¹ Anu nje mataangiro a manzwi malotu a Jeeso Kresete, Mwana we Ireeza. ² Sina mu ku ngolyetwa mwi ingolo lyo muporofiti Isaya, "Vone, Ni tumiisa muyenzi we lyinzwi ha vusu vwaako, yeeti a ku shiyamiseza inzira. ³ Lyinzwi lyaakwe yoo usumpa neena mu muzuka, " Mu shiyamisa inzira ya Simwiine, mu tamalaza inzira zaakwe." ⁴ Johani a veeza, naa koloveza mu muzuka mane ne ku kutaza che ikolovezo yo ku siya zivilala ne ku wonderwa kwe zivi. ⁵ Chisi chonse cha Judea ne vantu vonse va Jerusalema va va zwiiri kwaalyi. Va vaa kolovezwa naaye mu lwiizi lwa Jorodane, ne va lyi wamba zivi zaavo. ⁶ Johani a vaa zweete uvaaki wo vooza vwe ikaamera naa lyi sumiine ibanti lye chikavi mu imunda mane naa lya impanse ne vuuchi vo muzuka. ⁷ A va wambiri kwii wulu naati, "Ku keeza mukaando kwaangu,u ni saa lyikene mane ne ku chuntama kuti ni sumunune tukwere twe insangu zaakwe. ⁸ Ime ni va mu koloveza cha menzi, lyinu iye ukeeza ku mu koloveza che Luhuho lu Jolola. ⁹ Mwaawo mazuva ni kwa chitahala kuti Jeeso a ka zwe kwa Nazareta mwa Ghalaliya neeza ku kolovezwa ne Johani mu lwiizi lwa Jorodani. ¹⁰ Jeeso choo zwa mu menzi, ava voni iwulu lyii iwuka mane ne Luhuho ni lu sukira mwaalyi ni lwiina mu chiswano che inkuva. ¹¹ Lyinzwi ni lyaazwa mu iwulu, "U Mwaanaswiisu Waangu yoo sunitwa. Ni saanga ahulu mwaako." ¹² Ku zwaaho Luhuho ni lwa mu kwiitira mu muzuka. ¹³ A veena mu muzuka makumi oo nne a mazuva, naa lyikwa ne Saatani. Mu muzuka a veena ne zinyolozi ze inkanda, mane mangiloyi ni va mu tendera. ¹⁴ Lyinu Johani (wo ku koloveza) chiinga wondwa, Jeeso a veeza mwa Ghalaliya naa wambira kwii iwulu manzwi-malotu e Ireeza, ¹⁵ mane naati "Inako chi yee izuzirikizwa, mane ne muvuso we Ireeza wiina ha fwihi. Musiye zivilala mu zumine manzwi a jolola." ¹⁶ Mu ku yeenda he mbalyi -e iwate lya Ghalaliya,naa vona Sayimoni ne Enduru mwanchaa Sayimoni ne va sohera tunyandi twaavo mu iwate, mukuti va vaalyi vayambisi. ¹⁷ Jeeso naa vacho kuti, "Mwiize, mu ni ichirire, mane mu ni mu chite vawoonzi va vantu." ¹⁸ Mane ho hwaaho, va vaa siyi tunyandi twaavo che ku mu ichirira. ¹⁹ Mu ku yendendera havusuzana, Jeeso a vaa voni Jemusi mwaana a Zebediya ne mwanche Johani, ni va wandera tunyandi mu vwaato. ²⁰ Ava va sumpi mane ni vaa siya Ishaavo Zebediya ne vahikaana vaavo mu vwaato, aa vo che ku mu ichirira. ²¹ Va vee njiri mwa Kaperaname, ku zwaa a ho lwe Insavata Jeeso ne njira mwi Isinagoge che ku ruta. ²² Va vaa komokerwa murutiro waakwe,mukuti a vaalyi ku va ruta sine iri muntu we chizimo chii- na he iwulu ku zamba varuti vakaando vo mulawo we chiJuda. ²³ Mane ho hwaaho mukwaame mwii