¹ hwaaho chi va valyi ku keeza kwa Jerusalema, nni veena ha fwihi nne Bethiphage, nne Bethani ku iruundu lye ziteente, mane Jeeso avaa tumi varutwana vaakwe voo veere, ² mane nna vacho kuti, "Mukwiya ku muzi utu lyolyinzeene naawo. Mu muti chi mu injira mu ulyi, mu mu kawaane kadonkaana ka seeni ku taantwa. Mu kaka sumunune mu kalyeete kwaangu. ³ Mane cho kuti zumwi u mucho kuti, ´´Chiinzi ha mu chita vuti?' Mucho kuti, ´Simwiine wuyi saka, mane mwaa kayi vooza."' ⁴ Nni va yeenda choku ka waana kadonkaana nni ka sumiinwa haanze lye inzirazana yii wukite, mmi nni va ka sumununa, ⁵ Mane vantu vamwi vava zimeenee nni vaacho kuti, ''Mu kweete ku chita nzi, hamu sumununa kadonkaana?'' ⁶ Nni vava lwiira siina Jeeso mwaa ka vacho, mmi vantu nni vava siya cho kulyi yeendera mu inzira yaavo. ⁷ Varutwana voo vere va Jeeso vava ka lyeeti kadonkaana choku sohera he iwulu lya teni zizavalo zaavo kuti Jeeso a kee chire. ⁸ chiina vunngi nni chaa zala zizwato zaavo mu inzira, mane vamwi nni va zalyira tu tavi mu inkaanda. ⁹ Aavo va vaalyi kuya vu yeenda ha vusu nni ha masulye aakwe nni vaa sumpwirira, ''Hosana! Ku sehuuhere iyee yo wiza mu izina lya semwine Ireeza. ¹⁰ Kwiina mukoonde ku muvuso we isheetu Daafita! Hosana mu iwulu!'' ¹¹ Jeeso a vaati cho wi injira mwa Jerusalema nna ke injira mu itempere choku taanga nna kweete u lola chimwe nne chimwe mukati kaayo yoonse. Che ivaka lyo kucho kuti, inako chiyi va va siyite, nna zwaaho nne veena ikumi nne voovere vaakwe cho kuya ku muuzi wa Bethani. ¹² Mu izuva lyi chirira, chiva ka voolyete kwa Bethani, a vaa fwi inzala. ¹³ Mane a vaati choo lola ha vusu choku vona chisamu che ikuzu chi veena makova, mmi naaya ku ku vuna kuti aa chiinna zihaantu. mmi nna ka waana kuti ka chiina zihaantu makova vulyo, ka kuti ka heena yi vaalyi inako ya makuzu. ¹⁴ Nna a lyi cho kuti, ''Ka kwiina yeeti nna voolye a lyie zihaantu mwaako hape.'' Varutwana vaakwe choku mu zuwa. ¹⁵ Mmi nna sika mwa Jerusalema, nne ku injira mu itempere choku taanga nna hindika va wula nne va wuza mu itempere. Nn wiisa mataafulye ava vaalyi ku wuza malyi mane nne zipura zaavo va vaalyi ku wuzaanga inkwirimba. ¹⁶ Mmi naa vula ku va zuminina kuti vazwe nne ziva vaalyi ku wuza. ¹⁷ Mmi nna va ruta nna acho kuti, ''Aa ka ku ngolyetwa kuti inzuvo yaangu ka ive inzuvo ye itapero ya vantu ve inkaanda yoonse? Mmi unwe mu vayi pangi ireendi lya vasa. ¹⁸ Mmi vapurisita vakulwaana nne vangolyi va va mu teekete kuti wa wamba kutinzi, mmi nni vaa saka inzira yoku mu ihaya. Nni va mu tiya ka kuti vantu voonse va va komweeswa ituto zaakwe. ¹⁹ Mmi yi vaalyi kuti mu chitengwaana chimwe nne chimwe hachi sika, va vaalyi ku zwaanga mu muzi mukaando. ²⁰ Va vaati chiva hita ha kusasani, nni vaa vona isamu lye ikuzu nni lyi nyaaniine kuya ku mihisi yaalyo. ²¹ Pitorosi naa kumbulukwa nna acho kuti, ''Muruti, vone! Isamu lye ikuzu lyo u vaa kuti lyi vaa nyaani.'' ²² Jeeso naa vee itava, ''Muve nne itumero mwe Ireeza. ²³ Cho vusakusima nni mulwiira kuti inni kamba inni yeeti naacho iilyi iruundu kuti, 'nyukuke ahoo uye mu iwate mmi naa saa nyaansa mu inkulo yaakwe mmi choku zumina kuti chaa waamba kachi pangahalye, iicho Ireeza ncheeti nna pange. ²⁴ Lyiinu nni mulwiira kuti: chimwe nne chimwe chi mu raperera nne ku kuumbira ka mu chi heewa mane ka chive cheenu. ²⁵ Chi mu ziima nni murapera, mu lukeere ku woondera vamwi naanwe kuti isheeno wiina ku iwulu a mu woondere zivi zeenu naanwe. ²⁶ Cho kuti ka mu woonderi vamwi, nne isheenu wiina ku iwulu naaye keeti nna mu woondere zive zeenu.'' ²⁷ Nni va ka voola haape kwa Jerusalema. Jeeso a vaati choo kaya vu yeenda mu iteempere vapurisita vakulwana nne vangolyi nne vahitizi va veeza kwaalyi. ²⁸ Nni va mucho kuti, '' U va heewa nne iini kulawula nne ku pannga iizi zintu? Mane yaava kuhi ku lawula njeeni?'' ²⁹ Jeeso nna vacho kuti, ''Muni mu vuuza ipuzo, yi mwiina. Muni lwiire naame muni mulwiire itayero yini chita chaayo iizi zintu. ³⁰ Ikolovezo ya Johani yi vaalyi kuzwaa ku iwulu nandi mu vantu? muni itave.'' ³¹ Mmi nni va wambisana mukati kaavu nni valyi cho kuti, ''Chi twa acho kuti, a vaalyi kuzwa ku iwulu, mbwa acho kuti chiinzi ha mu seena mu va mu zumini?' ³² Mmi chi twa acho kuti, a vaalyi kuzwa mu vantu,'...''mmi nni va tiya vuungi vwa vantu ka kuti vantu va veezi kuti Johane muporofita. ³³ Mmi nni ve itava Jeeso kuti, ''Ka twIizi. ''Mmi Jeeso naa vacho kuti, ''Nnaame keeti nni mulwiire itayero yini chita chaayo iizi zintu.''