Thimingwa dikuminokwo nothotji(16)
1
Munyima dhodiyuwa dyo mapeu, Maria Magdalena, na Maria nyina Jemusi, na Salome haka urire uwanga okunuka shemwa eshi nahawethe payirama ya Yesusi.
2
Mathikuthiku pakuva diyuwa muthivike, hayendire kumambira pa dya vire diyuwa.
3
Ha ambaurire pofotji, ''Eshi yidye shaka kone kashwayitha diwe pathero dho mbira?''
4
Apa ha kengire kuthero tho mbira, oha monine shi diwe dina yandhuruka kuthero tho mbira dina henyena pambadi, ene dyakarire dikuru thikuma.
5
Hangenine mumbira nohaka monine mu Engeli ana vata dikehe dyodikenu, ahungumanine kurudyo rwao, ene hayapire nokutetuka.
6
Ene mu Engeli aambire nao eshi, ''Mwayapa. Yesusi muna kushana, muka Nazareta, Oyu hapamarere. Ana pinduka! Mbadi adi momu, Mumone paya padiwe hamurangekire.
7
Mara muyende, mukatongwere haka thishongero thendi na pitorosi' eshi, 'pepi Adi nokwiya mugalalie. Okone ñanyimwakamumone, Dyodi amutongwere.'''
8
Oha shwayire mo mumbira; Hatukukire nokutetuka. Kadiko yi akaambire kokeheyu muguva yoyishi hatukukire no hayapire thikuma.
9
Mudiyuwa dyokutanga muthivike thimweya, kushwaa pakupinduka kwa Yesusi, Pakutanga amumonekire kwa Maria Magdalena, Eshi kwadye shemwa atjidhire mupepo dhodhiyi dho kwoko noyiwadi.
10
Ayendire nokatongwera wa hakarire nendi, opa hakarire pakudira hamweya.
11
Oha yuvire shi Yesusi ne shime apara ndani namumono me Maria Magdalena, mara mbadi hayitawire karo.
12
Munyima thoyi, amonekire mundhira dhimweya kowa hawadi hakarire muruyendo rwao romuditunga.
13
Hayendire nohaka tongwera hakathishongero waheya, mara mbadi hayitawire mumwao.
14
Yesusi amonekire kowa hakadikumi nothofji pahakarire patishi, awa patere mukupira kutawa kwao noukukutu dhomitjima dhao, Yoyishi mbadi hatawire kowa hamumonine pakutanga apa apindukire muyifa yendi.
15
Ene aambire kukwao, ''Muyende kokuheya muditunga, ''ndani omukahonge diywi dya Fumu Nyambi mutendi oditunga.
16
Keheyu akutawa nganyi akuyoyiwe ndani nganyi akuparithiwe, Mara yu akupira kutawa nganyi akuyongare.
17
Yineedha nganyi yakuyende nowa hakutawa: Mudina dyange nganyi hakutjidhe mupepo dhodhiyii. Nganyi hakuambe mundimi dhodhipya.
18
Nganyi hakukwate yiyoka pamuve nomanyara ao, Mara ngeshi hakunwe yoyimango mukatji kao, mbadi yakuwa yipitha. Nganyi hakuture moko ao pawakorwi, ene nganyi hakwirure.''
19
Pakumana kuamba nao Yesusi, ayendire mudiwiru noka hungumana kudyoko dya Nyambi dyorudyo.
20
Hakathishongero thendi hahukire noka honga ñando dha Nyambi keheku, Fumu pakuruwana nao nokutanaritha ñando dha Nyambi koyitetukithaa yi yayendire nao.