¹ Kwakalire mumwaka wauntayimwe ntani kwedi kauntayimwe, muliyuva lyautano lya mukwedi, opo nashungilire mumundi wande na vakurona vamu Juda kumeho yande, lighoko lya Hompa Karunga shimpe aliwere pande. ² Makura anikenge, nakumona, kwakalire damudau limoneko lya muntu mulimoneko lya mumaghuru shighurumwite kwakalire mundiro. Ntani mumaghuru shikandwite kwamonikire vininke vyakumoneka yira shikugho shakughenya. ³ Makura ghuye aghonyonona murupe rwa lighoko aghupu ruhuki mumutwe wande; mpepo ghayitura pakatji ka ntunda ya livhu na liwiru, mulimoneko lya Karunga, ghuye akandjita me kuJerusalema, kwangeninine kulivero lya liwe kuucuma, oko oko shakalire shikarunga shavimpempa mukuyimaneka nkoko yayinene yiyimane. ⁴ Makura anikenge, ghuyerere wa Karunga wa Israeli nko wakalire, kutwara mulimoneko olyo namonine. ⁵ Makura aghamba kwande, ''Mona muntu, kengera mantjo ghoye kuumboyera.'' Makura ame anikenge kuumboyera, ano kuumboyera kwakalireko livero lyapititiro kuharutare, nkokunya kumangeneno, kwakalire shikarunga sha unankore. ⁶ Makura ghuye aghamba kwande, ''Mona muntu, una vimono ovyo vanakuruwana"Lino lishwau lyalinene mumundi wa Israeli vanakuruwana paweno kuna kundenka me niyende ghure mumundi wa naumwande. Ene ngoli ove kughuvyuka na kukamona mashwau gha manene.'' ⁷ Makura ghuye akandjita kulivero lyakurupuka mulivango, ano anikenge, na kumona kwakalire likwina mulikuma. ⁸ Ghuye aghamba kwande, ''Mona muntu , ghutime mo omo mulikwina.'' Makura ani tjokoramo mulikwina, nani ngoli mwakalire livero. ⁹ Ano aghamba kwande, ''Yenda na kukakenga mashwau ogho munakuruwana pano.'' ¹⁰ Makura ame aniyendi na kukenga, animono mwakehe rupe mwakalire marupe gha virema na makashama gha mpepo yayidona, kehe shino sha lifano mumundi wa Israeli kwavishongire pa makuma livango nalintje. ¹¹ Vakurona dimurongo ntambiri mumundi wa Israeli mpovakalire ntani Jaazania mona Shaphani wa mukafumu kwayimanine mukatji kavo. Vavo kwayimanine kumeho ya lifano ntani kehe muntu ghakalire na nomora mumaghoko mposhi yinuke kumaremo lidumba likanduke. ¹² Ghuye aghamba kwande, ''Mona muntu, munayivashi vakurona va mumundi wa Israeli ovyo vanakuruwana mumundema? Kehe uno mbyo anakuruwana mukandjugho mukaholyaholya na shilifano shendi, mo vana ghamba, 'Hompa kapi atumona! Hompa atushuvilira shirongo.''' ¹³ Makura aghamba kwande, ''Piruka shimpe ghukenge mashwau ghamweya ghamanene ogho vanakuruwana.'' ¹⁴ Vyakukwamako akandjita kumangeneno gha heka ya mundi wa Hompa ogho wakaliro kwara utokero, ntani mulitaterero! Vakamali kwashungilire muruguvo ku Tammuz. ¹⁵ Ano ghuye aghamba kwande, ''Kuna kuvimona vino, mona muntu? Piruka nka shimpe ghukenge mashwau gha manene kupitakana ghano.'' ¹⁶ Andjita mulivango lya munda ya mundi wa Hompa, nakukenga! Pamangeneno gha ntembeli ya Hompa pakatji munakara nashidjambero, opo kwakalirepo vakafumu dimurongo mbiri na vatano vana pirukitiro dimughongo davo kundjugho ya Hompa ntani vipara vyavo kwara kuupumeyuva, ano vavo avakarere liyuva. ¹⁷ Aghamba kwande, ''Una vimono vino, mona muntu? Kuvininke vino vyavididi mundjugho ya vaJuda mukuruwana lishwau olyo vanakuruwana pano ndi? Mpo ngoli shi vavo vaywida shirongo naukorokotji ntani vavo vapiruka nka vashangumune ugara wande, kutura dimutavi kumayuru ghavo. ¹⁸ Makura ame name ngani kumonikita mukatji kavo; mantjo ghande kapi ngaghakara na shihoro, ntani ame kapi nganitulika vininke vya vidona. Nampindi weni mo ngavalilira unene naliywi lyakudameka mumatwi ghande, ame kapi nganivayuva.''