¹ Kutunda po heyire muJerusalema, hakarire pepi naNethphage naBethany kumarundu ghondhwe, naJesusi kokutuma hakathishongero wendi hawadi ² nokughamba kukwawo eshi,''Muyende mumukunda oghu wa tutundakana. Apa shomukakume, nanyi mukawane thidongighana ethi hapira kudhina rumweya. Mukathighangunune nomukathirete kukwange. ³ Ngeshi keheyuno ghakone kamwipura eshi,'Nye muna kurughanena kemo?' Mukakone kuhutha eshi,'Fumu ghana thinyanda nonanyi ghakathihuthe popano.'' ⁴ Hayendire no haka wanine thidongighana ethi hawangere kuthero panunda, haathishuturire. ⁵ Hanu hamweya awa hemaninepo haghambire kukwagho eshi,''Nye eyi muna kurughana, kughangununa otho thidongighana?'' ⁶ Awo hakonine kuhutha thika di ghawatongwerire Jesusi no hanu hawathighire hakayende. ⁷ Hakaretire thidongighana thiya kwaJesusi nokuvukumenapo myaye dhawo no aye ghahungumanapo. ⁸ Thingi thohanu hayarire myaye dhawo mundhira nohamweya mite edhi hatetire mumapya ghawo. ⁹ Awa hayendire kughutho wendi no wa hamukuthire hakughererire ghughamba eshi,''Hosanna! Ghufumane oyu ghana kwiya mudina dyaFumu. ¹⁰ Ghafumane ghufumu oghu ghuna kwiya wa wihetuDavid! Hosanna mudiwiru!'' ¹¹ Jesusi gheyire muJerusalema noghengenine mutembeli nokukenga mitara dhodhiheya. Apa dhapitire nako, ghayendire kuBethany nowaya dikumi nohawadi. ¹² Mudiyuwa dyokurandako oku wona pakushwagha muBethany aye ghayuvire ndhara. ¹³ Ghakambekedha kwendi thitondo thoghukuyu ethi thakarire nomahako, ghahenyi kokwendi ghakengeko mbuyo kukwatho, ene kadighawanineko kehe dino dimbuyo shimengwa mahako pithagho,ayo yakarire eshi kadi thivaka thatho thokwima. ¹⁴ Ghaghambire kukwatho eshi,''Mbadiko karo keheyu mbo ghadya mbuyo kukoye.'' Hakathishongero wendi hayuvire yighamba yi. ¹⁵ Gheyire kuJerusalema no kwingena mutembeli ghatangire kuhanyaghura haghurithi nohaghuri wa hakarire mutembeli. Ghapiraghurire matishi ghawakakutjindja manyinga noyipuna yawo haghurithire maputukuwa. ¹⁶ Mbadi ghatawedhere kehe yuno mukupitura yinu mutembeli yokughuritha. ¹⁷ Ghawahongire nokughamba eshi,''Mbadi hayitjanga eshi,'Ndhugho dhange ne mbohana dhitoyo eshi ndhugho mandapero kumako ghamweya ndi?'Ene muna dhitendi eshi dhikare dhawedhi.'' ¹⁸ Haruti hashokuru nohakamarukwaro hayuvire eyi ghaghambire nohashanine ndhira dhokumupagha. Awo hamuyapire yoyishi mbunga dhodhiheya dhatetukire kuyihonga yendi! ¹⁹ Pakutokera diyuwa hashwayiremo muthitata. ²⁰ Oku wo pakuyenda mathikuthiku, hamonine thitondo thoghukuyu thina kukuta no midhi dhatho. ²¹ Petrusi kokuvuruka nokughamba eshi,''Muhongi,kenge! Thitondo thoghukuyu thiya wakutire ne thina kukutera.'' ²² Jesusi kokuhutha kukwagho eshi,''Mukare nomatawero mwaNyambi. ²³ Ghushemwa nakumutongwera eshi ngeshi keheyuno ghaghambe kodi dirundu,'wimane noghukuvukumene mudikuruviya,'no ngeshi mbadi ghana kutamangera mumutjima wendi ene nomatawero eshi yi ghanakughamba nanyi yihokoke, eyi yogha kutenda Nyambi. ^{24 26} Podiyo nakughamba kukwenu: Kukehe yinu muna kurapereritha nokwipura, tawe eshi mboghunayiwana no mboyinakara yoye. ²⁵ Pakwimana nokuraperera, wakona kuthigherera keheyino wakuharwera nakeheyuno, podiyo eshi wiho ghomudiwiru ghakuthigherere naye maharwero ghoye.'' ²⁷ Gheghire kuJerusalema karo. Oku Jesus pakuyenda mutembeli,haruti hashokuru,hakamarukwaro,no hakuru heghire kukwendi. ²⁸ Haghambire kukwendi,''Pangcamu munye ghuna yirughanena yinu yi. no dye ghakupa matawedhero ghuyirughane yinu yi?'' ²⁹ Jesusi ghaghambire kukwagho eshi,''Nakumwipura dipwero dyofotji. Munitongwere no nanyi nimutongwere eshi pangcamu munye nayitendanga yinu yi. ³⁰ Diyoghero dyaJohanesi ne kwashwaghere kuwiru ndi endi kwawanu? Munihuthere.'' ³¹ Hakuyongire mukatjikawo nokukukanana no kughamba eshi,''Ngeshi tughambe,'kudiwiru, nanyi ghaghambe,''Nyekeho twapirire kumutawa?' ³² Ene ngeshi tughambe,'Kwa wanu,'....'' Hayapire hanu,no kehe yuno ghadimukire eshi Johanesi ne muporofita. ³³ Podiyo ghahuthere Jesusi no kughaba eshi,''Mbadi shoni mutongwere eshi pangcamu munye nayitenderanga yinu yi.''