¹ Makura Jesus atameke kuvaronga navifanikito. Aghamba ashi, ''Mukafumu ghumwe kwatapekire shikunino shamandjembere, agumbuko gumbu kushi kundurukida shikunino nashintje, Atimi likwina lyakukamena. Atungirimo ruhungu rwakunomenena makura asheshedita shikunino sha mandjembere kuva kakulima mandjembere. Makura uye ayendi ruyendo kushirongo nashopeke. ² Pashirugho shamuyangu, uye atumu mukareli wendi aka shimbeko ruha rwendi rwa muyangu ororwamutumbukiro kushikunino shendi shamandjembere. ³ Ngoli vanya avakamukwata, ava mutoghona, ntani vamutjidire avyuke maghoko-ghoko ahana vintu. ⁴ Waro nka ava mutumini mupika ghumwenka, makura ava kamuremeka mumutwe nakumuruwanita nalishwaghu. ⁵ Shimpe nka waro atumuko mupika ghumwe, ghuno ghuye avamudipagha. Vavo kwaruwanitire vavangi murupe rwakukufana, vamwe kuvatoghona vamwe kuva dipagha. ⁶ Ghuye shimpe nka akalire naghumwe wakuvhura kutuma, monendi wamumati ogho ahora unene. Ghuye ndje ghumwe wakuhulilira atumineko kwawo, aghamba ashi ngava kamufumadeka monande. ⁷ '' Ngoli vanandima vamandjembere opo vamumonine ava kutantere tantere ashi, 'Kengenu, anakayako ngoli mona mwenya shikunino, uno ndje ngoli ngapingo shikunino shaVashe. Tokwenu tumu dipaghe, makura upingwa ngaukare wetu.' ⁸ Ava mukwata, ava mudipagha, ntani ava muvukuma pandje yashikunino. ⁹ Mposhi, vinke nga ruwanako mwenya shikunino? Ngaya na kuya djonaura vandimi vamandjembere na kuya tapa shikunino kwavapeke. ¹⁰ Kapi mwa varura mumatjangwa ashi? Liwe olyo vashwenine vadiki kuruwanita vayalirenkire likare ngundi yamuhuka. ¹¹ Evi kwa tundililire kwa Karunga, ntani vyavyo avi kara viwa unene mumantjo ghetu." ¹² Muruku rwavino vampititi vava Juda mpo vashanine ndjendito yaku mukwata Jesus mukondashi vavo kwatire lighano shitegho osho aghambire mbo atambire. Ngoli vavo kwatjilire mbunga. Makura avatundupo avakayenda. ¹³ Makura ava tumu vaFariseyi vamwe ntani navaka Herodians kukwendi, vakamu rakashe nankango. ¹⁴ Opo vayire, ava mutantere ashi, ''Murongi, atwe twayiva ashi ove kapi wakara nashinka kumaghano agha keheghuno, ntani nka kapi waneghedanga likuhanguro pakatji ka vantu. Vya ushiri ove kuronga ndjira yaKarunga. Vya pulitira kufuta Mutero kwaHompa wamunene ndi hawe?'' Kuvura tufute ndi hawe?'' ¹⁵ Ano ngoli Jesus ayivire ghuvikupaki wavo nakuva tantera ashi, ''Vinke munaku ntjetekera ame? Yitenu Denarius mposhi niyikenge.'' ¹⁶ Ava yitako Densrius yimwe kwa Jesus. Aghamba kwavo ashi, ''Shishwi share shino shinakaro pano?'' Ava ghamba ashi, ''Siza.'' ¹⁷ Jesus aghamba ashi, "Tapenu kwa Siza vininke vyamutumbukura kwa Siza ntani Tapenu kwa Karunga ovyo vya tumbukira kwa Karunga. Vavo mpo vatetukira. ¹⁸ Makura va Saduseyi, ovo vaghambiro ashi kundereko livumbuko lyavafe, avaya kwendi. Ava mupura nakughamba ashi, ¹⁹ ''Mushongi, Moses kwatu tjangilire twe ashi, 'Nangeshi mukafumu afita mukurwendi ndi mughunyendi ghuye ashuve mugholikadi wendi, ghuye kundereko mona oghona anashuvupo, murume kuvura tupu kushimba ogho mukamali, nakukulita rutanga rwa mughunyendi ndi mukurwendi.'' ²⁰ Kwakalire vaghuni navakuru vatano navaviri vavakafumu, wakuhova akwara mukadi makura ghuye mpo adohorokire, kwato mona ogho ashuvirepo. ²¹ Makura wa uviri amughupu amukwara naye afu ngoli naye kapi ashuvirepo mona, wa Utatu naye nka mushikwavo. ²² Wa untambiri naye kwato mona