¹ VaIsraeli ava kara mu Shittimu, ano vakafumu ava kunyateke na vakamali va vaMowabu, ² vakaMowabu kava kumunanga vantu mukukadjambera va Karunga vavo. Vantu kavalyanga nakutongamena va Karunga va vaMowabu. ³ Vakafumu va vaIsraeli ava kuhamitiri mukukara mukukarera Bara waPiyoro, makura ugara waKarunga aghudivyuka vaIsraeli. ⁴ Karunga a ghamba kwa Mosesa, ''Dipagha vampititi navantje va vantu na kuvalika vandjendjerere kukwande kumeho yande mushikenga mantjo, mposhi ugara wande ghutunde kuvaIsraeli.'' ⁵ Ano Mosesa atantere vampititi vaIsraeli, ''Kehe uno pa penu a dipagha vantu ovo vana kuhamitiro mukufumadeka Bara waPeyoro.'' ⁶ Ntani umwe wa vakafumu wa vana va vaIsraeli aya nakuyita mukatji kaliro lyendi mukamali muMidiyani. Vino kwashorokire mushikenga mantjo gha Mosesa na nkarapamwe nayintje ya vantu vaIsraeli, kuno vavo mushiliro kulivero lya nkongorondjugho ya makugwanekero. ⁷ Opo Piniasa mona rume wa Eliyasara mona Arona muruti, avi kengire ovyo, a shapuka mu mbunga nakughupa lighonga mulighoko lyendi. ⁸ Ghuye a shapuka murume ogho wa muIsraeli mu nkongorondjugho a bwarura ovo marutu ghavo, mu ghuviri wavo murume wa muIsraeli namukamali. Mpo ngoli matengeko ogho Karunga atumine pa vantu va vaIsraeli agha shaya. ⁹ Ovo vafiro kumatengeko kwa kalire mayovi dimurongo ntambiri na mane mushivaro. ¹⁰ Karunga a ghamba kwa Mosesa na kutanta, ¹¹ ''Piniyasa mona Eliyasara mona Arona wa muruti ana pirura ugara wande ghu tunde kuvantu vaIsraeli mukondashi ghuye ana kuyendi na marwameno ghande mukatji kavo. Mposhi kapi nivhura nka kudjonaura vantu vaIsraeli mughugara wande. ¹² Mukonda yovyo kutantashi, 'Karunga nakughamba, ''Mona, ame kuna kutapa kwa Piniyasa likukwatakano lyande lya mbili. ¹³ Kukwendi na kuruvaro rwendi rwa kunyima yendi, ngalikara likukwatakano lya shighuruti wa kukukarererapo mukondashi ghuye a ruwanine ku kwande, Karunga wendi. Ghuye kwakalire shiyovolito kuvantu vaIsraeli.''' ¹⁴ Weno lidina lya mukafumu wa muIsraeli ogho vana dipagha na mukamali wa muMidiyani ndje Shimuri mona Sharu, mpititi wa murudi rwa lira lya va Simiyoni. ¹⁵ Lidina lya mukamali wa mu Midiyani ogho vadipaghire ndje Kosibi mona kadi wa Shuru, ogho a kaliro mutwe wa rudi na likoro mu Midiyani. ¹⁶ Karunga a ghamba kwa Mosesa na kutanta, ¹⁷ ''Tekura va Midiyani yira vanankore natani vahomone, ¹⁸ shika momo vavo vakutekulire ove yira munankore na vimpempa vyavo. Vavo kwakutindikilire mughudona mushimpagwa sha Peyoro na mushimpagwa mpandjavo Kosibi, mona kadi wa mpititi wa mu Midiyani ogho ogho vadipaghire paliyuva lya mahepeko mughudito wa Peyoro.