¹ NipoYeso eyamba kuwasambizya mu malinganizyo. Eciti, " Munthu ekomela munda wa mipesya, nozungulusha mupanda mumbali mwa munda, nipo efukula cisengu copunthilamo vinyo. Emanga ndala yololelapo munda nipo pavuli pake euninka kuli acilimunda. Nipo efumapo eciya paulendo. ² Pa nsita iweme, etuma wa nchito kuli acilimunda a mipesya kuti akapokeleko vitwalo va mipesya. ³ Koma wemutola, wemunyata, nomutamfya paliye kumupa vitwalo. ⁴ Ewatumizyila soti wamilimo muyake, nipo emucita vilonda mu mutu nipo wemupuwisha. ⁵ Etumizya muyake soti, uyu wemupaya. Onse wayake wanyinji enzowacita tetyo, wayake enzowanyata nipo wayake enzowapaya. ⁶ Kwisala umo otumizya, mwana wake otemweka. Enze osilizyila kuwatumila. Eciti, "Akamucinzike mwana wangu." ⁷ Koma acilimunda a mipesya eciti kuli umo na muyake, "Uyu niye omupyana. Welani, tiyeni timupaye, nipo cipyano ciwe casu." ⁸ Wemupacika, wemupaya, nipo wemupozela panja pa munda wa mipesya. ⁹ Motetyo, acitenji mwine wa munda wa mipesya? Azea ceneke acilimunda amipesya nopasa munda kuwayake. ¹⁰ Muliyowelenga awa malemba? 'Mwala wecikana amisili, wiciwa mwala ofuiwa ngako. ¹¹ Ivi vucokela kwa Asukulu wasu, nipo niviweme mu menso yasu."' ¹² Enzosaka njila yomangilamo Yeso, koma weyopa winji wa wanthu, cikomo cakuti ecimvwa kuti enzolawila mu malangizyo mosushana nawo. Motetyo wemuleka nakuya. ¹³ Pavuli pake etuma a Falisi na a Helode kuti wamutape mukamwa. ¹⁴ Peciza, weciti kuli yeve, "Musambizyi tuziwa kuti musamala lini lingo ya munthu aliyensee, nipo mufuna lini kuzicefya pakati pa wanthu. Musambizyi cendi njila ya Mulungu. Ko nimwamatetulo kulipila musonkho kuli Siza kano yayi? Tikolipila kano yayi?" ¹⁵ Koma Yeso eziwa ciyezyo cao nipo ewauzya, "Muniyezyelanji? Nipeni denaliyasi kuti nilolepo." ¹⁶ Weleta imo kwa Yeso. Eciti ku weve, "Niwani olingana kano cimungalinganizye na ici?" Weciti, "Ni Siza." ¹⁷ Yeso eciti, " Mupeni siza vinthu vake, nipo va Mulungu kwa Mulungu." Wezizwa naye. ¹⁸ Nipo a Saduki, onena kuti kuliye kuukishiwa, weciza kuli eve. wemukonsha weciti, ¹⁹ "Musambizyi, Mose etilembela, 'Kano mukwao wamunthu wafwa kusiya mukazi wake kuvuli, ciliye mwana, mkwawo ofunika kumupyana, nosunga mbuto yamukwao.' ²⁰ Kwenze anansi asano na awili; oyamba etenga mwanakazi nipo yeve ecifwa, nosasiya mbuto. ²¹ Nipo waciwili emupyana nakufwa, osasiya mbuto. Nipo naye wacitatu motetyo. ²² Wala cisano na awili aliyosiya mbuto. Posilizyila pavonse, mwanakazi naye ecifwa. ²³ Pakuukishiwa, akazozyuka soti, akawe mukazi wa wani? Pakuti wonse wali cisano na viwili enze mwanakazi wao." ²⁴ Yeso eciti, " Ici nicikomo cake lini muluvya, cikomo muziwa lni malemba namphamvu zya Mulungu? ²⁵ Pakuti akayouka kwa akufwa, otenga lini nipo oikiwa lini mu nthengo, koma wali nga amalaika akumulu. ²⁶ Koma pa okufwa wala owukishiwa, muliyowelenge mu malemba ya Mose, cimuonekela kusanga, mwecimulawizyila Mulungu nakuti, " Nine Mulungu wa Abulamu nipo Mulungu wa Isaki nipo Mulungu wa Yakobo'? ²⁷ Ni Mulungu lini wa akufwa, koma wa amoyo. Nimwe osowa." ²⁸ Umo wa alembi eciza nipo ecimvwa venzolawilapo; eona kuti Yeso awayankha paweme. Emukonshya, " Ni litatulo yotyani yupula pamatatulo yonse?" ²⁹ Yeso eyasuka, "Ikulu ngako pa yonse ni, ' Imvwa Isilayeli, Asukulu Mulungu wasu, Asukulu ni umo. ³⁰ Mufuniko temwa Asukulu Mulungu na mutima wanu onse, namoyo wanu onse, na nzelu zanu zonse, namphamvu zanu zonse.' ³¹ Tetulo yaciwili ni iyi, 'Ufuniko temwa muyako nga mwauzitemwela.' Paliye tetulo likulu lupula awa." ³² Alembi eciti, " Ciweme, Musambizyi! Mwanena cendi kuti Mulungu ni umo, nipo kuti kuliye umbi pali yeve. ³³ Kumutemwa na mutima onse namamvwilo onse namphamvu zyonse, notemwa muyako nga niwemwine, cupula zyaupe nazopelekewa." ³⁴ Yeso peciona kuti wayasuka mwanzelu, eciti kwake, "muli lini kutali na ufumu wa Mulungu." Pavuli pake, paliye efuna kumukonshya soti Yeso. ³⁵ Yeso ewayasuka, penzosambizya mu kacisi; eciti, "Cili tyani kuti alembi akuti Yeso ni mwana wa Davide? ³⁶ Davide payeka, mu ciyelo, eciti ' Wata eciti kwa Asukulu, nkhala ku kwanja kwendi, mpaka nipange alwani wako vokandapo.' ³⁷ Davide payeka omuita 'Asukulu, ' nga nimotyani kuti khilisitu awe mwana wa Davide?" Winji wa wanthu wetemwa kumumvwila. ³⁸ Mu masambizyo wake Yeso eciti, "Iwani tuni twa alembe, otemwoyenda mu nthambo zitali nopasiwa moni mu malo ositishilamo ³⁹ nakuwa na tufulo tukulu muma sunagoge na mumalo ocinziwa pamalyelelo. ⁴⁰ Nipo otolela ofwilwa mananda, nopemphela mapemphelo atali kuti wanthu aone. awa wanthu aze asuliwe ngako." ⁴¹ Nipo Yeso enkhala mololeshana nathumba la ndalama pa malo akacisi; enzololesha wanthu penzopoza ndalama zyawo mu kathumba. Asambazi anyinji eikamo ndalama zikulu zikulu. ⁴² Nipo wofwilwa osauka ecizoikamo makoini awili, okwanila kusitila tyala colembela. ⁴³ Eita asambili wake nipo kwao eciti, "Cendi nukuuzyani, uyu mwanakazi wofwilwa eikamo zinyinji kupula onse eikamo mu thumba landalama. ⁴⁴ Onse epasa molinga na cuma cao. Koma uyu wofwilwa, mukutamana kwake, eikamo zonse mwa ndalama zake zonse zenze nazo kuti zomuyauya."