ayashuvirepo. muruhulilira, mukamali naye mpo adohorokire. ²³ Muli vumbuko vyavafe, opo ngava kavumbuka, mukamali ware ngaka karo? Vavo navantje mughu tano nauviri wavo vamukwalire.'' ²⁴ Jesus aghamba nakuvatantera ashi, '' Yino kapishi ndjo konda muna karere mulipuko, mbwovyoshi anwe kapi mwayiva matjangwa ndi mposhi nkondo da Karunga? ²⁵ Morwa opo ngavaka vumbuka kughufe, kapi ngava kwara ndi vavatape munkwara, ngoli vavo yira va Engeli vamu liwiru. ²⁶ Ano ngoli vyakuhamena livumbuko lyavafe, Kapi mwavarura mumbapira ya Mosesa, Vyakuhamena kushishwa, weni omo aghambire Karunga kwendi nakughamba ashi, ''Ame Karunga waAbrahamu, Ame Karunga waIsaka ntani Karunga waJakop'? ²⁷ Ghuye kapishi karunga waVafe, ngoli waVayumi. Anwe mulipuko munakara.'' ²⁸ Ghumwe wava kurongi vamatjangwa ayire makura ayuvu ovyo vakuyongire; amonine ashi Jesus kwava limburulire mughuhunga. Amupura ashi, ''Muragho munke wamulyopo unene kudimuragho nadintje? ²⁹ Jesus a limburura ashi, ''Shamulyo unene shino, Yuva, Isragheli, Hompa Karunga wetu, ndje Karunga Pentjendi. ³⁰ Una kona kuhora Hompa Karunga ghoye namutjima ghoye naghuntje, na Monyo ghoye na ghuntje, naMaghano ghoye naghantje, ntani naNkondo doye nadintje. ³¹ Muragho wauviri oghuno, 'Una kona kuhora unyoye, momo wakuhora ghumoye'. Kundereko nka muragho umwe wakupitakana dino.'' ³² Murongi wa ndaka aghamba ashi, ''Murongi wamuwa ! Unaghamba muushiri ashi Karunga ghumwe tupu, ntani kundereko nka ghumweya kuupako uye. ³³ Muku muhora namutjima nauntje na likwato lighano na nkondo detu nadintje, ntani hora unyoye momu wakuhora ghumoye ya pitakana vitapa na ndjambo dakushwakerera. ³⁴ Opo avimonine Jesus ashi atapitire lilimbururo lya ukonentu, amu tantere ashi, ''Anwe kapishi ure muna kara na Uhompa waKarunga.'' Muruku rwavyo, kwato nka ogho akaliro namutjima ashi apure Jesus mapuro. ³⁵ Ghuye Jesus kuna kushonga mutunkonda twa muntembeli, aghamba ashi, ''Weni omo vaghamba varongi vamatjangwa ashi Kristusa ne mona David waMurume? ³⁶ David naghumwendi., mu mpepo ya kupongoka, kwaghamba ashi, Hompa kwa ghambire kwa Hompa wande ashi, ''Shungira kurulyo rwande dogoro mpopo ngani tura vanankore voye vilyatero vyampadi doye. ³⁷ David naghumwendi kwakuyitire naghu mwendi ashi, 'Hompa,' Makura weni omo Kristus akara mona David wamurume?'' Mbunga yayinene yamu teghereliro nawa naruhafo. ³⁸ Mumarongo gha Jesus aghamba ashi, "Karenu muna vangara kuva vikupaki vama tjangwa, ovo vahoro kuyendaghura mumarwakani ghamare naku kumora ghura mumavango gha maghulitiro. ³⁹ Ntani vakara navipuna vyalikuto unene mu Sinagoge ntani muma vango ogho vashambereranga vipito. ⁴⁰ Vavonka kudjonaghura ndjugho dava fitavya, ntani kuraperera ndapero dadire, mposhi vantu vavamone. Ava vaka fumu ngava wana mpanguro yayinene.'' ⁴¹ Makura Jesus kwa shungilire ghuye anakuvyukiliri na shimbangu shavitapa mu Ntembeli, Ghuye akengere vantu ovo vatuliro maliva ghavita mushimbangu. ⁴² Makura mufitavya waruhepo ayaturamo naye tungcengcere tuviri, twakupitakana vingcengcere. ⁴³ Ayita varongwa vendi ntani aghamba kwavo ashi, ''Ushiri nakumutantera, ghuno mufitavya waruhepo ndje atuliremo vyavingi kupitakana navantjeya ovo vatapire vitapa mu shimbangu. ⁴⁴ Mora navantjeya kwa tapire papanene. Ano ngoli oghuno mufitavya ghuye kwaya tuliremo vimaliva navintjeya ovyo kasha ghapuruke navyo vyamuruhepo rwendi.''