¹ Chiku vaa sii sheere mazuva oovere ku mukiti wo Kuzambuluka nni we chiinkwa chi saa viriiswa. Vapurita va kulwaana nne vangolyi va va ku nahana mweeti chiva woonda Jeeso choku naantira mane choku mu ihaya. ² Ka kuti va vaalyi kucho kuti, "Nanta che inako yo mukiti, ku chitira kuti saanzi kuvi nne mukuvukuvu mukati ka vantu" ³ Yi vaati Jeeso cho wiina kwa Bethani, mu inzuvo ya Sayimoni we chiseenda, nna a lyighonkete he itafulye, mukulwaakazi nne iza kwaalyi nna kweete inkooma ya mafuta a vaalyi ku dura, a vaa chititwa che naradi yoo yoona. Nna pwachula inkooma cho kuyi mu itira mu mutwi. ⁴ Mmi nni kwaava vamwi vava nyeerwa. Nni valyi waamba nni vacho kuti, "Ivaka lyo kusiinya vuti nje lyihi? ⁵ A a mafuta nni a va wuzwa cha malyi a lyikana miyaanda yoo tatwe, ku zwaaho cho kuha vahumanehi." Mmi nni va mu lwiisa. ⁶ Mmi Jeeso nnaacho kuti, "Mumu siye yee yeena. Mu mu katalyeeza iinzi? Wa nni chitira chintu chilotu. ⁷ Vahumanegi wmiina nnaavo inako zoonse, mmi ha musaka ku vatusa mumu ku vatusa, mmi imme keeti mu kwiina naame inako zoonse. ⁸ Wa chiita cha woola ku chiita: wa siinga muviri wangu nna wu vakanyeza ku wuungwa. ⁹ Cho vusakusima nni mulwiirite, kumwi nne kumwi uuwu mulaeza kweeti nniwu ka kutazwa mu inkaanda yoonse, uuzu mukulwaakazi cha chaa chita kachi ku waambwa, mu ku mu kumbulukwa." ¹⁰ Mmi Judasi Isikariyota, zumwi waavo veena ikumi nne toovere, cho kuzwa cho kuya ku varuti vakulwaana ku ghana inzira yoku mu vaha. ¹¹ Mmi vapurisita vakulwaana chiinga vaa zuwa vulyo, nni va saanga choku mu sepisa malyi. Nna taanga ku ghana inzira yo kuti a woonde Jeeso choku mu vaha. ¹² Mu luzuuva lwee ntani lwe chiinkwa chi saa viriiswa, chiva chita chitavero che Imbereere yoku Zambuluka, varutwana vaakwe nni va mucho kuti, "U saka kuti tuka vakanyeza kuhi zilyio zoku Zambuluka?" ¹³ Nna tuma varutwana vaakwe voovere nna vacho kuti, "Mu injire mukati ko muzi, mumu vone unkosi yo ulyi twiikite iyeemere lya menzi mwaa kopane nnaanwe. Mu mu shaalye mu masulye. ¹⁴ Che njiira mu inzuvo, mu mu ichirire mukati cho kucho si inzuvo, "Muruti u cho kuti, "Inzuvo yaangu ya masikiro yiina kuhi kweeti nni lyiire zilyio zo ku Zambuluka nne varutwana vaangu?"' ¹⁵ Mwa a ka mutoondeza inzuvo yiina ku iwulu yiina chimwi nne chimwi. Mu katu vaakanyereza koo kooko.'' ¹⁶ Varutwana nni vaa zwa cho kuya mu muzi. Nni va ka waana chmwi ne chimwi chi viikitwa mwaa va vacho, mmi nni vaa vaakanyeza zilyio zo ku Zambuluka hoo hwaaho. ¹⁷ Ivaati chi kuva chiitengwana, nne iza nni veena ikumi nne voovere. ¹⁸ Chiva sii kosi he itaafulye nni va kweete valyia, Jeeso nnaacho kuti, "Cho vusakumasima nni mulwiirite, zumwi weenu yoo kweete u lyia naame mwaa nni wuza." ¹⁹ Voonse choku zuwa vutuku, ku zwaaho zumwi nne zumwi waavo choku tanga nni va mucho kuti, "Ah ka heena iime toota?" ²⁰ Jeeso naave tava nna vacho kuti, "Nje zumwi wa veena ikumi nne toovere, yo kweete u suunsa chiinkwa naame mu kasuva ha hanu. ²¹ Ka kuti Mwaana wo Muntu mwa yeende che inzira ya mangolo mu a waambite ka haakwe. Mmi kwaalyi iiye yoo wuza Mwaana wo Muntu kaku kwiina vumayi! Kuva mu shiyameere kalyi nna sana a vaa zaalwa.'' ²² Chiva vaalyi ku sii lyia, Jeeso nna hiinda chiinkwa, nna