¹ Shimpe ani ghayara kuhamena navintje kukupangera kwaufeke oko varuwana kuntji yaliyuva. Ntani nka, maruntjodi ghavo vatekura muufeke, ntani kwato umwe wakuvayuvita mbili! Nkondo kwakalire mumaghoko ghavatekuli ufeke, ntani kwato wakuvayuvita mbili! ² Mposhi ame nina horoghora ovo vadohoroko kare lirago kupitakana liparu, ovo vana kuparuko shimpe. ³ Nampili ndi ngoli, valirago lyalinene kupitakana navantje ovo shimpe vadiro kuparuka, ovo shimpe vadiro kumona kehe ghano maukaro ghamadona ogho varughananga kuntji yaliyuva. ⁴ Makura ani kenge kehe vino virughana vya varughani ntani navirughana vya unkunguru aviya vikare likunyengo lya maparambo. Ovino navyo kapi vyakutanta vintu- yira kuna kukwata mpepo. ⁵ Livaya kupeteka maghoko ghendi ntani nakurughanashi, mposhi ndya dendi ne nyama yanaumwendi. ⁶ Ene ngoli hashako wakurughana vya vingi na viyeramo virughana vya kumwena kupitakana maghoko maviri ghavirughana na varughani vakusheteka kukunga mpepo. ⁷ Ani vyuka ntani nakunenga vininke vimwe kapi vyakutanta vintu kuntji ya liyuva. ⁸ Mporuliko rudi rwa muntu ogho ana karo pantjendi. Kwato muntu ogho akarango ndi kuyenda naye,kwato mona wa mumati ndi mukurwendi wamumati, ntani shimpe kwato uhura kuvirughana vyendi navintje, ntani mantjo ghendi kapi ngavaghaywidilira nalingeneko lya untungi. Ana horo kuyiva, ''Kware nina kuyenda nankondo ntani kughupako naumwande ruhafo?'' Ovino navyo kapi vina kutanta vintu- shishorokwa shashidona. ⁹ Vantu vaviri varughana vyahashako kupitakana umwe, kumwe navantje kuwana viyeramo vyaviwa kuvirughana vyavo. ¹⁰ Ntjene umwe a wu, unyendi kwashapwita muholi wendi. Nampili ndi ngoli, rugugho kukwama unya ana karo pantjendi opo awa ntjene kwato wakumushapwita ayeruke. ¹¹ Ntjene vavili navantje ava rara kumwe, kuva kara vana yenye, ene ngoli weni mo umwe a yenya pantjendi? ¹² Muntu umwe pantjendi kuvhura akare nankondo dakupitakanena, ene ngoli vavili kuvaparuka lihomokero, ntani maghodi matatu kapi ngava gha kwangulita kugha tjora. ¹³ Hashako kukara munaruhepo ene ngoli ukotoki wa unantjoka kupitakana wa ukondi ntani hompa wa uvaya ogho adiro kuyiva kutegherera kumarondoro. ¹⁴ Evino ushiri nampili mwanuke wamukafumu akare hompa wamudorongo, nampili kwamushampuruka munaruhepo mushirongo shendi. ¹⁵ Namonine navantje ovo vaparukiro ntani kavayendauranga kuntji ya liyuva, kumwe na munantjoka ogho ngakuro mukughupa livango lyandi. ¹⁶ Kwato uhura kuvantu navantje ovo vana horo kutegherera hompa wamupe, ene ngoli muruku shingi shavo kapi ngava mutongamena. Ushili-shili evino navyo kapi vyakutanta vintu- yira kuna kukwata mpepo.