¹ Kwa kalire ngoli mayuva maviri ko Paska yitike nashilika shaMboroto yakupira vifulito. VaPristeri vavanene nova kurongi matjangwa ghava kengururapo ashi weni vayenda nawa -nawa va kwate Jesus dogoro vaka mudipaghe. ² Vavo kwaghambire ashi, ''Kapishi pashilika, morwamanashi ngalikara likuponge na djorongani mukatji kavantu. ³ Uye Jesus shimpe muBetani mundjugho yaSimon wamu navingondwe, uye kuna kulya kuntishe, mukamali ghumwe amuyere nalikende lya maghadi ghandiro unene ogho vapira kuhaura. Ataghura likende nakutera maghadi ghanya pamutwe wendi. ⁴ Ano ngoli pakalire vamwe ovo vyagarapitire. Ava ghamba mukatji kavo nakutanta ashi, ⁵ "Maghadi ghano ndi kuna gha ghulita kupitakana mafere matatu, nakutapera kuvahepwe.'' Makura ava muharukiri nakumukwiyilira mukamali unya. ⁶ Makura Jesus aghamba ashi, ''Mushuvenu. morwa nke muna kumu yoronganena?' Ghuye ana nduwanene shininke shashiwa unene. ⁷ Vana ruhepo navo mwakaranga kehepano, ntani kehepano muna shanene kuvhura tupu muva ruwanene ghuwa, ngoli ame kapi nga mukara nga name kehepano. ⁸ Ana ruwana ovyo ana vhuru. Ana wavekere rutu rwande lihoreko. ⁹ Ushiri naku mutantera ashi, kehe kuno va yawira nga mbudi yoyiwa muudjuni nauntje, ovi ana rughana ghuno mukamali, ngava vighamba mukumu vurukirapo.'' ¹⁰ Makura Judas Iskariot, ghumwe wavo ronambiri, mpo ayendire atundupo ayende kuvaPristeri vavanene mpo ashi a vhure kukamushorora kukwavo.'' ¹¹ VaPristeri vavanene opo vaviyuvhire, kwa hafire nakumutwenyidira kumufuta maliva. Mpo a varekire kushana shana mpito yakumutapa kwavo vamukwate. ¹² Muliyuva lyamuhovo lyamboroto yakupira kuduva navifulito, opo vadjambire ndjwi yaPaska vaka shishongero vendi ava mupura ashi, ''kuni ghuna tushanene tuyende tukakuwapayikire, mposhi uvhure kukalyerako ndya daPaska?'' ¹³ Atumu varongwa vendi vaviri nakuva tantera ashi, ''Yendenu mushitata, kumuka gwanekera namukafumu ana shimbo kavaya ka mema. Kamukwamenu. ¹⁴ Oko akangena mundjugho, mukamukwamenene nakumu tantere mwenya ndjugho ashi, 'Murongi kuna tanta ashi, ''Kuninko ndjugho yande yavagenda omo nikalyera paska navarongwa vande ?'' ¹⁵ Ghuye kwaka munegheda nkonda yayinene yakaro navitafu navipundi yakuwiru vawapayika nawa kare. Muka ruwane marongikido moomo?'' ¹⁶ Varongwa ava tundu po vayende kushitata. Ava kawana vininke navintje moomu ana va tantere, makura ava wapayiki ndya da murarero wauhura. ¹⁷ Opo ya kalire ngurova, aya navo murongo navaviri. ¹⁸ Vavo vanashungiri kuntishe kuna kulya, Jesus aghamba ashi, ''Ushiri na kumutantera, ghumwe wenu ogho ana kulyo name ngaka ntjorora.'' ¹⁹ Navantje ava guvhu unene, ava ghamba umwe naghumwe, ''Kapishi walye me ?'' ²⁰ Jesus aghamba nakuva limburura ashi, ''Ghumwe wava ronambiri, ndjeghu ana kuverero mboroto mushisha name. ²¹ Mona muntu nga kayenda yira moomu tupu vatjanga kuhamena kwendi. Ene ngoli lihudi kogho muntu omo ngalipitira lishororo lyaMona Muntu! Kwendi hasha Ndi kapi vamu shampurukire.'' ²² Vavo kuno kuna kulya, Jesus a ghupu mboroto ayi tungiki, nakuyibamuna. Ayi va pa nakutanta