chiha mikoonde cho kuchi ghamoona. Choku vaha nna vacho kuti, "Mu hinde iichi. Uuwu ngo muviri waangu." ²³ Nna hiinda inkomoki, cho kulyi tumeresa, choku vaha, mmi nni va nywa mwa teni voonse. ²⁴ Nna vaacho kuti, "Ichi nje malaha aangu oku zuminzaana, malaha e itirirwa vaangi. ²⁵ Cho vusakusiima nni mulwiirite, keeti nni nni voolye nni nywe iichi chihaantu cho muwoomba mbwiita mwe lyina izuva chinni nnaati chinni chinywa chihiya mu muvuso we Ireeza." ²⁶ Chiinga vaa mana ku zimba luzimbo, vava yeendi ku iruundu lye ziteente. ²⁷ Jeeso nna vacho kuti, "Mu voonse mwiina hanu mu mu nni tiyire, mu kuti ku ngolyetwa, 'Kani dame mulyisani mmi imbereere kazi hasaane.' ²⁸ Mmi chinni nna vuuswa, ka nni yeendere kuvusu vweenu kwa Galaleya." ²⁹ Pitorosi choku mucho kuti, "Nangati voonse kava ku tiyire, imme keeti nni nni kutiyire." ³⁰ Jeeso nna mucho kuti, "Nni ku lyira vusakusiima kuti, masiku a suunu, mukoombwe nni wu seeni kulyira koovere, mo u kulyi nni sampwiire kootatwe." ³¹ Mmi Pitorosi nnaacho kuti, "Cho kuti nni lukera kufwa naawe, keeti chinni kulyi sampula." Vonse nni va sepisa muku swana. ³² Nni ve iiza ku chivaka chi sumpwa Gethesemani, mmi Jeeso cho kucho varutwana vaakwe kuti, "Mu ikalye aha chinni si karapera." ³³ Nna hiinda Pitorosi, Jemusi nne Johani choku yeenda naavo mmi nna taanga ku katazeha mu luhuho lwaakwe a hulu. ³⁴ Choku vacho kuti, "Nni zuwiire vutuku a hulu mu luhuho lwaangu, mu nni woola kufwa. Mu shaalye aha mane malyiisa.'' ³⁵ Jeeso nna chuutira ha vusuzana, choku wiira haansi, mmi nna rapera kuti cho kuti ku woolyeka, ichi chivaka chi zwiiswa kwaalyi. ³⁶ Nnacho kuti, "Abba, Ita, zintu zoonse zi woolyeka kweenu. Mu zwiise iyi inkomoki kwaangu. Mmi nni yi saalyi choku suna kwaangu mmi ive choku suka kwaako." ³⁷ Cho u voola ku valyi a vava waani chi va lyeere, mmi nnacho Pitorosi kuti, "Sayimoni, u lyeere?" Ko woolyi ku yiiza luvaka lu mwiina?" ³⁸ Mulyiisa nne ku rapera kuti sanzi mu injiri mu mulyiko. Luhuho lu taveere, mmi muviri u suntikite." ³⁹ Ku zwaaho nna voola hape kuku karapera, nna voolyera manzwi a swana. ⁴⁰ Mmi hape neeza kuva waana va lyeere, ka kuti menso aavo a vaalyi ku lyema mane nni va seezi kuti muva mu tiinzi. ⁴¹ Nne iza lo vuutatu mmi nna vacho kuti, "Mu sii lyeere nne kulyi teeka? Chi kwe injiha! Chivaka chi chaa sika! Mu vone! Mwaana wo Muntu u kweete u wuzikizwa vaheedane. ⁴² Mu ziime, tuyende. Mu lolye, yoo kweete u ni wuza wiina hafwihi." ⁴³ Cha ava sii kweete ku waamba, Judaasi, umwi waavo va veena ikumi nne toovere, choku sika, mmi chiinavuungi cha vantu kuzwa mu vapurisita vakulwaana, vangolyi nne vakulwaana vava kweete masaavulye nne milyiinga nne inkolyi. ⁴⁴ Mmi muwuzi waakwe cha vava heere chishupo cho kuti, "Weeti nni xhoote, njeeye. Mu muwoonde mane choku muhiinda cho kutokomera a hulu.'' ⁴⁵ Judasi chiinga sika, a va hitiriri kwa Jeeso choku mucho kuti, "Muruti!" Ku zwaaho nna mu xhoota. ⁴⁶ Nni va mu woonda cha maanza choku mu hiinda. ⁴⁷ Zumwi waavo a vaa ziimeene he imbalyi nna zwiisa isaavulye yaakwe choku kanka muhikaana wo mupurisita mukulwaana choku mu kosola kutwi. ⁴⁸ Jeeso choku vacho kuti, "Muni iziriire mane iiri mu keeza kuku woonda musa, cha masaavulye nne inkolyi