¹ Ghuye makura arupuka atundemo munya na kuya mudoropa yendi yamhvarerwa, varongwa vendi ava mukwama. ² Opo lya tikire liyuvha lya Sabata, ghuye ashongo muSinagoge. Vantu vavayingi vamuyuvire ntani vyavatetulire ngudu. Avaghamba ashi, ''Kuninko oko awana virongwa vino?'' ''Ghukonentu munke ghuno vamupa?'' ''Vitetu munke vino aruwananga namaghoko ghendi?'' ³ ''Oghuno muntu nani kapishi mushongi vipirangi, mona Maria wamumati ntani mukurwa Jakobus ntani Joses ntani Judas na Simon? Nani vauni vendi vavakadona munderepo muno mukatji ketu? Vavo vyava garapitire lya Jesus. ⁴ Makura Jesus ava tantere ashi, ''Muporofete kapi apiranga lifumadeko, nkwandi mu doropa yendi ya mhvarera na mukatji kaliro lyendi na mumundi wavo. ⁵ Ghuye kapi avulire kuruwana viruwana vyavinene kehevino, nkwandi kukambeka maghoko ghendi kuvaveli kumwe nakuva verura. ⁶ Ghuye vyamutetulire ngudu vavo kundereko mapuliro. Mpo ayendire mudi mukunda ashongange. ⁷ Mpo ayitire vanya murongo na vaviri atameke kuvatuma vaviri-vaviri, nakuvapa unankondo kupitakana mpepo dakunyata, ⁸ ntani ava rawiri mukupira kushimba kehe vino muruyendo rwavo, kundereko vyuma, mboroto, ndjato ntani navimaliva mumalimba ghavo. ⁹ na kudwata tupu vicamakaku, ngoli nakudwatashi makaranyana maviri. ¹⁰ Mpo avatantelire ashi, nange munangene mundjugho karenu momo, dogoro mpopo ngamutundamo. ¹¹ Nangeshi mpoyili doropa oyo ngayidiro kumu tambura ndiposhi kumutegherera, pakutundamo mu livango, kukukumunu mbundu da kumpadi denu, vikare ghumbangi kwavo. ¹² Vavo makura avarupuka vakayuvite ashi vantu vakushighure. ¹³ Vatjidire ndemone dadingi, nakuwaveka vaveli na maghadi kumwe nakuvaverura. ¹⁴ Hompa Herod opo aviyuvire vino, morwa lidina lya Jesus kwakalijre linayuviki shiri unene. Vamwe kwa ghambire ashi, ''Johanes muyoyi ana rambuka kuvafe, mbyo ana wana nkondo da kuruwana vitetu vyavinene ngoli.'' ¹⁵ Vamweya ava ghamba shi, ''ndje Eliya,'' Shimpe vamwe ashi, ''Ndje muporofete, yira mbovanya vaporofete vaku kakuru kakare.'' ¹⁶ Ngoli Herod opo aviyuvire mpo aghambire ashi, ''Johanes ogho natetiro mutwe, anakavumbuka kuufe.'' ¹⁷ Mukonda shi Herod kwatumine vakakwate Johanes nakamutura mu dorongo, konda ya Herodias ( mukada muUnyendi Filipusi), morwa amukwalire. ¹⁸ Mora Johanes kwantilire Herodes ashi, ''Kapi vyapulitira paveta ghukware mukada muunyoye.'' ¹⁹ Ene ngoli Herodias kwakalire na nkoko na Johanes mumutjima wendi ashanine kumudipaya, Ene ngoli kapi ghavivulire, ²⁰ Mukondashi Herodes kwa tjilire Johanes; aviyivire ashi ghuye mukafumu wa muhungami ntani mupongoki, ghuye amu tura mulipopero. Kagarapanga opo kamuteghereranga, nampili ngoweyo ghuye kamuteghereranga naruhafo. ²¹ Makura liyuva limwe lyaliwa lyatikiremo olyo gha gwanitire Herodes mpo ghawapayikire murarero kuvakutikwa vendi, vapititiri vavaka vita nava mpititi vamu Galileya. ²² Mona Herodias wamukadona pamwene aya avadanenepo, makura a vahafita unene Herodes na vagenda vendi ovo ayitire kumurarero. Hompa mpo aghambire kumukadona unya ashi, ''Mpure tupu kehe vino unashana ame kunivikupa.'' ²³ Ghuye aghana nakugha ashi, ''Kehe vino ghumpura ame, kunivikupa, dogoro ukahe wa Uhompa wande.'' ²⁴ Mukadona makura arupuka nakupura vawina ashi, ''Vinke ovyo nikamupra?'' vawina avaghamba ashi, ''Mutwe wa Johanes muyoyi.'' ²⁵ Mpopo mukadona avyukirimo nakatantera Hompa ashi, ''navishana ghumpe, mpopano, mutwe wa Johanes pa shisha shashipirangi. ²⁶ Nampili ngoli vyamu garapitire unene hompa, kapi avulire kushwena kovyo amurombire mukadona konda ya mughano ogho atulirepo kwendi ntani mukonda ya vagenda vendi. ²⁷ Makura hompa mpo atumine lirenga lyendi nakumutantera ghakayite mutwe wa Johanes. lirenga alaiyendi nakamuteta mutwe mudorongo. ²⁸ Lyalyo alikayita mutwe pashisha nakughutapa kwa mukadona, mukadona