¹ Makura kwa Mosesa a kutundu vana va vakadona va Zelofeha mona Heferi wa mukafumu Geliyadi mona wa mukafumu wa Makiri mona wamukafumu wa Manase, va kurudi rwa Manase mona wa mukafumu wa Josefa. Oghano ngo madina gha vana vendi va vakadona: Mahila, Nowa, Hogila, Milka, na Tiriza. ² Ava yimana kumeho ya Mosesa, Eliyazara mu piristeli, mpititi, ntani kumeho ya dimuhoko nadintje mulivero lya kungenena mutende yashigongi. Ava ghamba, ³ ''Shetu a felilire mu mburundu. Kapi a hamininine kovanya vakaliro unkore na Karunga mu mbunga ya Kora. Kwafire kundjo ya mwene, ntani kapi akalire na vana va vamati. ⁴ Mukonda munke lidina lya shetu valighupira mo mukatji kamuhoko wendi mukondashi kapi akalire na mona wa mumati ndi? Tupenu livhu twe momo twakarera valikoro lya shetu.'' ⁵ Makura Mosesa a yita udito kuuto wa Karunga. ⁶ Karunga a ghamba kwa Mosesa na kumutantera, ⁷ ''Vana va Zelofehadi va vakamali kuna kughamba mu ghuhunga. Ghuna kona kuvapa ko livhu likare upingwa wa likoro lya shavo, ntani una kona kutakamitashi upingwa wa shavo ghu vatambeke va vene. ⁸ Ghuna kona kughamba kuvantu vaIsraeli na kuvatantera ashi, ''Ntjene mukafumu a dohoroka kuno ghuye kwato mona wa mumati, vana kona kuyita upingwa wendi vautambeke vana vendi va vakadona. ⁹ Ntjeneshi kwato mona wa mukadona una kona kutapa upingwa kuvaghuni vendi va vakafumu. ¹⁰ Ntjeneshi kwato vaghuni va vakafumu, makura una hepa kutapa upingwa kwa vaghuni va vashe. ¹¹ Ntjeneshi vashe kwato mughunyavo wamukafumu makura una kona kutambeka ku vakaliro lyendi ovo vamukundamo mu muhoko wavo, ntani una kona kuvighupa vikare vyendi. Oyino ngayikara veta oyo aturapo mupangeli wa vantu va Israeli, yira momo Karunga ana vindawiri me.'' ¹² Karunga a ghamba kwa Mosesa, ''Yenda kuwiru yo yinondundu ya Abiramu makura ghu kaakenge livhu olyo natapa kuvantu va Israeli. ¹³ Apa ghu kamana kukalikenga, novenka, waro, una kona kukupakerera kuvantu voye, yira mukuroye Arona. ¹⁴ Ovino kuvishoroka mukondashi anwe muvaviri mwa rwanitire mpangera yande mu mburundu ya Sinayi. Omunya, opo atundire mema muliwe, muugara ghoye kapi wa huguvalire me ashi napongoka kumantjo gha dimuhoko nadintje.'' Oghano ngo mema gha Meriba ghamu Kadeshi mu mburundu ya Sini. ¹⁵ Makura Mosesa a ghamba kwa Karunga nakughamba, ¹⁶ ''Kuvhura ve, Hompa, Karunga wa mpepo ya vantu navantje, ghu neye mukafumu muno mu muhoko, ¹⁷ murume ogho a vhuro kurupuka ntani a ngene kumeho yavo makura a pititire makura aya vangeneke, mukondashi muhoko ghoye kapishi yira vindjwi vya kupira mukungi. ¹⁸ Karunga a ghamba kwa Mosesa, ''Ghupa Joshuwa mona Nunu, mukafumu omo yatunga mpepo yande, makura ghu mukambeke maghoko ghoye. ¹⁹ Muture kumeho ya Eliyazera mupilisteli ntani kumeho ya muhoko nauntje, ntani murawire kumeho ya mantjo ghavo ava pititire. ²⁰ Ghuna kona kutura unankondo woye umwe pendi, mposhi muhoko nauntje wa vantu va Israeli vana hepa kumukwama. ²¹ Ghuye nga pita kumeho ya Eliyasara mupelisteli nga mushanene vya kumeho yande mu matokoro gha Urimu. Ngavikara mumpangera yendi oyo vantu ngavarupuka ntani nakungena, ghuye na vantu navantje va Israeli ntani naye, muhoko nauntje. ²² Mosesa a ruwana yira Karunga a murawilire. A ghupu Joshuwa a mutura kumeho ya Eliyasara mupilisteli ntani na muhoko nauntje. ²³ A kambeke maghoko ghendi pendi makura a murawiri apititire, yira momo a murawilire Karunga omo a ruwana.