¹ Makura avishoroka mukwedi kaumungo na mbiri wa mumwaka wa umurongo na mbiri, muliyuva lyakutanga lya kwedi, mpo yayire nkango ya Hompa kwande, nakughamba, ² ''Monande, yita ruguvo kuhamena kwa Farawo hompa wa Egipute; ghamba kwendi, 'Unakara yira nyime ghona mukatji kadimuhoko, ene ngoli unakara yira likiti-kiti mulifuta, ove kutaura mema, ove kudinga mema nampadi doye ntani kugha tura matata. ³ Hompa Karunga kuna kughamba vino: Makura nganiyara likwe lyande mumakupakerero gha vantu va vangi, ntani ngavakudamune mulikwe. ⁴ Ngani kakushuvilira mushirongo. Ngani kakuvhukumina mulifuva ntani ngani karenkita vidira navintje vya muwiru ngavikatembere papoye; ndjaraya shikorama shakuparuka ove ngaukashikutite. ⁵ Mbyevi shi ame nganikatura rutu roye pandundu, ntani nganiyuda madamenena na honde yoye. ⁶ Makura nganitere honde yoye pandund, ntani vidira vyamudimukuro denu ngavinwa muhonde yoye. ⁷ Makura opo ngani kushingonona, ngafika liwiru na kutipita ntungwedi, ngani fika liyuva na maremo, ntani ndjugho kapi ngayimoneka ramba yamo. ⁸ Ntugwedi nadintje dakumoneka muliwiru nganididimitira papoye, ntani nganitura likuru ndema mushirongo shoye - ouno ngo umbangi wa Hompa wakuyulilira. ⁹ Mpo ngoli nganitjilita dimutjima da vantu va vangi mushirongo osho mwapira kuyiva, opo ngani yita ligando mukatji kadimuhoko, mukatji kavirongo ovyo mwapilire kuyiva. ¹⁰ Ngani tetukita vantu va vangi kuhamena koye; vahompa ova ngavakankamo kughoma kuhamena opo nganivhukuma rufuro rwande kumeho yavo. ¹¹ Mpo ngoli Hompa Karunga ana kughamba vino: Rufuro rwa hompa wa Babiloni kapi ngaruya kukwenu. ¹² Nganirenkita mbunga ngayiwe kumarufuro gha varwi - kehe uno murwi utjirwe wadimuhoko. Varwi ngavadjonaura mfumwa ya Egipute ntani nakudjonaura mfumwa ya mbunga ya Egipute nayintje. ¹³ Mpo ngani djonaura vimuna vya kuruha rwa mema gha mangi; mpadi ya muntu kapi nka ngayidinga mema, ndi makondo gha ngombe gha dingemema. ¹⁴ Makura ngani ghupapo lilikido memo ntani nganirenka dimukuro davo ngadiduke yira maghadi - ouno ngo umbangi wa Hompa. ¹⁵ Opo nganitura shirongo sha Egipute shirongo osho vashuvilira, shirongo sha maghoko-ghoko, opo ngani homokera vatungimo vamo, ngavayiva ashi ame Hompa. ¹⁶ Ngapakara liguvo; vana kadona vamumuhoko ngavaguvira shirongo shavo; ngavaguvilira Egipute, mumbunga yendi namuntje ngavaguva - uno ngo umbangi wa Karunga.''' ¹⁷ Makura avishoroka mumwaka wa umurongo na mbiri, muliyuva lyaumurongo na mayuva matano mukwedi, opo nkango ya Hompa yayire kwande, nakughamba, ¹⁸ ''Monande, guvirapo mbunga ya Egipute ntani ukavaurumwite - shirongo shino na vana kadona va mushirongo sha kufa - kulivhu lya kughurumuka kumwe navo vaghurumuko kumakwina. ¹⁹ Ove umuwa unene kupitakana kehe uno ndi? Yenda ghuurumuke ghukarare nava vapira kupongoka.' ²⁰ Vavo