¹ No gha ghambire kukwagho, ''Ghushemwa na kumutongwera, hamwe mukatji kenu mbadi mbo ha yereka yifa oku mbadi hana mono ghufumu waNyambi oghu mbo wiya nongcamu.'' ² Munyima dhomayuwa kwoko nodyofotji, Jesusi gha shimbire Petrusi naJacobus naJohanesi no gha yendire nawo kudirundu dyodire, , nawo pithagho. No gha ka kuthitunukire thitunumeho. ³ Yishupata yendi yarwedhimine yakarire keve-keve nothishe thothikuru thawa munekerire. ⁴ Munyima Eliyas naMoses ghawa hokokere, no ha ghambaghurire naJesusi. ⁵ Petrusi gha huthire nogha ghambire eshi, ''Muhongi (muThiheburayi kuninga eshi Rabbi) ghuhunga twe mukukara kuno, tu tawedhere tutende yishashara yihatu, thimwe thoye, thimwe thaMoses munyima thimwe thaEliyas.'' ⁶ (mbadi ghadimukire eshi nye sho ghakone kughamba yoyishi homapire.) ⁷ Divuyi dyeyire nodyawa ngamwathanine. No diywi dyashwayire mudivuyi eshi, ''Oyu ne yomwanange ghomuhakwa. Mutegherere kukwendi.'' ⁸ Kapupi kamanana apa ha kukengathanine, mbadi ha konine kumona ghumwe karo nawo, ene shimengwa Jesusi vene. ⁹ Opa ha ghurumukire kudirundu, gha wa rawere eshi, mbadi haka tongwere kehe yu koyi hana mono kate mwana munu mbo gha vumbuke mwawafu. ¹⁰ Ha pungurire nando dhi kukwagho hathinda, ene ha konine kukwipadhura papawo hathinda nye, ''Yina kutongora muvumbukero wawafu.'' ¹¹ Ha mwipurie eshi, ''Pashanye Hakamarukwaro ha ghamberanga eshi Eliyah yo mbo gheya pamutango?'' ¹² Ghawa huthire eshi, ''Eliyas gheyire pamutangerero mukuna huthedhera yinu yoyihe. Pashanye ha yi tjangera eshi Mwana Munu gha kona kuna nyanda kuyinu yoyingi no kuna mushwaghura? ¹³ Ene ghushemwa na kughamba kukwenu eshi Eliyah gheyire no gha konine kurughana eyi gha konine kushana kukwendi, thika kenge edi ha yi mutjangere yo kuhatera kukwendi. ¹⁴ Apa hana kumine ko hakathishongero, hamonine mbunga dhodhikuru dhina wa dhingi, hakamarukwaro haturire nanani nawo. ¹⁵ Apa hamonine Jesusi, mbunga dha tutukwire no apa ha henyenine pepi nendi hatapire dirumeritho kukwendi. ¹⁶ Ghepurie hakathishongero wendi eshi, ''Yinu munye muna kukarera munanani nawo?'' ¹⁷ Ghofotji gho mumbunga gha mu huthire eshi, ''Muhongi, na reta mwanange gho katughuru kukoye. Gha kara no mupepo oghu wa muningithanga gha pire kughamba. ¹⁸ Agho kumughangeritha no kumuwithera pamuve, no kumutakuritha kafudhi, no kukuhuma mayegho no kughara. Naningi haka thishongero ghoye ha ghu shwayithemo mumwendi, ene mbadi hana ghu kono.'' ¹⁹ Gha wa huthire eshi, ''Hana hoka ho kupira matawero mwe, rure ro kukuma kupi dho ni kare nenu? Yo kuhura kupi sho mumone? Mumurete kuno.'' ²⁰ Hamuretire katughurughana yu kukwendi. Apa wa monine mupepo gho ghumango Jesusi, popo vene koku muvukuma ghumuwithe.Mungaghughana yu gha wererire pamuve no kutakura kafudhi. ²¹ Jesusi ghepurire wiha eshi, ''Rure rokukuma kupi ghakara kenge yu katughuru ghana?'' Wiha gha huthire eshi, ''kushwagha kuwanuke wendi. ²² Agho wa muwitheranga mumudiro, pamwe mumeyu. Ngeshi kukona kutenda ko thinu ne ghutufere neke ghutu ghamwene.'' ²³ Jesusi gha mu tongwere eshi, ''Ngeshi kukona? Thothiheya ghuredhu kowa hana tawa.'' ²⁴ Popo vene wihe gha hutha eshi, ''Natawa ghamwene ghukashu ghomatawero ghange.'' ²⁵ Apa gha monine Jesusi mbunga dhina kutjirera kukwagho, gharawere