¹ Jesus atundupo pa livango linya kumwe na kuyenda kumbindakano ya mukunda wa Judeya musheli munya ya mukuro waJorondan, na mbunga ayiya nka kwendi. Shimpe nka ava rongo, yira moomo tupu kavi ruwananga nakare. ² Makura vaFarisayi ava mu yere vamusheteke nakumupura ashi, ''Vyapulitira paveta mukafumu akugaghunuke namukamali wendi ndi?'' ³ Ghuye alimburura ashi, ''weni amurawilire Moses?'' ⁴ Vavo ava ghamba ashi, Moses apulitilire mukafumu atjange mbapira yalitjoro kwara na kuvyuta ko mukamali.'' ⁵ ''Mukonda yadimutjima denu dadikukutu mpo gha mu tjangilire dino veta,'' Jesus aghamba kwavo ashi. ⁶ "Ngoli kutunda kuntateko yalighungo, Karunga kwava shita mukafumu namukamali.'' ⁷ ''Mukonda yavino mukafumu nga shuva vashe navawina ntani aka kukwatakane namukamali wendi, ⁸ Ntani vano vaviri ngava ka kare rutu rumwe. Makura kapi vakara nka vaviri, ngoli vavo kukara rutu rumwe. ⁹ Mbyovyoshi kehe vino gha gwanikida Karunga kumwe, kundereko wa kuvigaghununa.'' ¹⁰ Apa va kalire mundjugho varongwa vendi nka ava mu pura shimpe kuhamena vino. ¹¹ Ghuye aghamba kwavo ashi, '' kehe ghuno wakushwena mukadendi gha ka kware ko mukamali nayepeke, wangoli kuna kushondera kogho mukamali. ¹² Nange aka shwena mukafumu wendi aka kware ko mukafumu nayepeke, kuna kushondera.'' ¹³ Makura ava mu yitiri vana vavo vavadidi mposhi ava kwate, ngoli varongwa veni mpo vava shwenekire . ¹⁴ Ngoli Jesus apa avi dimburulire, avi muguvita ngudu mpo aghambire kwavo ashi, '' pulitirenu vanuke vavadidi vaye kwande, mwasha va shweneka, mbyovishi ghuntungi waKarunga kwa hamena kwava va fano yira mbovo. ¹⁵ Vyaushiri na ku mutantera, kehe ghuno nga diro kutambura ghuntungi waliwiru lyaKarunga yira mwanuke wamudidi, kundere ko kukangena mo.'' ¹⁶ Makura akwaterere vanuke mumawoko ghendi nakuvatungika ghuye kuna vakambeke maghoko ghendi. ¹⁷ Apa ashapukire ruyendo rwendi, mukafumu ghumwe adukiri kwendi kumwe nakutongamena kumeho yendi na ku mu pura ashi, '' Mushongi wamuwa, "Vinke ovyo nivura kuruwana mposhi ngani kawane monyo wanaruntje?'' ¹⁸ Jesus amupura ashi, ''' vinke ghuna kuntwenyena wamuwa? Kundereko ogho akaro ashi muwa kughupa ko Karunga mpantjendi. ¹⁹ Mwa yiva dimuragho: 'Nakudipagha shi, nakushondera shi, nakuvaka shi, nakurundira shi, nakunyenena shi, fumadeka vaSho navaNyoko.'' ²⁰ Ano mukafumu aghamba ashi, '' Mushongi, vininke navintje vino ame kwavi kwama nakuvifumadeka kutundilira wanuke wande.'' ²¹ Jesus amu kengurura makura uye amuhoro. makura a ghamba kwendi ashi, ''shininke shimwe wa pumbwa. ghunakona kughulita navintje wa kara navyo naku vi tapera kuvakaruhepo, ntani ngaghukara naghungavo wamuliwiru. Ya ngoli, nkwame.'' ²² Ngoli mukonda ya nkango dino uye amoneke ashi ana guvhu unene makura akayenda kuno uye anagarapa, mukondashi uye kwakalire na vininke vyavingi unene. ²³ Jesus makura aveme kuruharu na kukuruharu nakughamba kuvarongwa vendi ashi, ''Udito shiri kwavo vangawoparo kungena mughuntungi waKarunga!'' ²⁴ Varongwa vendi davatetulire nkango dendi. Makura Jesus aghamba kukwavo nka ashi, ''Vanuke, weni tupu omovya ditopa mukungena muuntungi waKarunga! ²⁵ Ureru kwa ngamero mukungena mulintjo lyantonga shivulite ngavo kukangena muuntungi waKarunga.'' ²⁶ Vavo vyava tetulire unene mpo vatamikir kukupurayera naghumwavo nanaumwavo mukatji kavo ashi, ''Makurane are ngoli wakuvura kuyowokwa?'' ²⁷ Jesus ghava kenge nakughamba ashi, ''Kuvantu narurweshi kushoroka, ngoli kwa Karunga kushoroka. Mukondashi vininke navintje kuvura kushoroka mwaKarunga. ²⁸ Petrus mpo atamikire kughamba naye nankango dino ashi, ''Kenga atwe kwa shuva navintje kumwe na