¹ Lyiinu Jeeso nna taanga ku va ruta che milya. Naa cho kuti, "Mukwaame a va viaalyi iwa lyo muwoomba cho kulyi zaakiriza, cho kusa iriindi ha kamwiinwa muwoomba. A vaa zaaki inzuvo yiina he iwulu, cho kulyi walyima valyimi. Ku zwaaho choku yeenda mu musipiri. ² Che inako isheyeme nna ka tumina muhikaana ku va tokumeri ve iwa kuiiza ku hiinda zihantu zo muluwa. ³ Mmi vava mu hiindi, choku mukava nni va mu tumina kwaa kazwa, naasa kweete chiintu. ⁴ Hape nna va tumina muhikaana zumwi, u va va horofaza naaye mu mutwi mane choku mu fwiisa insoni. ⁵ Choku tumina zumwi hape uva ve ihayi. Vava chiti vangi che nzira yi swana, ku horofaza vamwi mane cho ku ihaya vamwi. ⁶ A veena zumwi muntu ya vaa si sheere kuti a mutume, mwaanaswiisu waakwe yoo sunitwa. A vaalyi njeeye wa mamanimani ku mutuma ku valyi. Naa cho kuti, ''Mu va ka mukuteke.'' ⁷ Mmi valyimi vo muwoomba nni va waambinsaana kuti, "Uuzu njeeye swaana. Mu iize, tu mu ihaye, ku zwaaho vuswa muvu ku veere vweetu." ⁸ Vava mu woondi choku mu ihaya, choku mu sohera haanzi lye iwa. ⁹ Lyiinu, si iwa kaa chiti vulye? Keeze choku sinya voonse va tukumeere luwa ku zwaaho choku luha vamwi. ¹⁰ Ka heena mu va valyi iilyi ingolo? "Ivwe lyi vava kaani vazaakisi, njilyi vaavi ivwe lyoku zaakira. ¹¹ Iichi chi vaalyi ku zwa kwa Simwiine mane chi komosa mu menso eetu." ¹² Nni vaa saka mu va woola ku woonda Jeeso, mmi choku tiya vuungi vwa vantu, ka kuti va vee zivi kuti koto u va guviriza. Ku zwaaho mpu va mu siyiire cho kulyi yeendera. ¹³ Mmi lyiinu nni vaa tumina Vafarasayi nni veena Heroda kwaalyi kuti vaka mu woonde cha manzwi. ¹⁴ Chiinga vaa sika, choku mucho kuti, ''Muruti, twiizi kuti ku wiina indava ne muntu mwa lolyera zintu, mane ko salululyi vantu. U ruta cho vusakusima inzira ye Ireeza. Kwiina mulandu ku ruwera mutero kwa Kaishara nandii? Tu ruwere nandi tu siye?'' ¹⁵ Mmi Jeeso nne ziva kulyi lyanganya kwaavo choku vacho kuti, ''Chiinzi ha mu ni lyika? Mu nihe malyi kuti nni woolye ku a vona.'' ¹⁶ Nni vaa lyeeta amwe kwa Jeeso. Choku vacho kuti, ''Chiswaniso nne izina lyaani iizi? Nni vaacho kuti, '' Nji za Kaishara.'' ¹⁷ Jeeso naacho kuti,'' Muhe Kaishara za Kaishara, Ireeza zee Ireeza.'' va va mu komokerwa. ¹⁸ Lyiinu Vasadukayi vacho kuti ka kwiina ku vuuka mu vafu, nni veeza kwaalyi. Nni va mu vuuza nni vati, ¹⁹ "Muruti, Mushe a va tu ngulyeri, 'cho kuti mukulwa muntu waa fwa choku siya mukulwaakazi, nni ku seena mwaana, a hiindi muihaavo wo mwaanche,choku zaalyira mukulwe vaana.' ²⁰ I vaalyi vaanaswiisu va mana iyaanza nne voovere, we ntanzi a va hiindi mukulwakazi choku fwa naa seena mwaana, ²¹ zumwi wo vuuveri a va mu hiindi naaye choku fwa naa seena vaana, wo vuutatu naaye. ²² "Veena ku mana iyaanza nne toovere nni vula ku woonda vahwiire. Ku masulye aavo voonse mukulwaakazi naaye choku fwa. ²³ Mu ku vuuka kwa vafu, chiva vuuka hape, kaa ku veere mukaani? Ka kuti aava vaanaswiisu voonse va va musesi.'' ²⁴ Jeeso naacho kuti, "Ka njo vuti chiingi mu fosa, ka kuti kamwiizi iviivere nne ziho ze