zuuwa mu muviiri waakwe kuti cha hoozwa mu masukuluka akwe. ³⁰ Mane hoo hwaaho Jeeso na zuwa kuti inunuho chi ya zwa mwaalyi. Na chevuka mukati ke ikuunga chi ku vuza kuti, ''Njeeni wa ni gunka?'' ³¹ Varutwana vakwe ni va mu cho kuti, ''Ko u vweene ikuunga lyonse ilyi lyi ku zumbulukite, ku zwaaho u cho kuti, 'Njeni wa ni gunka?''' ³² Mmi Jeeso na lola-lola kuti a voone waa panga vulyo. ³³ Uzuu mukulwakazi che kwi iziiva cha mu pangahalyira, a va tiite mbwiiteri na chachalyika. A veeza naa wa ha vusu vwaakwe naa mu lwiira vuniti voonse. ³⁴ Naa mu cho kuti, ''Mwaanakazana, waangu kuzumina kwaako chi kwa ku hooza. Yende che ikozo mane u hozwa mu vutuku vwaako.'' ³⁵ Ivaati cho si wamba, ku veeza vantu va vaalyi ku ka zwaa ku mukulwana we Isinagoge, Ni vaati, '' Mwaana kazana wako chaa fwa. Chiinzi hoo sii kateeza muruti?'' ³⁶ Ivaati Jeeso chiinga zuwa mu va wamba vantu, a va cho muruti we Isinagoge kuti, ''Siye ku tiya. Uwee zumine vulyo. ³⁷ Ka hena a va zuminini umwii no umwii ku musindikiza, kunze lya Pitorosi, Jemusi, and Johani, mukulwa Jemusi. ³⁸ Va veeza ku inzuuvo yo mukulwana we Isinagoge naa vona vantu ni va tolyiya ahulu. Ne va lyira ne ku boonda. ³⁹ Chiinga injira mu inzuvoo, a va vacho kuti, ''chinzi chi mu sasamiisa inkulo ne ku lyira? ''Uuzu muhuire kaa fwiire mmi u lyeere.'' ⁴⁰ Va va mu seki. Mmi na zwiisikiza voonse kunze cho ku shala ne vesi ne vaanyina muhuire, ne vaa veena naavo, ni ve injira mwaa vena muhuire. ⁴¹ A vaa hindi iyaanza lyo muhuire naa mu cho kuti, ''Talitha Koum,'' ichii ku cho kuti, ''Miukazanaana ni ku cho kuti, ziime.'' ⁴² Hohwaaho muhuire naa ziima chi ku yenda (a veena zirimo zi woonda ikumi ne toovere). Ni vaa komokwa ahulu. ⁴³ A vaa wambi cho ku koza lyinzwi kuti kaanzi va lwiiri vaantu chaa pangahala. Naa va cho kuti va muhe cho kulya.