¹ Yakarire keho eshi mayuwa mawadi kughutho ghaPaska nomukandi ghoghuroto ghothuthunyunyi. Hapristeri shokuru nohakamarukwaro ngahanomenanga ruvedhe roruwa oru hakumukwata Jesusi no kumupagha. ² Awo haghambangire eshi,''Mbadi paruvedhe romukandi,yoyishi mbadi hashanine kuretapo ndjoronganyi mukatji kawanu. ³ Oku shime ghakarere Jesusi muBethani mudighumbo dyaSimoni ghomukayinondwe,oku shime ha hungumanena kutishi,peyire mbuyama nodikende dyendi dyomaghadhi ghondhiro. Ghawithire dikende di no kutera maghadhi kumutwi wendi. ⁴ Ene pakarire hamwe awa hapatire. Nohavungutire mumwagho eshi,''Thitambo munye tho kupethera kenge?'' ⁵ Oyo sende ne ngokuna kamughuritha nomadenarii ghokupitakana pamathere mahatu nokughatapa kwawahepwe.'' Munyima hamupiraghukithire kemo. ⁶ Ene Jesusi ghaghambire eshi,''Mumuthiye,yinye muna kumushedhawera? Aye ghana rughana thinu thomudyo kukwange. ⁷ Amwe mwakara kare nawahepwe henu, no nge muna shana kukona muwarughanene ghuwa, ene mbadi mwakukarera nange. ⁸ Ghana rughana eyi ghana kono. aye ghana wethera yirama yange kumahoreko. ⁹ Ghushemwa nakumutongwera, kehe ku hakayuvitha mbudhi dhi muditunga dyodihe, eyi ghana rughana yu mbuyama ne mbohanakayighamba mumavurukero ghendi.'' ¹⁰ Munyima Judas Iscariot, ghumwe ghowa dikumi nohawadi ghayendire kwawapristerishokuru eshi ghakamuhete Jesusi. ¹¹ Apa hayiyuvire hapristeri hashokuru, haghamberire nohamukurupethire eshi mbohana mupa manyinga. Ghashanine kushana kambenene ghakumughurithe. ¹² Mudiyuwa dyokutanga dyo ghuroto ghathuthunyunyi, apa hatendire muyambo gho ndjwi paPaska, hakathishongero wendi hamutongwerire eshi,''Kupi wakushana tuyende tukarongathane podiyo ghudye nowe murarero ghoPaska?'' ¹³ Ghatumine hakathishongero wendi hawadi nokuwatongwera eshi,''Muyende mumbara,nanyi ghukawane katughuru oyu ghadi nokandimbe komeyu. Mukamukuthe. ¹⁴ Apa shoghakengene mundhugho,mukamukuthe nomukaghambe nathinda shandhugho eshi,'Muhongi ghana ghamba eshi,''Kupi dhidi ndhugho dhawagenda omushonikadyere Paska nawakathishongero wange?''' ¹⁵ Nanyi ghaka amuneghedhe ndhugho dhokuwiru edhi dhina pu kuyenga thiwana. Mukaturoyithere yoyiheya koko.'' ¹⁶ Hakathishongero hashwayire nohayendire kumbara. Hakawanine yoyiheya thikadi ghayiwatongwere,nohakaroyithire yidya yoPaska. ¹⁷ Parunguro, ghakeyire nawadikumi mohawadi. ¹⁸ Apa hahungumanine kutishi hadye, Jesusi ghaghambire eshi,'' Ghushemwa nakumutongwera, ghumwe ghopapenu oyu ghana kudya nange nanyi ghani hete.'' ¹⁹ Wahe haguvire, noyofotji yofotji ghambire nendi eshi,''Ghushemwa mbadi yame?'' ²⁰ Jesusi ghawahuthire ghuninga eshi,''Ghofotji ghopapenu,oyu ghana kudova nange ghuroto papurayiti. ²¹ Yoyishi mwana munu mboghana yendi thikadi hayitjanga. Ene dihudhi thikuma kwakatughuru yu ghana kuheta mwana munu. Ngo hasha vene eshi mbadi hamwereka.'' ²² Apa hadire,Jesusi ghatumburire ghuroto, ghaghu