¹ Yeso eimako ku malo wala nipo eciya ku calo ca Yudeya ku silya kwa cimana ca Yolodani, nipo winji wa wanthu wewela kuli yeve. Enzosambizya soti, kulinga na milimo yake. ² Nipo a Falisi ewela kuli yeve kumuyezya nomukonshya, " Ko nicololeka mwanalume kuleka mwanakazi wake?" ³ Eyasuka, "Ko Mose ekulamulilani cinji?" ⁴ Weciti, " Mose elamula mwanalume kulemba kalata kosilizya nthengo nomuuzya kuti alute." ⁵ "Cenze cikomo ca mitima yanu iyumu nipemulembelani lamulo ili," Yeso eciti kwa weve. ⁶ "Koma kufumila potatikapa cilengedwe, Mulungu ewalengela mwanalume na mwanakazi.' ⁷ Pa cikomo ici mwanalume akasiye awisi na anyina nokuwa pamo na mukazi wake, ⁸ nipo awili nakuwa muwili umo.' Kwakuti nawili lini, koma muwili umo. ⁹ Tetyo calundika Mulungu pamo, pasawe ocimangulula." ¹⁰ Penze mu nanda, asambili emukonshhya soti ici. ¹¹ Enena nao," Aliyense wasuzula mukazi wake notola mwanakazi umbi wamucitila ucende. ¹² Nipo kano naye akaleka mulume wake notolana na mwanalume umbi, nishi naye wacita ucende." ¹³ Nipo emuletela tuwana tutontho kuti atukumye, koma asammbili wake ewakanila. ¹⁴ Koma Yeso peona ici, ecipya mutima nowauzya kuti, " Tulekeni tuwana tutontho tuze kuli neo, nipo musatuleshe, pakuti ufumu wa Mulungu ni wao ali nga ni wana. ¹⁵ Cendi nimuuzyani, uyu atiakane pokela ufumu wa Mulungu nga nimwana sazakalowamo." ¹⁶ Nipo ewula wana mu manja wake nowashukisha poika manja wake pa weve. ¹⁷ Peciyamba ulendo wake, mwanalume emuutukila nofukama, nokonshya, " Musambizyi muweme, ko ningacitenji kuti nikapokele moyo osasila?" ¹⁸ Nipo Yeso eciti, " Ni cikomo canji muniyita muweme? Kuliye muweme, koma Mulungu yeka. ¹⁹ Muziwa matetulo: 'Osapaya, oacita ucende, osapusha, osacita umboni wa wenye, osaceneke, wolemekezya auso na anyoko'." ²⁰ Mwanalume eciti," Musambizyi, vonse nuvisunga citatikile pe nenze musaza." ²¹ Yeso emulolesha nomutemwa. Eciti naye, " Cinthu cimozi cikusowa. Kasitishe vonse vulinavo nowapa akavu, nipo ukawe na cuma kumulu. Nipo wela, nikonkhe." ²² Koma cikomo ca ma lizu enenewa eioneka okalipa nipo eciya osatemwa, cikomo cakuti enze na cuma cinyinji. ²³ Yeso ewalolesha nowauzya asambili wake, " Mucilili covuta kuli wa vyuma kulowa ku ufumu wa Muluungu!" ²⁴ Asambili edodoma pa ma lizu wake. koma Yeso elawila soti kuli weve, "Mwanamwe , mucili cokosa kulowa ufumu wa Mulungu! ²⁵ Ni cipepu kuli ngamila kupita pa mubowo wa singano, kupula munthu wa vyuma kulowa mu ufumu wa mulungu." ²⁶ Asambili edodomeshewa ngako noyamba kulawizyana, " Ko niwani angapulumushiwe?" ²⁷ Yeso ewalola nakulawila, " Nawanthu nicovuta, koma osati Mulungu." ²⁸ Petulo eyamba kulawila naye, " Ona, tasiya vonse nokonkha weo." ²⁹ Yesu eciti, "Cendi nukuwuzyani, paliye asiya nanda, kano akwake, kano anyina, kano awisi,kano