¹ Mmi hape nne njira mwi Isinagoge mu veena unkosi ya veena iyaanza lyi nyonyoveere. ² Vantu vamwi nniva chuuta ku vambana naaye ku vona kuti mwa hoze lwe Insavata ku chitira kuti woolye ku muvona mulandu. ³ Jeeso nna wamba nne unkosi we iyaanza lyi vaa nyonyoveere'', Zimee aha mukati ka vantu voonse". ⁴ Ku zwaaho nna wamba nne vantu, A kwiina kaha mulao ku panga vulotu luzuva lwe Insavata naandi ku horofaza, ku haza, naandi ku ihaya? Mmi nni va tontola. ⁵ Nna lola imbalyi zoonse nna vengete, mmi nna sasamiswa nne ku zuminina inkulo kwaavo, mane nna cho unkosi, wololye iyaanza lyaako. Nna lyi wolola, mmi iyaanza lyaakwe nni lya voola mu maziimo sakata. ⁶ Vafarasayi nni veena Heroda cho ku zwira haanze ku voona kuti va voola ku mu ihaya vulye. ⁷ Jeeso nne varutwana vaakwe, nni vaaya ku iwate, mmi ikuunga lya vantu vaangi nni lya mushaala mu masulye kuzwa kwa Ghalaliya nne kuzwa kwa Judiya ⁸ nne kuzwa kwa Idumiya mane vulyo nne ku zaamba Jorodani nne ku zimbuluka Tiyere nne Sidona. Chiinga va zuwa zintu zaa vaalyi ku waamba, vuungi vuungi vwa vantu nni vweeza kwaakwe. ⁹ Mane nna kumbiira varutwana vaakwe kuti va mu vakanyeza vwato vu niini che ivaka lya vantu vangi, ku chitira kuti saanzi va mu lyaatoolyi. ¹⁰ Ka kuti a va hoza vangi muku vaku chita kuti zumwi ne zumwi ya veena ku katazeha nna mu chuutira kuti a mu wonde. ¹¹ Kumwe nne kumwe vulyo Inhuho imbilaala kuzi valyi ku muvona, zi vaalyi ku wiira haansi ha vusu vwaakwe choku huwa, nni zicho kuti, u mwaanaswiisu we Izeera." ¹² Nna zi kalyimera kuti saanzi zi mu izivisa ku vantu. ¹³ Naaya ku iwulu lye iruundu, choku sumpa vaa vaalyi ku saka, mmi nni veeza kwaalyi. ¹⁴ Nna sala veena ikumi ne toovere (vaa vaati nna suumpa va Apositoloyi) kuti va woolye kuva naaye mane nne kuti ava tume kuka waamba mulayeza, ¹⁵ nne kuva nne ku laula koku zwiisa madimona. ¹⁶ Mmi nna sala veena ikumwe nne toovere: Sayimoni, iiye waa vaahi izina lya Pitorosi; ¹⁷ Jemusi mwanaswiisu wa Zebediya, nne Johane mwacha Jemusi, iiye waava hi izina lya Boanerigesi, lyi landununwa kuti vaana vo ku tiimba; ¹⁸ nne Enduru, Filiipi, Batholomiyu, Mateu, Toomasi, Jemusi mwanaswisu wa Alufeyaasi, Thaddaeusi, Sayimoni wee impuupu ¹⁹ nee Judaasi Isikariyota, yaa vaa keeza kuku muwuza. ²⁰ Mmi nna ya ku irapa, mmi ikuunga nni lyeeza ha mwiina, mu va vaalyi kusa woola kulyia zilyio. ²¹ Lyiinu vee irapa lyaakwe chiinga va zuwa kaha iichi, nni va yeenda kuti vaka mu hiinde, ka kuti va vaacho kuti, cha zoverwa kuzeeza.'' ²² Va ngolyi va zwa kwa Jerusalema nni vaacho kuti, " Wi njiirwa Baluzebule," mane, "U zwiisa madimona cha simwiine wa madimona." ²³ Jeeso naa va suupira kwaalyi choku wamba naavo che ingulyi naati, "Saatani u zwiisa vulye Saatani? ²⁴ Mmi haiva muvuso nni ulyi sandukira uuwo wiine, uuwo muvuso keeti chiwu ziima. ²⁵ Haiva inzuvo ilyi sandukire iiyo yiine, iiyo inzuvo keeti chiyi ziima. ²⁶ Haiva Saatani wa ziima iiye mwiine cho kulyi sandukira, keeti cho woola kulyi zimanina, mane wiizi cha a sika ha kumana. ²⁷ Mane ka kwiina yo woola ku injira mu inzuvo yo unkosi yo kolyete choku yiva zivyia zaakwe kwanda kuti a sumine yoo yoozu mukwaame piri, mmi ku zwaaho nje cha woola kuiva. ²⁸ Cho vusakusima nni mulwiirite, zivi zoonse kazi wonderwa vaana va vantu, mane nne kutukana koonse kuva tukana, ²⁹ mmi zumwe ne zumwe yeeti nna tuke luhuho lu jolola keeti na wonderwa, mmi wiina mulaandu we chivi chi saa mani." ³⁰ Jeeso nna wamba vuti ka kuti va vaalyi kucho kuti wiina luhuho luvilaala." ³¹ Mmi lyiinu va nyina nne va mukulwe nni veeza ku ziima haanze. Nni va tuminina vantu, kuti vaka mu suumpe. ³² Mmi nni kwaava nna zimbulukitwa vantu vaangi, vava mucho kuti, "Va nyoko nne va mukulwaako veena haanze, mane keete vaku ghana." ³³ Mmi nna ve tava kuti va mayo nne va mukulwaango nja vahi? ³⁴ Na lola ikuunga lyiva mu zimbulukite cho kucho kuti, "Vone, aava nje va mmayo nne va mukulwaangu! ³⁵ Mmi lyiinu zumwe nne zumwe yoo panga ku suna kwe Ireeza, uuzo muntu nje mwaachaangu, nne nchiishjaangu, nne va mmayo."