¹ Ermons si un di bos tchiga di kai, na algun pekadu, abos ku sedu forti na spiritu bo dibi di n'diretal ku spiritu mansu; bo djubi bo kabesa propi pa bo ka bin sedu tentadu tambi. ² Bo suporta n'ghutru ku kargu, asin bo ta kumpri ku lei di Kristu. ³ Asin si alguin pensa sedu algun kusa, otcha i ka sedu, i n'ghana si propi kabasa. ⁴ Kada kin dibi di djubi si propi komportamentu; n'ton, si dunu ta tene menera di n'djata, sin i kompara si kabesa ku utru. ⁵ Pabia kada kin na karga si propi kargu. ⁶ Si alguin na sinadu palavra di Deus i dibi di rapati tudu kusa bon ku kil ku na sinal. ⁷ Ka bo nghana bo kabesa, pabia ninguin ka pudi fisi Deus torosa. Tudu kil ku omi sumia i el ku na kebra. ⁸ Kil ku sumia naturaza di pekadu, i na kebra mortu; ma kil ku sumia na spiritu, i na kebra vida ku ka ta kaba ⁹ No ka dibi di kansa fasi ben, pabia no na bin kebra ben na tempu sertu, si no ka dizisti. ¹⁰ Asin, n'kuantu no tene manera, no fasi ben pa tudu guintis, sobritudu no familia na fe. ¹¹ Bo odja ku letras garandis ku na skirbi bos ku nha propi mon. ¹² Kilis ku misti kontenta utrus na karni e na obriga bos pa bo kunsidu, so pa e ka bin sedu pisiguidu pabia di krus di Kristu. ¹³ Nin i ka tudu ku sirkunsidadu ku ta fasi kil ku lei misti; ma e misti pa bo sirkunsidadu pa e tene manera di n'djata pabia di bos. ¹⁴ Pa ka n'djata nunka fora di krus di no Sinhor Jesus Kristu; pabia di kila ku mundu krusifikadu pa mi, i ami pa mindu. ¹⁵ I ka sirkunsison i ka insirkusison, i utru kusa, ma i pa sedu nobu alguin na Kristu. ¹⁶ Pa tudu kilis ku ta ianda konformi e palabra, pa paz i fabur ta sta sempri ku elis. I riba di Israel di Deus. ¹⁷ Di gos pa dianti ka ninguin kansan, pabia marka ku n'tene na nha kurpu i ta mostra kuma ami i servu di Deus. ¹⁸ Asin ermons, pa fabur di no Sinhor Jesus Kristu ta sta ku bos na Spiritu. Amen.