Ireeza? ²⁵ Chini vaa vuuka mu vafu, ka kwiina ku seswa nne ku sesa, mmi chiva swana nne mangiloyi ku iwulu. ²⁶ Mmi cho kuya chava fwiire nne ku vuuswa kwaavo, a ka mwiini kuvala mu ivuuka ya Mushe, che indava ye chivuna, ne kuti Ireeza ava waambi kuti, 'Njeeme Ireeza wa Aburahama, nne Ireeza wa Isaka mane nne Ireeza wa Jaakovo'? ²⁷ Ka heena Ireeza wa va fwiire, mmi nje Ireeza wava hala. Mu foseeza.'' ²⁸ Zumwi wa vangolyi nne za ku zuwa ziva vaalyi ku waamba; nna vona kuti Jeeso we itava nenza. Nna mu vuuza kuti, "Njo wuhi mulao o zamba imwi?" ²⁹ Jeeso avee tavi kuti, "Chiina musula njo kuti, 'Zuwe, Isiraere, Simwiine Ireeza weetu, Simwiine u mwiina. ³⁰ U lukeere ku suna Simwiine Ireeza che inkulo yaako yoonse, cho luhuho lwaako loonse, muhupulo waanko woonse, nne che ziho zaako zoonse. ³¹ Wo vuuveri mulao njo uuwu, U lukeere ku suna muntu kuninaako mmo ulyi suniine.' Ka kwiina umwi mulao hape ku zaamba iiyi yoo vere. ³² Mungolyi nnacho kuti, "Muruti, Yoo shiyeeme! wa waamba cho vusakusima kuti Ireeza u mwiina, mane nne kuti ka kwiina Ireeza zumwe kunze lyaakwe. ³³ Ku mu suna che inkulo yoonse yaako, cho muhupulo nne ziho zoonse. Nne ku suna zumwe siina mmo ulye suni, ku zaamba ineo zoku hiisha nne zitavero zoku hiisha." ³⁴ Jeeso chiinga vona kuti we itava nenza ipuzo, nna mucho kuti, Ka wiina kulye nee muvuso we Ireeza.'' Chiinga kwaa zwaaho, ka kwiina zumwi hape a vaati nna alyi zuwa ku mu vuuza ipuzo. ³⁵ Jeeso nne itava vuti, chaa vaalyi ku kweete ku ruta mu itempere; nnaati, Chiinze vangolyi ha vacho kuti Kiristi mwaanaswiisu wa Daafita? ³⁶ Daafita iiye mwiine, mo luhuhu lu julola, a vaacho kuti, Simwiine ava waambi nne Simwiine waangu, wu ikalye ku iyaanza lyaangu lya malyo, mbwiita chi naa chita zira zaaku hoo tenteka matende. ³⁷ Daafita u mu suumpa 'Simwiine,' lyiinu vulye kuti Kirisiti a suumpwe mwaanaswiisu wa Daafita?" Chiinavungi cha vantu nni cha mu teekereza choku saanga. ³⁸ Mu ituto zaakwe Jeeso a vaacho kuti, "Mutiye va vangolyi va yeenda nni va zweete zizavalo zilye nne ku saka ku rumereswa mu misika ³⁹ Nne ku saka ku ikala mu meekalo eena ha vusu mu masinagoge, nne ku ikala mu zivaka za maziimo mu mikiti. ⁴⁰ Va ziyeza va fwiirwa mu mazuvo aavo, mane va rapera itapero inde kuti vantu va va vone. Aava vakwaame ka va taambulye ku nyaanswa ku kaando." ⁴¹ Mmi Jeeso nne ikala haansi ku vambana nne iputukesi lya malyi mu itempere, avaa lolyereere vantu chiva viika malyi mu iputukesi. Vantu vaangi vava humine nni va viika malyi maangi. ⁴² Mmi fwiirwa wo mukulwaakazi wo muhumanehi nne iza cho kuiiza ku newula malyi aakwe oovere, a lyikana ipeeni. ⁴³ Mane ava suumpi varutwa vaakwi choku vacho kuti, ''Cho vusakusima nni mulwiirite, uuzu mukulwaakazi wo muhunanehi waa zwiisa malyi a zaamba a voonse aava vaa zwiisa mu iputukesi lyi zwiisikizwa. ⁴⁴ Ka kuti voonse vaavo vava zwiisa chukuya muvu humiine. Mmi uzu mufwiirwa woo mukolwaakazi a vaa zwiisa kuzwa mu vuhumanehi vwaakwe, choku viika malyi aakwe oonse aava viikite vuhalo vwaakwe ha teni.''