Isinagoge yaavo a veena luhuho lu sa jololyi a vaa lyiriri ku iwulu, ²⁴ naati, ´´Tu chite nzi chaako,Jeeso wa Nazaretha? U ke izirire ku tumanininisa? Ni kwiizi, Njoowe yoo Ujolola we Ireeza!" ²⁵ Jeeso a va kalyimeri idimona naati, ''Tontolye u zwe mwaalyi!'' ²⁶ Luhuho lo sa jololyi ni lwa mu sohera hansi chi ku zwa mwaalyi ni lu lyira che lyinzwi lyi na ku iwulu. ²⁷ Vantu vonse ni vaa komokwa, mane ne ku lyi vuuza mukati kaavo ni vaati, "Chintunzi ichi? Ituto inhya ya maziimo ena he iwulu? U kalyimera inhuho imbilala mane zi mu teeka!" ²⁸ Lyinu lyinzwi ka haakwe nchi lya zuweeka mu chisi chonse che nkanda ya Ghalaliya. ²⁹ Chiinga vaazwa mwi Isinagoge, va veeza kuinjira mu inzuvo ya Sayimoni ne Enduru ni veena ne Jemusi ne Johani. ³⁰ Nnyina-zala-a-Sayimoni a vaa lyeere naa lwaala ifiiva, Jeeso naa lwiirwa chaakwe. ³¹ A veeza, cho ku mu wonda che iyanza, cho ku mu vuusa; ifiiva che ku zwa mwaalyi, mane naa taanga ku va yumbula. ³² Ulo luzuva chitegwana ,izuva ha lye imina, nchi vaa lyeta valwere kwaalyi ne va ve njirwa inhuho za madimona. ³³ Muzi -mukaando onse u veeza ku kungana ha mulyaango. ³⁴ A va siriki vunnginngi vwa vantu va matuku a siyenesiyeni ne ku zwisa madimona mu valyi, mmi cho ku saa zuminina madimona kuti a wambe mukuti a va mwiizi. ³⁵ Ha kusasani ahulu, kusiri ku luunza, a vaa zwiiri ku seena vantu cho ku ka chencherera kwa teni. ³⁶ Sayimoni ne vamwi vaa veena naavo che ku taanga ku mu saka. ³⁷ Chinga va mu wana cho ku mu cho kuti, ''Umwi ne umwi u ka vu ku saka." ³⁸ A vaa wambi naati, ''Tu yendere ku mizi i tu vaambene naayo, ni ka hase lyinzwi kwa teni. Nje musevezi u va ni lyeeti hanu''. ³⁹ A va yendendi konse konse mwa Ghalaliya, naa kaya vu hasa lyinzwi mu ma Sinagoge aa vo ne ku zwisa inhuho za madimona mu valyi. ⁴⁰ Mulweere we chiseenda a veeza kwaalyi. Naa fuukama naa mu kuumbira nati ''Chokuti ku suna kwaako, u woola kuni joloza." ⁴¹ Cho ku mu fwira inse, Jeeso naa wolola iyanza lyaakwe che ku mu wonda naati, "Ni saka,Jololye." ⁴² Ho hwaaho vulyo chiseenda cho ku zwa mwaalyi mane naa jolola. ⁴³ Jeeso naa mu lwiiririra cho ku koza mmi naa mu hulula kuti a yende. ⁴⁴ Naa mu cho kuti "Sanzi noo ka lwiiri vantu, mmi yende, u ka lyi tondeza ku mupurisiti mane ne ku ka zwisa ineo yo ku jolozwa kwaako kuya cha Mushe mwa va laolyi, ku chitira vupaki ku valyi. ⁴⁵ Mmi iye naa yenda cho ku ka lwiira vantu vonse ne ku patalaza lyinzwi ni kwaa manina lyinu Jeeso na sa si woolyi kwii njira mu muzi mukando na susuluhite. A va manini choo kaya vwi kala mwa wola kuva yeeyena mmi vantu aa vo ni ve kala ni veeza kwaalyi ni va kazwa kumwi ne kumwi.