¹ Navintje vino avirara kumutjima wande, mukuvikenita, ntani ani manitashi ushiri na mukotoki, ntani navintje ovyo varughananga kwakara mumaghoko gha Karunga, ene ngoli kwato ogho ayivoshi walye shihoro ndi runyengo runakumutaterero. ² Kehe uno akara nankondo dakukufana mukurughana vininke. Nkondo dakukufana dina kumutaterero vantu vaushiri ntani vaukaro dona, vauwa, vakukene nava vakudira kukena, ntani ovo vakudjamberango ntani ovo vadirango kukudjambera nauwa vantu ngavadohoroka, shimpe nka nava vanandjo novo vaghanango navo ngavafa, shimpe nka namuntu ogho atjiro kurughana matwenyidiro. ³ Mpouliko ukarodona wankondo kwanavintje ovyo varughananga kuntji yaliyuva, vishorokwa vyakukufana ngavishoroko kwanavantje. Dimutjima davantu mwayura ukaro dona, ntani upurumuke mpouli mumutjima wavo shirugho sho vanakuparuka. Mposhi kunyima yavyo ngava yenda kumfa. ⁴ Kehe uno akugwanekero navintje vyakuparuka akara nalihuguvaro- nampili mbwa yayiyumi kupitakana nyime yakufa. ⁵ Kovo vana karo vayumi vayive shi ngava dohoroka, mara mufe kapi ngayiva kehe vino. Kapi vakara nakehe mfuto mukondashi ndunge davo vadivurama. ⁶ Shihoro shavo, runyengo, ntani ugara vyadongonoka kare. Kapi ngava kara nka nalivango shimpe kukehe virughana vyakuntji yaliyuva. ⁷ Kayende ndjira yoye, lya mboroto yoye naruhafo, ntani nwa vinyu yoye namutjima waruhafo, Karunga ngakakenga virughana vyoye. ⁸ Pulitira vyuma vyoye kehe pano vikare vyavikenu ntani mutwe ghoye vauwave na maghadi. ⁹ Djobwana liparu namukamali ogho owo wahora mumayuva naghantje ghakudira kutanta vintu liparu olyo akupa Karunga kuntji yaliyuva- navantje mumayuva ghoye ghakudira kutanta vintu. Kwavino ndjo mfuto yoye muliparu kuvirughana vyaudiro ovyo warughananga kuntji yaliyuva. ¹⁰ Kehe vino awana maghako ghoye arughane, virughane nankondo doye, mukondashi kwato virughana ndi lishingonono ndi unandunge ndi ukotoki mushiyoli, oko una kuyenda. ¹¹ Namono vininke vyakuhafera kuntji yaliyuva; marumbatano kapi ghatumbukira kuvantu vakukwangulita. Viruwana kapi vyatumbukira kuvantu vankondo. Mboroto kapi yatumbukira kuvantu vavakotoki. Vangagho kapi vatumbukira vantu vakutegherera. Kuhuguvara kapi kwatumbukira kuvantu vaunandunge mundjira yakurenka, ruvede nampito kuvikundamo navintje. ¹² Ushili kwato ogho ayivo ashi ruvede rwendi munke ngaruya. Ntjwi kwadikwatanga likwe lyakufa, ndi vidira kwavikwatanga mukandjugho, vanuke vavantu kwavakwatanga ruvede rwaukaro dona ovyo parumwe vyavawerengo. ¹³ Shimpenka namono ukotoki kuntji yaliyuva mundjira oyo yamonikire vinene kwande. ¹⁴ Kwakalire nkurumbara yayididi oyo yakaliro navantu vavasheshu mwayo, ntani Hompa wamunene ayinyengire, ayikundurukide ntani nakudikako vininke vivili vyakukundurukida kwayo. ¹⁵ Ntani ngoli munkurumbara kwawana ruhepo, muntu wamukotoki, ogho muukotoki wendi apopilire nkurumbara. Kuruhulilira kwato ogho avurukiro mukafumu waruhepo. ¹⁶ Mposhi ani manita, ''Ukotoki hasha kupitakana nkondo, ene ngoli ukotoki wamuntu waruhepo varuvurama, ntani nkango dendi kapi vadi yuva.'' ¹⁷ Nkango davantu vakukotoka odo vaghambanga teghete kudiyuva hasha kupitakana kuyiyira kwamupangeli mukatji kamavaya. ¹⁸ Ukotoki hasha kupitakana virwita vyamuvita, ene ngoli munandjo umwe kudjonaura uwa.