kukukwama.'' ²⁹ Jesus aghamba ashi. '' Ushiri naku mu tantera ashi, kundere ko ogho ashuvo mundi ndi vaghuni vendi ndi vakuru vendi vavakafumu ndi vavakamali ndi vawina ndi vashe ndi vana ndi livhu mukonda yande ndi mukonda ya mbudi yayiwa ³⁰ Ogho nga piro kuwana vikando vyakutika kulifere kupita paweno muno mughudjuni: ndjugho na vakuru na vauni vavakafumu nava vavakamali, navanyokwa navana nalivhu, namahepeko, ntani mughudjuni ogho ngaghuyo, monyo wanaruntje. ³¹ Ngoli shingi shavakakuhova ngava ka hulilira, ntani vakuhulilira vavo ngava ka hova.'' ³² Vavo mundjira ya kuyenda dogoro kuJerusalem, makura Jesus kwava pitilire kumeho. vakashishongero vendi kwatetukire, ntani ovo vava kwamino muruku vavo kwa kalire naghoma. Makura Jesus aghupu po vanya ronambiri avatwaranka shimpe kumpenge, atameke kuvatantera ovyo ngavi mu shorokero muruvede runa karopepi tupu. '' ³³ Munamono! atwe kuna kuyenda dogoro kuJerusalema, makura mona muntu ngava ka mu tapa kuvapristeli vavanene navakurongi vamatjangwa. Ngava ka mu pangura dogoro kumfa nakumutapa kuvavikupaki. ³⁴ Ngava ka mu shwaura, kumu tipira, kumu shepura, kumwe na ku mu dipagha. Ano kuruku rwamayuva matatu ngaka vumbuka.'' ³⁵ Jakobus naJohanes vana vaZebedi, kwa yire kukwendi nakughamba, ''mushongi tuna shana ghu tu ruwanene kehe vino tu ku pura.'' ³⁶ Avapura ashi, ''vinke muna shana ni mu ruwanene?'' ³⁷ Ava ghamba ashi, ''' tu pulitire nga tu ka shungire nove mughuyerere woye, ghumwe kulighoko lyoye lyarulyo, ghumwe kurumontjo roye.'' ³⁸ Ngoli Jesus mpo ava limburulire nakughamba ashi, '' Kapi muna yiva ovyo muna kupura. Nga mu vura kunwa nkinda oyo ngani nwa ndi kudidimika likusho olyo ngava nkushitame ndi?'' ³⁹ Vavo ava ghamba kwendi ashi, '' nga tu vivura.'' Jesus aghamba kwavo nakuvatantera ashi, '' nkinda oyo ngani nwa, nga mu nwa, ntani nalikusho olyo nga va nkusha, nanwe ngava mu kusha. ⁴⁰ Ngoli vyakurenka ashi are ngashungiro kurulyo ndi kurumontjo rwande kapishi me wa kuvi tapa, ngoli vya mbovo vaviwapayikira.'' ⁴¹ Opo vaviyuvire vanya varongwa vamweya murongo vino, ava tameke kugarapa unene naJacobus ntani naJohanes. ⁴² Jesus ava yita vaye pepi naye nakughamba ashi, '' mwayiva ashi vanya va vatura va kare vapangeli vavavikupaki kuva dina, ntani vampititi vavo vavanene kurughanita ghunankondo mukuva pangera. ⁴³ Ngoli kapi ngavi kara weyo mukatji kenu. kehe ghuno anashano kukara munene mukatji kenu akona kukara mukareli wenu, ⁴⁴ Ntani kehe ghuno ana shano kukara wamuhovo mukatji kenu ana kona kukara shipika shanavantje. ⁴⁵ Morwa Mona Muntu kapi ghayera vaya muruwanene, ngoli mukuya ruwana nakuya tapa liparu lyendi yira shiyowolito shavayingi.'' ⁴⁶ Vavo avaya kuJericho. opo tupu va tundire muJericho navarongwa vendi nambunga yayinene, mona Timaeus wa shitwiku wamukafumu, Bartimaeus, murombagheli wamutwiku, kwa shungilire kushitaghura. ⁴⁷ Opo ayuvire ashi Jesus wakuNazareni gho, a tameke kuyiyira nakughamba, '' Jesus, mona David, mfere nkenda!" ⁴⁸ Shingi shavantu kwamu kwiyililire mukafumu unya wamutwiku, nakumutantera a mwene. Ngoli ghuye a takuma ngoli kupitakanena, '' mona David, mfere nkenda!'' ⁴⁹ Jesus ayimana na kuraghura vamu yite. ava muyita mukafumu ghunya wamutwiku, kuno uye kunakughmba ashi, '' Kwata mutjima! shapuka! kuna ku kuyita ana kukuyita. ⁵⁰ ''Ghavukumini mwaye wendi kuntere, avatuka , nakuya kwa Jesus. ⁵¹ Jesus amulimburura na kughamba ashi, '' vinke ghuna shana ni ku rughanena?'' Mutwiku aghamba ashi, ''Rabbi, nashana ni mone. ⁵² ''Makura Jesus aghamba kwendi ashi, '' Kayende. mapuliro ghoye ana kuveruro. '' Mpopo tupu atameke kukenga nka, makura amu kwama.