mpo aghu tapire kuva wina. ²⁹ Opo vaviyuvire varongwa vendi, mpo vayire nakuyashimba rutu rwendi kumwe nakarutura mumbira. ³⁰ Va Apostoli mpova yire kumwe na Jesus nakumutantera navintje ovyo vakaruwanine novyo vaka shongire. ³¹ Ghuye avatantere ashi, ''Yendenu panaghumwenu mukashane livango lyalikenu olyo mukavura kapwiyumuka kadidi.'' Mbyovyoshi vayingi vayiro kuno vamwe kuna kutundapo opo palivango vakalire, kapi vawanine ruvede rwa kulya. ³² Mpo varondire muwato vatundepo opo palivango, naku yenda kulivango lyamaporeya oko vakavulire kukara pentjavo. ³³ Ngoli vangi vavamonino opo vatundire palivango linya, ntani vangi vavadimburuliro, vantu mpo vadukire parupadi vayende nkoko kulivango vatambire , vavo kwatundililire mudoropa nadintjeya, kumwe nakatika kumeho yavo. ³⁴ Opo vayatikire paliyenga, amono mbunga yayinene yinapongopo mpo avafelilire nkenda kondashi vavo kwakalire yira ndjwi dahana muliti. Makura atameke kuvashonga vininke vyavingi. ³⁵ Opo lyatokire liyuva, varongwa vendi avaya kukwendi naku ghamba ashi, ''lino livango lyamuporongwa liyuva nka linatoko kare. ³⁶ Vatume vayende mumaruha ghashirongo namu dimukunda vaka ghureko vyakulya naumwavo valye. ³⁷ Ghuye avalimburura nakughamba ashi, ''Anwe naumwenu munakona kuvapa ovyo valya .'' Vavo avaghamba kwendi ashi, ''Kuvura tuyende tukaghure mboroto damulyo wa visiliveli mafere maviri tuyavape vayalye ndi?'' ³⁸ Ghuye mpo avapulire ashi, ''Dimunje da mboroto dingapi munakara nado? Yendenu mukakenge.'' Opo vakamanine kukengamo, ava ghamba ashi, ''Dimuntje da mboroto ntano na Ntjwi mbiri.'' ³⁹ Ghuye makura arawiri vantu navantje vashungire mutumbunga pamushoni washinamahako. ⁴⁰ Vavo avashungiri mutumbunga twa mafere na dimurongo ntano. ⁴¹ Mpo aghupire mboroto ntano na Ntjwi mbiri, makura akankuka akenge kuliwiru kumwe nakudikandayika na kubamuna mboroto kumwe nakuditapa kuvarongwa vendi vatapere vantu. Ghuye ataperenka Ntjwi kuvarongwa vendi navantje, vatapere mbunga nayintje. ⁴² Navantjeya valire dogoro kukuta. ⁴³ Varongwa vendi ava ghongawida ovyo vya bomaghukiro ku mboroto, ava yuda vikumba murongo naviviri, ntani naruhupwa rwantjwi. ⁴⁴ Kwakalire vantu mayovi matano ovo valiro kudimuntje damboroto. ⁴⁵ Mpopo tupu makura atantere vakashishongero vendi varonde muwato vapite kumeho vayende mushelimunya, mu Bethsaida, okuno ghuye kuna kutantera mbunga nayintjeya vakuharagane. ⁴⁶ Opo vakuharaganine navantjeya , makura ghuye ayendi kundundu akaraperere. ⁴⁷ Opo yatikire ngurova wato wagho pakatji kalifuta , ghuye pentjendi pa urundu. ⁴⁸ Ghuye adimburura ashi vavo kunakudugha wato wavo naudito, mukondashi mpepo kwatundilire nkoko vatambire, muruvindwira lyalyo liyuva kushana like, Mpo ayendire pawiru ya mema ghalifuta, ghuye kwashanine ava pite. ⁴⁹ Ngoli opo vamukengire nakuyenda pawiru ya mema, avaghayara ashi walye urumba-rumba, ava takuma, ⁵⁰ mukondashi vamumonine vavo nka vanatukukire. Mpopo makura aghamba na kuvatantera ashi, ''Karenu munakwata dimutjima! Ame ! Mwasha tukuka!'' ⁵¹ Mpo arondire naye muwato kumwe navo. Makura mpepo nayo ayikutura kuyunga. Vavo aviva tetura unene ngudu. ⁵² Mpiri momu vakengire Jesus anavukita mboroto na ntjwi, vavo kapi vayivire ashi unankondo munke akara nagho Jesus. Ene ngoli, dimutjima davo dandundumanine. ⁵³ Opo varutire musheli munya, vavo kwayire ku livhu lya Gennesaret ava shegheke wato. ⁵⁴ Opo vatundire muwato, mpopo tupu, vantu avavadimburura, ⁵⁵ vavo avaduka mulidingonoko mukunda namuntjeya kumwe nakuvareka kuyita vaveli namauro ghavo, kehe kuno vayuvire ashi nko anakara. ⁵⁶ Kehe kuno angenine mudi mukunda, ndi mudoropa, ndi mu shirongo, vavo kwatulire vaveli mumavango ghakughulitira. Kwamukandelilire avapulitire vakwate kughuhura walirwakani lyendi ghungi wavo vakwatireko vaverukire.