¹ Moo mayuwa, kwakakarire nombunga dho dhingi, ene hapirire yokudya. Yesusi ethire hakathishongero thendi ndani aambire nao, ² Nidi nothiyaudhi kumbunga dhi Yoyishi hakarire nange mayuwa mahatu mara mbadiko kudya. ³ Ngeshi haniwatumu kumayimbo hao mbadi hanadi, Kona hapwerere mundhira. Hamweya kayenda hatunderere.'' ⁴ Ha kathishongero hamuhuthire, Kupi okukona tuwane yidya yohashako muno muma mboreya twikutithe haguva?'' ⁵ Awepurire, ''Mangatji mauroto mudi nao?'' Haambire, ''Kwoko nomawadi.'' ⁶ Atongwere mbunga dhihungumane pamuve. Ashimbire mauroto makwoko nomawadi, ndani atapire ndangi, awa tjodhawere uroto. Awa tapere hakathishongero thendi hadye hekute, Ene hadire kwikuta kare kuthiyarapo yimweya mumbunga. ⁷ Hakarire nothii dhothi mbiru, opa amanine kutapa matumero kukwao, Atongwere hakathishongero thendi hapake thiwana eyi yathiyarirepo yoyipu. ⁸ Hadire waheya noha kutire waheya, ndani hatoratorire yipindhi eyi yathiyarire po, mavani kwoko noyiwadi. ⁹ Momu harikanye ku mayovi mane haguva wapo. Ndani awatumine hayende. ¹⁰ Popo wangu wangu athinine muwato na kathishongero thendi, podiyo hayendire muditunga dya Dalmanutha. ¹¹ Ha Farisi heyire nokumu kanyekitha, Hashanine thisupo kukwendi thokutunda kudiwiru, hamuyereke. ¹² Amonine thikuma mumupepo wendi noa ambire shi, ''Nye rurudhi oparwakushana thisupo? Ushemwa nakumutongwera, Mbadiko thisupo ethitha kona kupiwa moru ruthi.'' ¹³ Awa thiyire, Nokadhina muwato karo, nokayenda kumutara umweya. ¹⁴ Hakathishongero thendi havuramine kuyenda noyidya yao. Mbadi hakarire nothidya temba muwato. ¹⁵ Awa needhire, mukuwatongwera shi, ''Mukenge muya 'nomuya ndani omukumamere kuamana nombunga dhawa Farisi ndani nombunga dha herodesi.'' ¹⁶ Hakathishongero thendi hakwipure hathinda,'' yoyishi mbadiko yokudya.'' ¹⁷ Yesusi ayidimukire yoyiheya yi, ndani aambire kukwao, ''Yinye mwakukwipaura kuamana noyo uroto? Shime mbadi munakumona? Shime mbadi munakuyuva? Mitjima dhenu shime dhakarera ukukutu? ¹⁸ Mudi no meho, Mbadi munakumona? Mudi nomatwi, Mbadi muna kuyuva? Mbadi muna kuyedhekera? ¹⁹ Opa natjorawere uroto mukatji kohaguva homa yovi kwoko, mangatji mavani okuyara oyi pindhi youroto eyi mwashimbire?'' Hamuhuthire eshi, '' Dikumi noyiwadi. ²⁰ ''Opa natjorawere uroto mukatji kohaguva homayovi mane, Mangatji mavani okuyara oyi pindhi youroto eyi mwashimbire?'' Hambire kukwendi, ''kwoko noyiwadi.'' ²¹ Aambire, ''Shime mbadi muna kuyuvithitha?'' ²² Heyire ku besayide. Haguva hamuretere murume okufa meho ndani hamurombire eshi amukwate. ²³ Yesusi akwatire murume no nyara dhendi, amushwayithire mudimbo. Apa athipere mumeho hendi ndani amukambekire moko hendi papendi, A mwipure, ''Una kumona thimweya? ²⁴ A kengire kuwiru, ndani ambire, ''Enimona murume yira thitondo thina kunayenda. ²⁵ Amukwatire karo mumeho nonyara dhendi, Murume amonine, meho hendi erukire, ndani amonine yinu yoyiheya muukenu. ²⁶ Yesusi amutumine kudimbo dyendi ndani aambire eshi, ''Mbadi ukangene mudoropa.'' ²⁷ Yesusi ashwayiremo nohakathi shongero thendi ayendire kare kumayimbo a Caesarea Philippi. Mundhira dhao pakuyenda epurire hakathishongero thendi, ''Eshi yamedye nane hanakunitoyanga haguva?'' ²⁸ Oha mutawire noku aamba shi, ''Yohanesi muyowi. Hamweya hambire shi, 'Elijah,' ndani hamweya, 'Muporofita umweya. ²⁹ Awepurire, ''Mara yamedye mwakunitoya?'' Peturusi ambire kwendi, ''Yowe kiritusi.'' ³⁰ Yesusi awatongwere shi mbadi mutongwere haguva kuamana noyitenda yange. ³¹ Atangire kuwa honga shi mwana murume ne akona kunyanda muyinu yoyingi, ndani nganyi akumushingithe hakuru no hakuru oha purisiteri ndani nohatjangi, ene akona kumupaa, muma yuwa mahatu. ³² Aambire o maywi koukenu. Ashimbire peturusi kumbadi nokutameka kumushaekitha. ³³ Mara Yesusi apirukire ndani akengire ha kathishongero thendi ndani ashingithire Peturusa no aambire shi, ''Mwiye munyima dhange, Satan! Mbadi unakutura maano pathitenda tha Nyambi, Mara payinu yawa guva.'' ³⁴ Ethire mbunga ndani nohakathishongero thendi, ndani aambire kukwao, ''Keheyu anakushana anikuthe, Akushweneke yithinda, Ashimbe thifapano thendi, ndani anikuthe. ³⁵ Keheyu anakushana kukunga huparo wendi naambo umuthiye, Keheyu ana kufera muushemwa wange naambo akungiwe. ³⁶ Uwa munye okushimbeera ditunga dyodiheya nokupetha uparo oye? ³⁷ Makutjinjo munye okukona uroyithe uparao oye? ³⁸ Keheyu anakufa honyi kuutho wange ndani maywi hange muruhonda rwendi ndani nothivi thoruthi rwendi, mwana Fumu naakamufe honyi naye kuutho wa Wihe noha Engeli hokupongoka.