¹ Hompa Karunga aghamba vino: Heka ya mangeneno gha munda, yapirukiro kuupumeyuva, ngavayihara mumayuva ntayimwe gha viruwana, ene ngoli muliyuva lya sabata ngavayiharura, ntani muliyuva lya kakwedi kakape ngavayiharura. ² Mona hompa wa mumati ngangena mumbara mundjira ya mangeneno gha pandje ntani ngayimana pamangeneno gha munda shirugho sho vapilisteli vavo kuna kuruwana ndjambo ya kushora na ndjambo ya mbili. Makura ghuye nga kanderera mumangeneno gha munda kumwe na kurupuka, ene ngoli heka ngavayihara dogoro kungurova. ³ Vantu vamushirongo navo ngava kanderera kwa Hompa pa mangeneno gha heka muliyuva lya sabata na kwedi kakape. ⁴ Ndjambo ya kushora oyo mona hompawa mumati nga tapa kwa Hompa muliyuva lya sabata ngavikara vindjwi ntayimwe vya kudira vipo na vindjwi ntayimwe vya virume. ⁵ Ndjambo ya mbuto na ndjwi ya yirume na utura warupekwa, utura wa rupekwa na ndjwi mbyo ngavikaro vyakutapa, na litera yimwe ya maghadi kuutura. ⁶ Muliyuva lya kwedi kakape anahepa kutapa hove yakudira shipo, vindjwi ntayimwe, na shindjwi sha shirume shakudira shipo. ⁷ Anahepa kutapa ndjambo ya mbuto ya likukwatakano na hove na shindjwi sha shirume, ntani ovyo ana kutaterera mukutapa ndjwi, na dama yimwe maghadi mukehe muutura rupekwa ya ndjambo ya mbuto. ⁸ Opo mona hompa wa mukafumu ngangena mundjira ya heka, ntani anahepa kurupira ndjoyo ndjira yakukufana. ⁹ Ngoli vantu vamushirongo opo ngavaya kumeho ya Karunga pa shilika vatoghorora, kehe uno wakungenena kuheka ya kuumboyera mukuyakanderera anakona kukarupukira kuheka yakuucuma pakuvyuka; ano vakungenena kuheka yakuucuma vanakona kukarupukira kuheka yaumboyera. Naumweshi wakurupukira kuheya oyo ana ngenene, ngoli ana hepa kuvyukilira kuyenda. ¹⁰ Mona hompa wa mukafumu anakona kukara mukatji kavo, pakungena mo, anakona kungena, ntani pakuvyuka, naye anahepa kuvyuka. ¹¹ Pashilika, ndjambo ya mbuto yina hepa kukara ya likukwatakano ya hove yakudira shipo na shindjwi sha shirume shakudira shipo, ntani na kehe vino ana shana kutapa na vindjwi, na dama ya maghadi mukehe utura wa rupekwa vya likukwatakano. ¹² Mona hompa pakutapa ushwi kundjambo wakukukarera mulikuyuvo lyendi, vikareshi ndjambo yakushora ndipo ndjambo ya mbili kwa Karunga, heka yapirukiro kuupumeyuva ngayimuharurukira. Ngakatapa ndjambo yendi yakushora ndipo ndjambo yambili shika momo aviruwananga muliyuva lya sabata. Makura nakukarupuka, ano tupu ngarupuka heka ngavayihara. ¹³ Mukuwedererako, ngamutapa shindji shimwe shakudira shipo sha mwaka umwe kundjambo yakushora kwa Hompa kehe liyuva; Ngauviruwana vino ngurangura tunda ngurungura. ¹⁴ Ngamutapa na ndjambo ya mbuto ngurangura tunda ngurangura, shindjwi shauntayimwe na shautatu sha mumaghadi pa utura warupekwa kwa Hompa, kutwara muveta da kukarererapo. ¹⁵ Ngavawapayika shindjwi, ndjambo ya mbuto, na maghadi ngurangura tunda ngurangura, ndjambo ya kushora yakukarererapo. ¹⁶ Hompa Karunga kuna kughamba vino: Ntjeneshi mona hompa wa mukafumu atapa ushwi kwaumwe wa vana vendi va vakafumu, ogho upingwa wendi. Ngaukara upingwa wa ruvaro rwendi naye. limona lyavo muupingwa. ¹⁷ Ene ngoli ntjeneshi upingwa kwaumwe wa vapika vendi, makura ngaukara wandjogho mupika dogoro mwaka watungika hompa wamupe, makura ntani ngalivyuka kwa mona hompa. Upingwa wendi ngaukara wa vana vahompa va vakafumu. ¹⁸ Mona hompa wa mukafumu kapi ngaghupa upingwa vantu, ndi kuuvaghambita mukughupa upingwa wavo; anahepa kuwanena vana vendi va vakafumu upingwa wa naumwendi mposhi vantu vande kapi ngavakuharagane, kehe muntu kuviweka vyendi.''' ¹⁹ Vyakukwamako mukafumu andjita kumangeneno gha heka kundjugho ya kupongoka ya vapilisteli, oyo yapirukiliro kuumboyera na kukenga! Kwakalire livango lya kuutokero. ²⁰ Aghamba kwande, ''Olino ndyo livango vapilisteli ngava bwakatita ndjambo ya undjoni na ndjambo ya ndjo ntani nko kwakukangera ndjambo ya mbuto. Kapishi ngavarupwite vantu ndya da ndjambo pandje ya liharango, mbyevi shi vantu ngava vafingilira.'' ²¹ Makura andjita pandje ya liharango ano ampititire kupita huka ne da livango, ano ani mono mukehe huka ya liharango mwakalire livango limweya. ²² Mumaharango mane gha livango lya pandje mwakalire mavango mane gha madidi, kubiku dimurongo ne muure ntani dimurongo ntatu muufupi. Huka ne da livarango kwakalire metera da kushetakana. ²³ Mwakalire muyaro wa mawe vayara kukundurukida huka nadintje ne, na tundjugho twakuterekera kwakalire munda ya muyaro wa mawe. Mukafumu aghamba kwande, ²⁴ ''Oghano ngo mavango oko varuwani vamuntembeli vabwakatitanga ndjambo da vantu.''