mupepo dhodhimango no kughamba eshi, ''Ghupurupuru ghutunde mumwendi no gha ghu kanyene eshi, ''Mbadi mbo ghukeye mumwendi karo.'' ²⁶ Wakughererire thikuma no kuwitha mungaghu ghana thikuma no wa tundire mo mumwendi. Mungaghu ghana gha piturire yira yoyu ghana fu, wingi wawo haghambathanine eshi, ''Ghana fu.'' ²⁷ Ene Jesusi gha mu kwatire kudyoko no kumwimeka, nomungaghu ghana yu ghemanine. ²⁸ Apa ghengenine Jesusi mundhugho, haka thishongero wendi hamwipurire mughudhindo eshi, ''Pashanye twe tuna pirera kughu tjidha mo?'' ²⁹ Aye gha wa huthire eshi, ''Mupepo gho kenge ghuya ne shimengwa pakuraperera.'' ³⁰ Hatundire po noha pitere muGalileya. Mbadi gha shanine ghumwe ghawa dimuke eshi kupi hadi, ³¹ aye kwakarire ghana kuhonga hakathishongero wendi. Ghaghambire nawo eshi, ''Mwana munu mbo ghana mutapa mumoko ghawanu, awo mbo hana ka mupagha. Apa mbo ha mana kumupagha, munyima dho mayuwa mahatu mbo ghana vumbuka.'' ³² Ene mbadi hatjwathanine thighamba thi, no hayapire kumwipura. ³³ Munyima heyire kuCapernaum. Hengenine mundhugho nogha wepurire eshi, ''Yinu munye muna kuyongo mundhira?'' ³⁴ Ene haporererire. Yoyishi awo ha karire no nanani mukatji kawo mundhira eshi ngodye gho ngcamu po thikuma. ³⁵ Ha hungumanine no ghethire hadikumi nahawadi no gha ghambire kukwagho eshi, ''Ngeshi ghumwe ghana shana kukara kughutho, ghakona kukara munyima dhawahe nomupika wawahe.'' ³⁶ Ha tumburire mwanuke no kumwimeka mukatji kagho. Gha muturire mumoko ghendi no ghwa tongwere eshi, ³⁷ ''Kehe yu gho kutambura hanuke hokenge mudina dyange yame ghana tumbura; no kehe yu gho kunitambura me mbadi yame ghana tambura ene ghana tambura oyu ghana ni tuma.'' ³⁸ Johanesi gha tongwerire Jesusi eshi, ''Muhongi, thuna mono ghumwe ghana kutjidha mupepo dhodhimango mudina dyoye ene kuna mushingi yoyishi mbadi ghana tukuthu.'' ³⁹ Ene Jesusi gha muhuthire eshi, ''Mbadi mwakona kumushinga yoyishi, mbadiko gho kukona kurughana yirughana yoyikuru mudina dyange ghogha ghambe ghuyi mudina dyange.'' ⁴⁰ Kehe yuno ghana piri kutwimanganyena ne wetu. ⁴¹ Kehe yunu gho kukupa kopi gho meyu ghunwe mudina dyange eshi mwahatera kwaKristus, ghushemwa na kumutongwera, mbadi mbo gha yongaritha ndjambi dhendi. ⁴² Kehe yuno gho kuninga mwanuke gho kutawa mumwange gha tamangere, yina kukara hasha kukwendi mukumughangera diwe muthingo dhendi no kumuvukumena mudikuruviya. ⁴³ Ngeshi dyoko dyoye ghadi kurughanitha ghutende ghuyi, ditete ko. Hasha kukoye mukwingena mumoyo nodyoko dyofotji, mbadi yira nomoko mwadi mukuyenda mumudiro, mumudiro ghushidhimana. ⁴⁴ Omu gha dhira kufa mavinyo, no mudiro ghushidhimana. ⁴⁵ Ngeshi dipadhi dyoye hadi kuharuritha, ditete ko. Hasha kukoye kwingena mumoyo noghuhwere, mbadi kukara nomapadhi mawadi nokukuvukuma mudirara diro. ⁴⁶ Omu ghadhira kufa mavinyo ghawo nomudiro ghushidhimana. ⁴⁷ No ngeshi diho dyoye kukuningitha ghuharure, dikorongoremo, hasha kukoye kwingena mughufumu waNyambi nodiho dyofotji mbadi yira kukara nomeho mawadi nokakuvukumena mumudiro, ⁴⁸ omu mwakara mavinyo ghashifu no mudiro ghushidhimana. ⁴⁹ Keheyu mbo ghana pu kuyaritha nomudiro. ⁵⁰ Mungwa ne ghuwa, ene ngeshi wahamupa ne, ngepi edi gho kughu tovitha karo? Mukare nomungwa mumwenu no mukare muthiraro nowayendhenu.''