¹ Makura nkango ya Hompa ayiya kwande, nakughamba, ² ''Mona muntu, tura mantjo kundundu ya Seyira ntani muyiporofete. ³ Ghamba kwayo, 'Hompa Karunga kuna kughamba vino: Kengenu! ame nakumuvyuka nwe, ndundu ya Seyira, ngani kutoghona lighoko lyande na kurenka muporongwa ntani nakupira mulyo. ⁴ Ngani renka vitata vyenu vidjonauke, ntani anwe naumwenu ngamukara muporongwa; ntani ngamuyiva ashi ame Karunga. ⁵ Mukonda anwe kunaruntje kwakalire vanankore va Israeli, ntani mukonda mwatapire mumaghoko gha vadipaghi muruvede rwa maudito ghavo, paruvede oro ghakalire matengeko ghavo manene unene. ⁶ Mpo ngoli shi, momo nakuparuka - ouno ngo umbangi wa Hompa Karunga - ngani muwapayikira kuliteto honde, ntani liteto honde ngalimukwama! momo anwe kapi mwanyengire liteto honde, liteto honde ngalimukwama-kwama. ⁷ Nganitura ndundu ya Seyiri yikare mburundu opo nganiteta kehe uno wakupitiramo ntani akavyukemo nka. ⁸ Ndundu yayo nganiyiyuda novo vadipaghire; pandundu denu dadire ntani madamenena na tumukuro weno ovo vadipaghire kurufuro ngavawa. ⁹ Nganirenka ukare muporongwa kunaruntje. Vitata vyenu kwato ogho ngatungomo, ene ngoli ngamuyiva ashi ame Karunga. ¹⁰ Anwe mwa ghamba, ''Dimuhoko dino mbiri ntani navirongo viviri ngavikara vyenu,'' nampiri mpopo akalire Karunga navo. ¹¹ Mpo ngoli ashi, momo nakuparuka - uno ngo umbangi wa Hompa - makura ngani ruwana kutwara kuugara ntani kutwara ku mfudu oyo mwakara mushinyenganyi shenu na Israeli, ntani ngani kunegheda naumwande kukwavo opo nganipangura. ¹² Mposhi ngamuyive ashi ame Karunga. Nayuva nkango dona mwaghambirekundundu ya Israeli, opo wa ghambire, ''Vanavadjonaura; vanavatupa tuvakupapawire.'' ¹³ Mwakunenepita mumpiruke, ntani mwatamununa nkango odo mwa ghamba mumpiruke; ntani navitjeya naviyuva. ¹⁴ Hompa Karunga kuna kughamba vino: Ngani murenka muporongwa, okuno undjoni nauntje kuna kuhafa. ¹⁵ Momo mwahafire kulipingo lya vantu va Israeli mukonda muporongwa washo, vyakufera ngoli ngani ruwana kukwenu. Ngamukara muporongwa, ndundu ya Seyiri ntani namuntje mu Edomu - namuntjeya! Ntani ngavayiva ashi ame Karunga.'''