kuku nni woonda? ⁴⁹ Nni va kuzuza naanwe, nni nni ruta mu itempere, nni mu sa nni woondi. Mmi iichi chi va chitahalyiri kuti mangolo e izuzirizwa." ⁵⁰ Mmi voonse va veena nne Jeeso choku mu siya choku ngombola. ⁵¹ Muswiisuzana, a vaa zweete ijira vulyo lya vaalyi vungiite chaalyo, a vaa sheere Jeeso mu masulye. Vakwaame chiinga va mu woonda ⁵² nna zwa mu ijira lyaakwe hoo hwaaho choku ngombola nna saa zweete. ⁵³ Nni vaa twaala Jeeso ku mupurisita mukaando. Ku vaa kunganeere vapurisita vakulwaana, vakulwaana, nne vangolyi. ⁵⁴ Lyiinu Pitorosi a vaa shalyiire ku masulye neena kulyezana, vulye vulyikana nne ku inzuvo yo mupurisita mukaando. Nne ikeere ha vashaangavira, va vaa zootete mulyiro. ⁵⁵ Lyiinu vapurisita vakulwaana nne vu ziwululyi voonse vwa Vajuda nni vaava ku sakira Jeeso indava kuti va woolye ku mu ihayire ha teni. Mmi nni vaa vula mane nnaangati indava yii mwiina. ⁵⁶ Mmi vaangi vantu nni va lyika ku lyeeta indava za mapa zoku muhambiriza, ku zwaaho indava zaavo nni zaava nni zi saa zumiinzaani. ⁵⁷ Vamwi va vaa ziimi choku muhambiriza indava za mapa, nni vacho kuti, ⁵⁸ "Tuva muzuwi naata kuti, 'kani sinya iyi iteempere yi vaa chitwa cha maanza, mmi mu mazuva ootatwe kani zaake yimwe yi saa zaakwa cha mayaanza.''' ⁵⁹ Nni ha kuva vulyo ku hambiriza kwaavo nni kwa vula ku zumiinzaana. ⁶⁰ Mupurisita mukulwaana nna ziima mukati kaavo choku vuuza Jeeso, ''Aa ka wi itavi? Zinzi iizi ziva kweete vaku hambiriza aava vakwaame?'' ⁶¹ Mmi iiye a valyi toontoza nna vula ku itava. Hape mupurisita mukulwaana nna mu vuuza naati, "Aa njoowe Kirisiti, mwaanaswiisu wa yoo wiina mikoonde?'' ⁶² Jeeso nnacho kuti, "Njeeme. Mmi ka muvone Mwaana wo Muntu cho wii keere ku iyaanza lya malyo lye ziiho mane nna keeza cha makope e iwulu.'' ⁶³ Mupurisita mukulwaana choku haloola zizwaato zaakwe cho kucho kuti, "Aa tu sii saka vapaki? ⁶⁴ Chi mwaa zuwa matuka oonse. Lyiinu mu tinzi?" Mmi nni va zumiinzaana voonse kuti u lukera ku ihayiwa. ⁶⁵ Vamwi nni vaa taanga kumu swiira mate, mane nne ku mu wuumba vusu vwaakwe choku mukava ku zwaaho choku mucho kuti, "Porofite!" Vaveresi choku muhiinda choku mukava. ⁶⁶ Ivaati Pitorosi, nna siina mu irapa lyiina haansi, zunwe wa vahikaana kazana wo mupurisita mukulwaana neeza kwaalyi. ⁶⁷ Nna vona Pitorosi nna zimeene ha mulyiro nna zootete, mmi nna mu chuutira choku mu lola nenza. Choku mucho kuti, "Naawe saka wiina nne Jeeso, wo Munazareta.'' ⁶⁸ Mmi iiye nna alyi saampula, nnaati, "Ka niizi mane nne ku taluhanya kuti u kweete u waamba ka hechi." Ku zwaaho nna zwa choku injira mu irapa. ⁶⁹ Mmi muhikaana kazana choku mu vona, choku taanga kucho vava ziimeene aho, "Uzu nkosi nje zumwi waavo!" ⁷⁰ Mmi iiye nna alyi saampula hape. Ka vakazana vulyo hape nnaavo aavo vava ziimmee hoo hwaaho nni vaacho Pitorosi kuti, cho vusakusima u mwiina Galaleya.'' ⁷¹ Mmi choku taanga kulyi fwiiza nne kulyi koonka, ''Ka nni mwiizi uzu nkosi umu kweete mu wamba ka haakwe" ⁷² Mukoombwe hoo hwaavo vulyo choku lyira lo vuuveri. Lyiinu Pitorosi choku kumbulukwa manzwi a Jeeso aava waambi nnaaye: "Piri mukoombwe nni wu seeni kulyira koovere, ko u kulyi nni saampwiire koo taatwe." Mmi nna zuwa vutuku a hulu mane choku taanga kulyira.