¹ Shimpe nka Jesus Kristus kwayendire mu ntembeli, mwamo kwakaliremo ngoli mukafumu walivoko lyakutuva. ² Vantu vamwe kwamunominine vakenge ashi Jesus kuvura amuverure muliyuva lya Sabata ndi ,mposhi vawanene po mpito yakumurundira. ³ Jesus mpo aghambire kwamurume walivoko lyakutuva ashi" Shapuka naku yimana pano mukatji kanavantje." ⁴ Makura mpo aghambire kuvantu ashi, " Vyapulitira paveta kuruwana uwa ndi udona muliyuva lya sabbata; mu kuyovora monyo ndi kudipagha? " Ngoli navantje kwamwenine. ⁵ Ava kengurura navantje naugara, ntani aguvire unene kughukukutu wadimutjima davo , uye aghamba kwamukafumu unya ashi, '' ghonyonona lighoko lyoye." mukafumu aghonyonona lighoko lyendi makura averuka. ⁶ VaFariseyi makura ava rupukamo mpopo ava tameke kutunga maghano kumwe nava Herodians ashi weni omo ngavamudipagha. ⁷ Makura Jesus, kumwe nava kashishongero vendi, avayendi kulifuta, na mbunga yavantu ayigogomoka yivakwame kutunda ku Galileya naku Judea. ⁸ Ntani kutunda ku Jerusalem naku Idumeya ntani na kusheli kunya ya Jorodani naku kundurukida Tyre na Sidon.Opo vayuvire ovyo ana kuruwana mbunga yayinene mpo yayire kwendi. ⁹ Uye atantere varongwa vendi vamuwapayikire ko wato waudidi mukonda yambunga, mposhi vapire kumu umbilikida ¹⁰ Mbyovyoshi uye kwaverulire vavayingi, makura keheuno akaliro nauvera kwakalire nalirwameno ashi amushuwenene mukurenkera amukambeke livoko. ¹¹ Kehe pano kadimukenganga mpempo dakunyata , kadi kuganderanga kumeho yendi nakutakuma unene, nakughamba ashi, '' Ove mona Karunga . ¹² Uye kadirawiranga shankondo-nkondo mukupira kumuyivita. ¹³ Uye makura akanduka kundundu, nakuyita ovo vamuyendiro kumutjima , vavo avaya kwendi. ¹⁴ Aneghemo murongo navaviri (ovo arukire ashi va Apostoli ) mpo shi vavhure kukara kumwe naye ntani vavure kuvatuma vakayuvite mbundi yaruhafo ¹⁵ ; ntani vakare nankondo dakutjira mpepo dadidona dirupuke. ¹⁶ Ahangura murongo navavili : Simon ogho arukire lidina ashi Petrus; ¹⁷ Yakobus mona Zebedeus, ntani Johanes muunya Yakobus , ogho arukire lidina Boanerges, vavo vo, vana varuvadi, mukonda ya upampi wavo yira ruvadi ¹⁸ ntani Andrias, Filipus, Bartholomeus, Matheusa, Thomasa, Yakobus mona Alfeus, Thadeus, Simon, Murwameni murwameni wamunene, ¹⁹ ntani Yudas Iskariot, ogho ngamuulito. ²⁰ Makura mpo ayendire kumundi, na mbunga mpo yapongire nka waro, nomo valya mboroto namu mweshi. ²¹ Opo vaviyuvire va liro lyendi, avayendi ashi vakamukwate, ava ghamba ashi, ''Ana purumuka.'' ²² Vashongi vamatjangwa ovo vatundiro ku Jerusalem ava ghamba ashi, ''Uye kwa kara na Beelzebul'' ntani ''Ghuye kutjida mpepo dadidona na nkondo damupangeli wampepo dadidona.'' ²³ Jesus makura avayita vayekwendi nakuva tantelire mushishewe ashi, ''weni omo Satana avura kutjida Satana? ²⁴ Nangeshi uhompa vana ghu gaununa ukurwanite wene nawene, ogho uhompa kapi ngauvura kuyimana upame. ²⁵ Nangeshi lipata ali kuhangura vakurwanite vavene navavene olyo lipata kapi ngalikarapo, ngalihanauka. ²⁶ Nange ashi Satana ashapuka akurwanite mwene ntani aku hangure, kapi avura kuyimana, ano ashi anashagha. ²⁷ Ntani kundereko wakuvura kungena mundjugho ya muntu wa nkondo na kuvaka limona vyendi, ahana kumu manga pamuntango, ogho mukafumu wankondo, ntani avura kufukaura mundjugho yendi. ²⁸ Vya ushiri nakumutantera ashi, ndjo nadintje davana vavantu ngava divaghupira po, nampiri makutumbo naghantje vaghambanga, ²⁹ Ano ngoli kehe uno wakushwaghura mpepo ya kupongoka narumweshi ngawana maghupirapo, mbyovyoshi ghuye nga kara munandjo kunaruntje.'' ³⁰ Jesus kwavi ghambire vino mukondashi vavo kwaghambire ashi, ''Ghuye akalire na mpepo dakunyata.'' ³¹ Makura vawina nava uni vendi vavamati mpo vayire ava yimana pandje. Ava mutumini, shankondo nkondo. ³² Mbunga kwa shungilire yina mukundurukida, ava mutantere ashi, ''Vanyoko nava uni voye vavamati pandje vanakara, kunakukushana.'' ³³ Ava limburura ashi ashi, ''Vanane navauni vande munke?" ³⁴ Apiruka nakukenga ovo vashungiliro van mukundurukida nakughamba ashi, ''Kengenu, avano mbo vanane nava uni vande! ³⁵ Kehe uno wakuruwana mpangera yaKarunga, ogho muntu ndje muunyande wamu mati naghu wamukadona ntani mbo Vanane.''