andadheke no kughugonyona. Ghaghuwapire nokughamba eshi,''Mushimbe. Eyi ne yirama yange.'' ²³ Ghashimbire kopi,noghatapire matumero,no gha ghuwapire, nowahe hanwine mo. ²⁴ Ghawatongwere eshi,''Agha ne manyinga ghange ghothithithatero manyinga agha ghayarekera nawengi. ²⁵ Ghushemwa nakumutongwera, mbadi shoni nwe karo mukopi gho mbuyo dhovinyu.,kare modiya diyuwa apa mboni kamunwa mughufumu waNyambi ghoghupya.'' ²⁶ Apa hamanine kwimba dimbo, hayendire kudirundu dyondhwe. ²⁷ Jesusi ghawatongwere eshi,''Mwahe mbo muna ghu,thikadi hayitjanga,'mbonahomokera mudidhi no ndjwi dhodhihe mbodhina kuharanganya.' ²⁸ Apa na kavumbuka, nanyi mbo niyende kughutho wenu muGalileya.'' ²⁹ Petrusi ghamuhuthire eshi,''Ngambi ngohakuwe wahe, ame ne mbadi na kuwa.'' ³⁰ Jesusi ghamuhuthire eshi,''Ghushemwa nakukutongwera,dyarero,ghoghuthiku kughutho ghokwiya ngondovoro ruwadi,ghuna kuni hamura paruhatu.'' ³¹ Ene Petrusi gha ghambire eshi,''Ngeshi ni fe noye,mbadi shonikone kukuhamura.'' Wahe hatapire mukurupero ghokemo. ³² Heyire kudyango edi hatoyire eshiGesthsemane, no Jesusi ghaghambire eshi,''Muhungumane tango popa tango niyende ni karaperere.'' ³³ Ghashimbire Petrus,Jacobus,naJohanesi no ghatangire kukudhekera noghandundumene thikuma. ³⁴ Ghaghambire kukwagho eshi,''Mudhimuwange ne ghuna tokokota thikuma kushana kufa. Muthiyare popano nomukengerere.'' ³⁵ Ghahenyine kughutho kamanana, Jesusi kokukuvaama pamuve nogharapererire eshi ngeshi kukona edhi viri kukona dhimukeruke . ³⁶ Ghaghambire eshi,''Tate wange tate wange yinu yoyiheya yiredhu kukoye. Shwaghithe thinwithi thino kukwange. Mbadi pamahimeno ghange ene ghoye.'' ³⁷ Ghakahukire nokuna wawana hana rara,no kughamba kwaPetrus eshi,''Ghuna rara ndi? Mbadi wakukona we kukenga muviri dhofotji? ³⁸ Kenge no raperere podigho shi mbadi wingene mumayerekero. Mupepo ne ghuna shana ene nyama ne dhina kasha. ³⁹ Ghashwaghirepo karo noghayendire karo ghakaraperere,gharughanithire manando ghofotji. ⁴⁰ Apa ghakhukire karo, ghana wawanine karo hana rara, no meho ghawo ne shime muturo. Mbadi hadimukire eshi ngonye shohakone kughamba kukwendi. ⁴¹ Ghakahukire karo roghuhatu no kuna ghamba kukwagho eshi,''Shime mwararera no kuturumtha ndi? Keho! Nako ne dhineya. Mukenge! Mwana munu ne ghana pu kutapa mumoko ghawa yiharuri. ⁴² Mwimane;Tuyende. Mumone, mukakuheta ne pepi ghadi.'' ⁴³ Oku shime kuna kughamba, Judasi, ghumweya ghopowa dikumi nohawadi,ghana kumine,mbunga dhodhingi dhakarire nendi nomamende nomamburo,kutangerera kwawaruti hashokuru, hakamarukwaro no mayami. ⁴⁴ Mutapi wendi kokutapa thidimukitho, ghughamba eshi,''Oyu shonincumite ne yodiye. Mumukwate no mumutware.'' ⁴⁵ Apa ghana kumine Judasi, popo kokuhenya kwaJesusi no kughamba eshi,''Muhongi,'' pogha muncumitire. ⁴⁶ Hakambekire moko ghawo no kumukwata. ⁴⁷ Ghumwe ghopapagho ghapweyure thimende thendi no