¹ Apa dyapwire diyuwa dyoSabata ,Maria Magdalena, Maria gho nyina Jakobus naSalome haghurire munde eshi heye no kunawetha yirama yaJesusi. ² Mathikuthiku thikuma mudiyuwa dyo kutanga muthivike, hayendire kumbira apa dyashwayire diyuwa. ³ Hakuningangire hathinda eshi,''Yidye shogha tundandumweneko diwe dishwaghe kuthero dhombira?'' ⁴ Apa hakapukire, hamonine eshi diwe dinapu kushwayithako,adyo dyakarire dyodikuru, ⁵ Hengenine nohamonine katughurughana yughavatire dipurapure dyodikenu, ghahungumanine kumutara ghorudyono hayapire. ⁶ Ghaghambire kukwagho ,''Mwayapa. Muna shana Jesusi ghomuka Nasareti, oyu hapamarerire. Ghana pu kuvumbura! Mbadimo muno. Mukenge padyango apa hana murangekire. ⁷ Ene muyende, mukatongwere hakathishongero wendi naPetrusi,'Ghana mupiterera kuGalileya. Oko ne nanyi mukamumone, thikakenge ghayimutongwere. ⁸ Hashwayire mumbira ghutjira; hatutumine nohayapire thikuma. ⁹ Mathikuthiku thikuma mudiyuwa dyokutanga muthivike apa ghavumbukire,ghatangere kumoneka kwaMaria Magdalena ghoyu ghashwayithire mipepo dhodhimango kwoko no dhiwadi. ¹⁰ Ghayendire noghakatongwere kowa hakarire nendi, oku wo hanaguvu nokudira.'' ¹¹ Hayiyuvire eshi muyumi ndani ghamumonine, ene mbadi hayitawire. ¹² Apa yapitire yi,ghahokokire muthishwi thokukutjaka kwahashawadi oku wone kuna kuyenda hengene muditunga. ¹³ Hayendire no hakatonwere hakathishongero hokuthiyarako ene kadi hakayitawire. ¹⁴ Jesusi ghamonekire kwawadikumi noyofotji oku wo kuna kudya patishi, noghawagcavire kukupira kutawa kwagho no kuku kukutitha mitjima, yoyishi mbadi hatawire wa hamumonine apa ghavumbukire mwawafu. ¹⁵ Ghaghambire kukwagho eshi,''Muyende mukaye kokaheya, nomukayaghure mbudhi dhodhiwa kumihoko dhodhiheya. ¹⁶ Oyu ghokutawa nokupwa kuyogha mboghanapu kughamwena, noyu ghokupira kutawa mboghana yongara. ¹⁷ Thidimukitho thino mbothina yendi nowa hokutawa: Mudina dyange mbohanapu kutjidha mipepo dhodhimango. Mbohana ghamba mandimi ghomapya. ¹⁸ Mbo hanayeyura yiyoka nonyara dhagho, no ngeshi mbo hanwe kehe yino yokufa mbadi mboyiwepitha. Mbohana kambeka nyara dhawo pawakorwi no mbohaneruka.'' ¹⁹ Pakumana kughamba nagho fumu, hamuyeyurire mudiwiru noghakahugumanine kudyoko dyorudyo dyaNyambi. ²⁰ Hakathishongero hayendire no hakayaghurire kokuheya, oku Fumu gharughanine nagho no ghakengurure manando mu thidimukitho ethi hayendire natho.