ashi, ''Ghupenu. Runo ndo rutu rwande.'' ²³ Aghupu nkinda, apandura, naku yivapa, navantje mpo vanwinemo. ²⁴ Aghamba kwavo ashi, ''Yino ndjo honde yande ya ligwanikilito, oyo ya tekangerero vavayingi. ²⁵ Ushiri na kumutantera ashi, kapi nganinwanka vya nyango yino ya shindjembere dogoro liyuva olyo ngani kavi nwa upe mughuntungi waKarunga.'' ²⁶ Opo vayimbire rushumo, ava rupuka vayende kundundu yama ghuywe. ²⁷ Jesus mpo aghambire kwavo ashi, ''Namuvantje ngamu wako, kutjanga vatjanga ashi, ''ngani toghona muShita makura ndjwi ngadi kuhana. ²⁸ Ngoli muruku rwapo ngava ndambwita, ngani mupititira tuyende mu Galileya.'' ²⁹ Petrus aghamba kwendi ashi, ''Nampiri navantje ngava vyuke muruku, ame kapi ngani vyuka muruku.'' ³⁰ Jesus agahamba kwendi ashi, ''Ushiri nakuku tantera, matiku ngoghano, kumeho yakuka yiya shikondomboro sha uviri ove una nkanana vikando vitatu.'' ³¹ Ngoli Petrus aghamba ashi, ''Nange vyakufa nove nifa, Kapi ngani ka kukanana. ''Navantje ava ruwana li twenyidiro lyakuku fana. ³² Mpo vayire kulivhango vatwenyanga Gethsemane, Jesusa atantera varongwa vendi ashi, ''Shungirenu pano ruvede oro nakuraperera.'' ³³ Aghupupo Petrus, Jakobus, na Johanes ava yendi naye naku tameka kugcunya kumwe naye. ³⁴ A ghamba kwavo ashi, '' Monyo wande ghuna guvhu ngundu, dogoro pantambo yamfa. Karenu mpopano muvangarare, kapishi murare.'' ³⁵ Kwa yenda ko tupu kadidi, Jesus awere palivhu nakuraperera ashi nangeshi kuvhura vili yi mu pitakane. ³⁶ Aghamba, ''Abba, Vava, vininke navintje kutikamo nange ove unapanga. Ngupe yino nkinda yno. Ngoli kapishi momu napangame, ngoli moomo unapanga ve.'' ³⁷ Aka vyuka kuya vawana vanarara, mpo aghambire kwa Petrus ankumupura ashi, "Simon ghuna rara? Kapi ghuna vhuru kukengerako viri yimwe? ³⁸ Vangarara nakurapere mpo ashi ghupire kungena mumasheteko. Mutjima ne yii unashana, Ano ngoli rutu kundereko nkondo.'' ³⁹ Shimpenka atundupo a karaperere, Uye kwa ruwanitire nkango dakukufana. ⁴⁰ Apa aka vyukirenka, a va wana vana rara, mantjo ghavo kwaditopire mukupahuka vakenge. Vavo vapi vayivire ovyo vamutantera. ⁴¹ Aya shikando sha Utatu aya va tantere ashi, ''Anwe shimpe hamwararera naku pwiyumuka po? Makura ngoli ! Vili yina tiki. Kengenu! Mona muntu kuna kumu shorora nakumutapa mumaghoko ghava nandjo. ⁴² Shapukenu, tuyendenu ko. Kengeni ogho ana ku ntjororo pepi ana kara.'' ⁴³ Ghuye shimpe kuna kughamba, Judas ghumwe wavo murongo naviri, aya tiki, na mbunga yayinene ayire nayo na marufuro na dimuramu, kutundilira kuva Pristeli vavanene, vakurongi matjangwa, nava kurona yenditi. ⁴⁴ Pano mushoroli ghuye ana vapa shineghedito, nakughmba ashi, ''muntu ogho nika ncumita ndje ndjegho. Mukwatenu mumu ghupepo muli kungo.'' ⁴⁵ Opo aya tikire Judas, mpopo tupu aya dogoro kwa Jesus nakughamba ashi, '' Rabbi ntani ghamu ncumitire. ⁴⁶ Makura ava mukwata. ⁴⁷ Ngoli ghumwe wavo ogho a yimanino pepi a pweyura rufuro rwendi nakuteta litwi lya mukareli wamu Pristeri wamunene. ⁴⁸ Jesus aghamba navo nakuvatantera ashi, ''Anwe kuya yira, kuna yera muwidi, na