ghavorire mupika wamupristeri shokuru nokuteta ditwi dyendi. ⁴⁸ Jesusi ghawatongwere eshi,''Muna niyera yira noshondoro noyimende nomiramo mukuna ni kwata? ⁴⁹ Oku nenu nakarire kehe nadiyuwa no nganihonganga mutembeli, ene mbadi mwani kwatire. Ene yi yina pu kutenda podigho shi matjangwa ne gha kumenenemo.'' ⁵⁰ Wahe wa hakarire naJesusi hamuthiyire no hatjirire. ⁵¹ Mutjaha ghumwe,oyu ghakudhingire dirwakani ghakuthire Jesusi. Apa hatutughuru hamukwatire ⁵² hathighire dirwakani nogha tjirire muherehere. ⁵³ Hapiterithire Jesusi kwamupristeri shokuru. Hapongire waheya nohapristeri shokuru,mayami nawakamarukwaro. ⁵⁴ Petrus ghawa kuthire muthinema, kayenda nodirapa dyamupristeri shokuru. Ghahungumanine mukatji kawakungi,awa hakarire pepi nomudirohana kuyota. ⁵⁵ Popo hapristeri hashokuru nondhango dhawaJuda hashanine ghushupi waJesusi hakamupaghe. Ene kadi hawanine keheghuno. ⁵⁶ Hengi haretire ghushupi gho mbudhi ghokukwendi,ene maghushupi ghagho kadi ghakuwire. ⁵⁷ Hamwe hemanine nokureta ghushupi ghombudhi kukwendi;nohaghambire, ⁵⁸ 'Twa muyuva ghakughamba,'Ame nanyi niyungure tembeli dhi hatenda nonyara ,nomumayuwa mahatu mbona tendi tembeli dhokupira kutenda nonyara.''' ⁵⁹ Ene ngambi kemo ghushupi nagho kadi wakuwire. ⁶⁰ Mupristeri shokuru ghemanine noghepurire, Jesusi eshi,''Kadi ghudi nodihuthero? Nyeyi hanakushupa waharume yokukoye?' ⁶¹ Ene ghaporere no kadiko yighamuhuthire. Ndani mupristeri shokuru ghamwipure noghaghambire eshi,''Yowe Kristus, mwana mupongoki?'' ⁶² Jesusi ghaghambire eshi,''Yame;Ndani nanyi wakumone mwana munu apa ghakuhungumana kudyoko dyorudyo dyo ngcamu no nanyi ghakwiye nomavuyi ghodiwiru.'' ⁶³ Mupristeri shokuru ghadjadjaghure dirwakani dyendi noghaghambire eshi,''Tuna nyanda shime hashupi ndi? ⁶⁴ Muna yuvu dishamu dyendi. Nye muna tokora?'' Wahe hamundhanyine yira munu yu yina roghera yifa. ⁶⁵ Hamwe hatangire kumuthipera no kufika rupara rwendi nokumumwashura nokumutongwera ,''Pumbe!'' Hamaporitha hamushimbire nokumupumura. ⁶⁶ Oku Petrusi yene pamuve mudirapa,mupika ghomukamadi wamupristeri shokuru gheyire kukwendi. ⁶⁷ Ghamonine Petrus ghana kukughenyeka, nogha mukengurure pepi nendi noghaghambire eshi,''Yowe ghumwe naJesusi ghomukaNazareti.'' ⁶⁸ Ene gha kananine, ghughamba,'' Kadi namudimuka nokutjwathana eyi wakughamba.'' Noghashwaghire panunda dhothero. ⁶⁹ Ene mupika ghomukamadi ghamumonine no ghatangire kughamba kowa hemanine eshi.''Oyu ne ghofotji ghopapagho!'' ⁷⁰ Ene ghakananine karo. Kapupi kamanana awa hemanine paya haghambire kwaPetrusi eshi,''Yoshemwa ghofotji ghopapagho yu, nowe mukaGalileya.'' ⁷¹ Ene ghatangire kukutura muyikuto no medhero.'' Ame mbadi namudimuka yo murume muna kughamba.'' ⁷² Ngondovoro kokwiya roghuwadi. Ndani Petrusi ghavurukire manando ghaJesusi agha ghaghambire kukwendi: ''Kughutho ghokwaya ngondovoro ruwadi,ghuna kunihamura paruhatu,''