wana, kano malo cikomo ca neo, nipo ca ma lizu," ³⁰ Niwani akakano pokela makumi kumi nga nilomba mu calo cino: ma nanda, kano akwao, kano anyina, kano awisi, kano wana, kano malo, nakusaushiwa, kuma lizu ati akaze, moyo osasila. ³¹ Koma anyinji apoyambila azawa posilia, nipo osilizyila poyambila." ³² Wenze mu njila, kuya mu Yelusalemu , nipo Yeso enzoyenda pa nthangu pao. Asambili edabwishiwa, nawala enzokonkha pavuli eciwa na mwezo. Nipo Yeso etola asambili wake pambali noyamba kuwauzya viti vikacitike kwa yeve. ³³ "Loleshani, tikuya mpaka ku Yelusalemu, nipo Namwana wa Munthu akapasiwe kwa akulu wa asambizyi na kwa alembi. Akamupingule kuti owamila kufwa nomutwala ku Mitundu. ³⁴ Akamufweye, nomutila mata, nomukwapula, nipo nomupaya. Koma siku la mazo akauke soti." ³⁵ Yakobo na Yohane, mwana wa Zebediyo,ewela kuli yeve nolawila, " Musambizyi, tipangwa muticitile ciliconse cati timusengeni." ³⁶ Ewauzya kuti, " Mupangwa nimucitileni cinji?" ³⁷ Nipo weciti, "tizomeleni kuti tinkale namwe mu ufumu wanu, umo kwanja kwendi nipo umo ku manjele kwanu." ³⁸ Koma Yeso ewayasuka, "Muziwa lini vumusenga. Ko nimweoyenelela kumwela nthumo iningamweleko neo kano kubadiziwa na ubadizo unikabadiziwa nawo? ³⁹ Nao wemuyasuka, "Tukwanisha." Yeso ewauzya," Nthumo itinikamweleko neo, mukamweleko. Na ubatizo wenibadiziwa nao neo namwe mukabadiziwe nao. ⁴⁰ Koma niwani akankhale ku kwanja kwangu kwa kwendi kano ku manjele sikwangu kupasa, koma nikwawala weve wekonzela." ⁴¹ Nipo asambili wayake kumi pecimvwa ivi, weyamba kukalipa ngako na Yakobo na Yohane. ⁴² Yeso ewaita kwake nipo eciti, "Muziwa wala ocishiwa kuti acitangulili a mitundu owalamulila weve, nowela asambizyi akulu oezyelela mphamvu pali yeve. ⁴³ Koma izi zisankhale tetyo pali mweo. Aliyense opangwa kuwa mukulu pali mweo akawe wanchito wanu, ⁴⁴ nipo alionse opangwa kuwa wapanthanzi pali mweo akawe muzya wa wonse. ⁴⁵ Cikomo cakuti Mwana wa Munthu aliyewele kuti atumikiliwe, koma kuti atumikile, nipo notwala moyo wake kuwa cawanzi kwa anyinji.'' ⁴⁶ Weciza ku Yeliko. Penzofuma mu Yeliko pamo na asambili wake na lumba likulu, mwana wa Timayo, Batimayo, mphofu yosenga, yenze nkhezi mu mbali mwa njila. ⁴⁷ Pecimvwa kuti ni Yeso wamu Nazaleti, eyambowilizya nonena, "Yesu, Mwana wa Davide, unicitile lusungu!'' ⁴⁸ Wanyinji eikalipila mphofu, noiuzya kuti nkhala cete. Koma elilisha, '' Mwana wa Davide municitile lusungu!'' ⁴⁹ Yeso epanama nipo elamula kuti amuite. Emuita ula mphofu, ''Iwa ocenjela! Ima! Okuita.'' ⁵⁰ Etaya mwinjila wake, enyotoka, nipo eciza kwa Yeso. ⁵¹ Nipo Yeso emuyasuka nipo eciti, "Upangwa nikucitilenji?" Mphofu iciti, ''Asukulu, nupangwa kulola soti.'' ⁵² Nipo Yeso eiuzya, ''Nkhoya. Cicetekelo cako cakupozya.'' Pamene apo eona soti, nipo emukonkha ku njila.