marufuro nadimuramu muya nkwate? ⁴⁹ Opo kani yusharanga nanwe nakuronga muntembeli, vinke mwapilire kunkwata. Ngoli vino kwaviruwanenine mposhi matjangwa ghatikemo. ⁵⁰ Navantjeya ovo vakaliro naJesus ava mushuvu vakaduke. ⁵¹ Mukafumu ghona, a dwatiro mudwatao wa likeshe olyo vamudingilire, a kwama Jesus. Opo vamukwatire vakafumu ⁵² ashuvu likeshe linya aka duke shintjentja. ⁵³ Ava mutwara naka muyimika Jesus kumeho ya mu Pristeri wamu nene. Oko nko vaka pongire va Pristeri vavanene, vakurona, nava kurongi vamatjangwa. ⁵⁴ Kuno Petrus uye kuna kumukwama kantando, dogoro ku shipanga sha mu Pristeri wamunene. ashungiri mukatji kava kungi, ovo vayotiro mundiro. ⁵⁵ Vavo vaPristeri vavanene nambunga yenditi yava Juda vavo kuna kushana ghumbangi wakumu rundira mposhi vavure kumu dipagha. Ngoli kapi va vulire kughuwana. ⁵⁶ Vavangi kwa mutapelire ghumbangi wavi pempa, ngoli maumbangi ghavo kapi aku wire. ⁵⁷ Vamwe ava shapuka va tape maumbangi ghavi mpempa muku murundira, ava ghamba ashi. ⁵⁸ ''Twa muyuvire a ghambire ashi, "Ame ngani yungurura yino ntembeli varuwana namaghoko, na kudikapo nayopeke nahana kuruwanita maghoko,'' ⁵⁹ Shimpe nka maghumbangi ghavo kapi ghakuwire. ⁶⁰ MuPristeri wamunene ashapuka mukashi kavo nakupura Jesus ashi, ''unakarako na nkumbu ndi ? vinke vino vana kukutapera maumbangi vano vakafumu ? ⁶¹ Ano ghuye kwa mwenine teete nankumbushi. Shimpe nka MuPristeri wamunene amu pura ghere nakughamba ashi. ''Ove Kristusa ndi, mona Karunga ogho tuvura kuraperera? ⁶² Jesus aghamba ashi, Yii Ame, ntani ngamuka kenga mona muntu omo ngaka shungira kulighoko lya rulyo lya nkondo na kupangera kumwe navaVava na kuya pamaremo gha liwiru. ⁶³ MuPristeri wamunene ataura lirwakani lyendi nakutanta ashi, ''shimpe tuna hepa va ngambi ndi? ⁶⁴ Munayuvu ghukupaki wendi. Nke litokoro lyenu?'' Navantjeya ava mukandwiri kulidjonauko yira ndjeghu awapeliro mfa. ⁶⁵ Vamwe ava tameke kumu tipira ntani nakumufika kushipara naku mutoghona naku mutantera ashi, ''Pumba !'' Vakavita ava mughupu naku mutoghona. ⁶⁶ Paruvede oro Petrus ghuye palivhu mulirapa, ghumwe wava kareli, vavakadona vamuPristeri wamunene amu yere. ⁶⁷ Amono Petrus kuna kukukangumuna ntani amukenge nakumu shuwenena papepi nakughamba ashi, ''Nove kaghukaranga namuka Nazareth, Jesus'' ⁶⁸ Ngoli ghuye akanana, nakughamba ashi, ''Kapi nakuyiva ndi nikwate lighano ovyo unakughamba,'' Makura atundupo akayenda kundjira yakulivero. ⁶⁹ Ano mukareli unya wamukadona amumonine atameke kughamba nka kovo vayimanino po ashi, ''Oghu mukafumu ghumwe wavo!'' ⁷⁰ Ngoli shimpe avikanananka. kuruku ya karugho ghona tupu vanya vayimanino po ava ghamba kwa Petrusi, ''Ushiri-shiri ove wavo, morwa ashi ove muGalileya.'' ⁷¹ Uye atameke kukufinga mwene nakughana ashi, ''Ame kapi namuyiva ogho mukafumu munaku tanta.'' ⁷² Shikondomboro mpopo ashi yighi shikando shauviri. makura Petrusi a vhuruka nkango dinya ghamu tantilire Jesus ashi. ''Kumeho yakukayigha shikondomboro rwauviri, ove ngaukankanana rutatu," ''Makura a guvhu unene nakutameka kulira.