kuvakara mukatji kovo vafiro kurufuro. Rufuro runarovo! Vanamutapa kurufuro; ngavamukwata na mbunga yendi. ²¹ Varwi vita vankondo muSheyoli ngava ngambipara kuhamena ya Egipute na virungu ovyo na kuruwanena navo. Vanaurumuka! Ngavayara na vafe, kumwe novo vafiro kurufuro.' ²² Assiriya nko anakara nkoko na makupakerero ghendo. Mbira dendi damukundurukida; navantje kwa vadipaghire rufuro. ²³ Ovo vakaro ashi mbira davo kuntjintji ya makwina mpovali nkoko, kumwe na mbunga davo. Mbira yendi kwakundurukida navantje ovo vadipagho, ovo vawiro kurufuro, ovo vayitiro ghoma kushirongo shava vakakukara namonyo. ²⁴ Elami mpwali nkoko kumwe na mbunga yendi. Mbira dina mkundurukida ; navantje kwa vadipaghire. Ovo vawiro kurufuro, ovo kavavhumbikanga kumaruha gha kuhulilira gha livhu, ovo vayitiro utjirwe maulivango lyava vakukara namonyo ntani vashimbe kumwe na ntjoni davi, kumwe novo vanakuyendo mumakwina. ²⁵ Vaturapo shininke shakukukweyera sha Elami ntani na mbunga yendi yamuvita; mbira dendi da mukundurukida. Nvantjeya kapi vavaruwana vya vamba, navantjeya kwavadipaghera muvita, mukonda ashi vanayita utjirwe wavo mukatji kavanamwenyo.Mpo ngoli vashimba ntjoni davo, kumwe naumwe anakuyendo mulikwina mukatji kovo vadipagha,ovo vanakuyendo mulikwina. Elami naye umwe wa mukatji kovo vadipaghire. ²⁶ Mushech, Tubali, ntani na mbunga yendi nayintje mpovali mpopanya! Mbara davo davakundurukido. Nvantjeya kapi va varuwana vya vamba, kwavadipaghire muvita, mukonda ashi vayitire utjirwe kushirongo sha vanamwenyo. ²⁷ Kapi va vahoreka kumwe na varwi ovo vawiro ovo vapira kuruwana vya vamba ovo vayendiro kuSheyoli kumwe navirwito vyavovya vita, ntani kumwe na virwita vyavo kuno vanavitura munda ya dimutwe ntani na maudano ghavo muvifupa vyavo. Mpo ngoli vavo kwakalire vatjirwe va varwi vita mushirongo sha vanamonyo. ²⁸ Mpo ngoli ashi anwe, va Egipute, ngavamutjoraura mukatji kovo vapira kuruwana vya vamba! Ngamurara kumaruha ghovo vadipaghire muvita. ²⁹ Edomu mpwali mpopo kumwe na vahompa vendi na vampititi vendi. Kwavatura kumwe novo vapiliro kurwa vita. Novo vapilire kuruwana vya vamba, kumwe novo vayendo kuntji mumakwina. ³⁰ Ntjantjo ya vakaucuma mpoyili mpopo - navantjeya ntani navantjeya vaSidoni ovo vavumbikire kumwe novo vadipaghire. Vavo kwakalire nankondo ntani varenkitire vaunyavo vatjire, ene ngoli weno mpovali mpopanya nantjoni davo, kumwe nambovo vayendiro mulikwina. ³¹ Farawo ngakenga ntani nakumushengayika kuhamena mbunga yendi nayintje oyo vadipaghire muvita - Farawo ntani navarwi vita vendi - ouno ngo umbangi wa Hompa. ³² Namutura ashi ghuye wakutjilita mushirongo sha vanamwenyo, ene ngoli ghuye ngavakamutura mukatji kava vapira kuruwana vya vamba, mukatji kava vafiro kurufuro, Farawo kumwe na mbunga yendi - ouno ngo umbangi wa Hompa Karunga.